Luka 12

₁Hi nkarhi wolowo, loko vanhu va madzana-dzana va hlengeletana va ko va kandziyelana, Yesu a sungula ku byela vadyondzisiwa va yena a ku: “Tivoneleni eka comela xa Vafarisi, byi nga vukanganyisi; ₂hikuva a ku na xilo lexi funengetiweke, lexi nga ta ka xi nga fununguriwi, ni xilo xa xihundla, lexi nga ta ka xi nga tiviwi. ₃Hikokwalaho hinkwaswo leswi mi swi vuleke emunyameni, swi ta humela eku vonakaleni; ni leswi mi nga swi vulavula etindlwini hi ku hlevetela, swi ta huweleriwa eswihlungwaneni swa tona.

₄“Ndzi byela n'wina mi nga vanakulorhi ndzi ri: Mi nga tshuki mi chava lava dlayaka miri, va ri hava leswi va nga engetaka va swi endla ku tlula sweswo. ₅Ndzi ta mi komba loyi mi fanelaka ku chava yena; chavani loyi a nga ni matimba ya ku lovisa munhu, a n'wi hoxa eTiheleni. Ina, ndzi ri ka n'wina, yena yoloye, n'wi chaveni!

₆“Xana swidzingiri swa ntlhanu a swi xaviwi hi tisente timbirhi xana? Kasi a ku na xin'we xa swona lexi rivariweke emahlweni ka Xikwembu. ₇Hambi yi ri misisi ya tinhloko ta n'wina yi hlayiwile hinkwayo. Mi nga chaveni, mi tlula swindzingiri leswo tala hi nkoka.

₈“Ndza mi byela leswaku un'wana ni un'wana la ndzi vulaka emahlweni ka vanhu, N'wana-wa-Munhu na yena ú ta n'wi vula emahlweni ka tintsumi ta Xikwembu. ₉Kambe loyi a ndzi landzulaka emahlweni ka vanhu, ú ta landzuriwa emahlweni ka tintsumi ta Xikwembu.

₁₀“Un'wana ni un'wana la nga ta dyohela N'wana-wa-Munhu hi ku vulavula, ú ta rivaleriwa, kambe loyi a sandzaka Moya lowo Kwetsima a nga ka a nga rivaleriwi.

₁₁“Loko va mi yisa emasinagogeni, ni ka tindhuna, ni ka tihosi, mi nga tshuki mi vilela mi ku: ‘Xana hi ta tihlamulela hi mukhuva wihi?’ kumbe: ‘Hi ta vula yini ke?’ ₁₂hikuva Moya lowo Kwetsima wu ta mi dyondzisa hi nkarhi wolowo leswi mi fanelaka ku swi vula.”

₁₃Un'wana exikarhi ka ntshungu a ku ka Yesu: “Mudyondzisi, lerisa makwerhu leswaku hi avelana ndzhaka.” ₁₄Kambe Yesu a ku ka yena: “Munhu ndziwena! Xana i mani la nga ndzi veka muavanyisi kumbe muaveri ehenhla ka n'wina ke?” ₁₅Kutani a ku ka vona: “Tlharihani mi tivonela eka makwanga wahi ni wahi, hikuva vutomi bya munhu a byi humi eka swilo leswi a swi fuweke hambiloko swi n'wi talele ngopfu.”

₁₆Kutani a va byela xifaniso a ku: “Masimu ya munhu wa mufuwi a ma vekile ngopfu; ₁₇kutani a anakanya embilwini ya yena a ku: ‘Ndzi ta endla yini xana, hikuva a ndzi na laha ndzi nga hlengeletaka kona mavele ya mina?’ ₁₈Kutani a ku: ‘Ndzi ta endla leswi: Ndzi ta ntlhantlha switlati swa mina, ndzi swi kurisa, kutani ndzi ta hlengeleta mavele ya mina ni rifuwo ra mina hinkwaro kona; ₁₉kutani ndzi ta tibyela ndzi ku: Munhu wo kateka, u ni swilo leswo tala, leswi hlengeleteriweke malembe layo tala; wisa, u dya, u nwa, u tsaka.’ ₂₀Kambe Xikwembu xi ku ka yena: ‘Wee xihunguki! Hi vusiku byebyi, u ta tekeriwa moya wa wena; kutani leswi u swi lunghiseke swi ta va swa mani xana?’ ” ₂₁Yesu a heta hi ku vula a ku: “Swi tano ni ka loyi a tihlengeletelaka xuma, a nga fuweri Xikwembu.”

₂₂Kutani Yesu a ku ka vadyondzisiwa: “Hikokwalaho ndzi nge ka n'wina: Mi nga tshuki mi vilela hi swa vutomi bya n'wina leswaku mi ta dya yini, hambi ku ri ku vilela hi swa miri leswaku mi ta ambala yini. ₂₃Vutomi byi tlula swakudya, ni miri wu tlula swiambalo. ₂₄Anakanyani mawukuwuku: A ma byari, a ma tshoveri, a ma na ngula kumbe xitlati, hikuva Xikwembu xa ma phamela. Kutani n'wina, mi tlula ngopfu tinyanyana! ₂₅Xana i mani eka n'wina la nga engetelelaka nkarhinyana eka ntsengo wa malembe ya yena hi ku vilela ka yena xana? ₂₆Sweswi ke, loko mi tsandzeka ku endla xilonyana lexo tano, mi tivilerisela yini hi leswi swin'wana? ₂₇Langutani hilaha makhon'wa ma milaka hakona: a ma tirhi, a ma swuli; kambe ndza mi byela leswaku hambi a ri Solomoni evukosini bya yena hinkwabyo, a nga ambalanga tanihi rin'wana ra wona. ₂₈Kutani leswi Xikwembu xi ambexaka hi ndlela leyi byanyi lebyi nga kona namuntlha enhoveni, kasi mundzuku byi ta hoxiwa endzilweni, xana a xi nga mi ambexi ku tlurisa sweswo, n'wina vanhu va ku pfumela lokutsongo ke? ₂₉Hikokwalaho mi nga vileli hi leswi mi nga ta dya swona, ni leswi mi nga ta nwa swona, naswona, mi nga kanakani; ₃₀hikuva swilo sweswo hinkwaswo swi laviwa hi vamatiko; Tata wa n'wina wa swi tiva leswaku ma swi pfumala. ₃₁Ngopfu-ngopfu lavani Mfumo wa yena, kutani swilo leswi mi ta engeteleriwa swona.

₃₂“Mi nga chavi n'wina va ntlhambinyana, hikuva Tata wa n'wina ú tsakele ku mi nyika Mfumo. ₃₃Xavisani leswi mi swi fuweke, mi nyika swisiwana; tiendleleni minkwama leyi nga hlakariki ni xuma lexi nga heriki ematilweni, laha khamba ri nga tshineriki kusuhani na kona, ni laha tinsumba ti nga onhiki kona; ₃₄hikuva laha xuma xa n'wina xi nga kona, hi laha timbilu ta n'wina ti nga ta va kona na tona.

₃₅“Tshamani mi tikhamile, ni timboni ta n'wina a ti lumekiwe, ₃₆mi fana ni vanhu lava langutelaka n'wini wa vona, siku a vuyaka enkhubyeni wa vukati, leswaku loko a fika ni loko a gongondza, va ta hatlisa va n'wi pfulela. ₃₇Ku katekile malandza lawa n'wini wa wona a nga ta ma kuma ma hitekile, siku a vuyaka! Ndzi tiyisile ndzi ri ka n'wina: Ú ta tikhama, a ma tshamisisa eswakudyeni, a ma phamela. ₃₈Ni loko a fika ni vusiku enkarhini wa vumbirhi kumbe wa vunharhu, kutani a ma kuma ma hitekise xisweswo, malandza walawo ma ta va ma katekile. ₃₉Kambe tivani leswaku loko n'wini wa yindlu onge a tivile nkarhi lowu khamba ri nga ta ta ha wona, ingi a nga tshikanga yindlu ya yena yi tshoviwa. ₄₀Na n'wina, tshamani mi tilunghisile, hikuva N'wana-wa-Munhu ú ta ta hi nkarhi lowu mi nga wu ehleketiki.”

₄₁Kwalaho Petro a ku ka yena: “Hosi, xana u kongoma hina hi xifaniso lexi, kumbe xana u kongoma vanhu hinkwavo ke?” _42-43Yesu a hlamula a ku: “Xana mulanguteri lowo tshembeka wa vutlhari i mani xana? Hi loyi n'wini wa yena a nga ta n'wi kuma a ri karhi a hlayisa malandza laman'wana, a ma avela swakudya hi nkarhi wa kona, hikuva hi wona ntirho lowu a nyikiweke wona. Mulanguteri yoloyi ú ta va a katekile, siku n'wini wa yena a vuyaka. ₄₄Ndzi tiyisile ndzi ri ka n'wi n'wina: Ú ta vekiwa ku va mulanguteri wa swilo hinkwaswo swa n'wini wa yena. ₄₅Kambe loko nandza yoloye a ehleketa embilwini ya yena, a ku: ‘N'wini wa mina wa hlwela ku fika’, kutani a sungula ku ba malandza-kulobye ya xinuna ni ya xisati, a dya, a nwa, a pyopyiwa, ₄₆n'wini wa yena a nga tshuka a fika, hi siku leri nandza a nga n'wi langutelangiki ha rona, naswona hi nkarhi lowu a nga wu tiviki. Kutani n'wini wa nandza loyi ú ta n'wi ba swinene, a n'wi cukumeta kun'we ni lava nga tshembekangiki.

₄₇“Nandza loyi a tivaka ku rhandza ka n'wini wa yena, kutani a nga lunghisi nchumu, a nga endli ku rhandza ka n'wini wa yena loyi, ú ta biwa ngopfu; ₄₈kambe loyi a nga ku tiviki, kutani a tshuka a endlile leswi faneriwaka hi ku biwa, ú ta biwa kutsongo. Un'wana ni un'wana la nyikiweke leswo tala, ku ta laviwa leswo tala eka yena; ni loyi vanhu va n'wi fuyiseke leswo tala, ku ta laveka leswo tala ngopfu eka yena.

₄₉“Ndzi tile ku ta hoxa ndzilo laha misaveni, kutani a ndzi ta rhandza ngopfu leswaku wu pfurha ni sweswi! ₅₀Ndzi ni nkhuvulo lowu ndzi fanelaka ku khuvuriwa ha wona, kutani ndzi le ku karhatekeni lokukulu, ku kondza loko nkhuvulo lowu wu hetiseka. ₅₁Xana mi ehleketa leswaku ndzi tile ku ta nghenisa ku rhula la misaveni ke? E-e! Ndzi ri: Ku nga ri ku rhula kambe ku avana. ₅₂Hikuva ku sukela sweswi vanhu va ntlhanu va ndyangu wun'we va ta avana, vanharhu va ta lwa ni lavambirhi, lavambirhi va lwa ni lavanharhu.

₅₄Kutani a ku ka ntshungu: “Loko mi vona papa ri huma evupeladyambu, mi hatla mi ku: ‘Mpfula yi ta na!’ kutani swi va tano. ₅₅Ni loko moya wu hunga wu ta hi le dzongeni, mi ri: ‘Ku ta hisa!’ kutani swi va tano. ₅₆Vakanganyisi ndzin'wina! Mi tiva ku xiya xiyimo xa tilo ni xa misava; xana hikwalaho ka yini mi nga koti ku twisisa nkarhi lowu mi nga eka wona ke?

₅₇“Hikwalaho ka yini mi nga anakanyi leswi lulameke hi n'wexe xana? ₅₈Loko u ya ehosini ni loyi u tengisanaka na yena, ringeta hi matimba ku heta mhaka na yena ma ha ri endleleni; loko swi nga ri tano, ú ta ku yisa eka muavanyisi, muavanyisi yena a ku nyiketa eka phorisa, kutani phorisa ri ku nghenisa ekhotsweni. ₅₉Ndzi ri ka wena, u nga ka u nga humi kona, loko u nga si humesa mali hinkwayo u heta.”