Levhitika 7

₁“Nawu hi tlhelo ra magandzelo yo riha milandzu, ma nga lawa ya hlawulekeke ngopfu, hi lowu: ₂Xifuwo xa kona xi fanele ku tlhaveriwa endhawini leyi ku tlhaveriwaka eka yona xifuwo xa magandzelo lama hisiwaka, kutani ngati ya xona yi tirhisiwa ku xuva alitari matlhelo hinkwawo. ₃Mafurha ya xona hinkwawo ma fanele ku tsemiwa, wu nga ncila, ni mafurha lama khomaneke ni swa le ndzeni, ₄ni tinso hi timbirhi ka tona, ni mafurha ya kona; tinso leti ti fanele ku tsemiwa swin'we ni tlhelo lero saseka ra xivindzi. ₅Muprista ú ta hisa swilo leswi ehenhla ka alitari, a swi hisela HOSI Xikwembu; lawa i magandzelo yo riha milandzu. ₆Wanuna un'wana ni un'wana loyi a nga muprista a nga dya nyama ya xifuwo xa kona, yi dyeriwa exivandleni lexi hlawulekeke, hikuva yi hlawulekile ngopfu. ₇Nawu hi tlhelo ra magandzelo yo riha milandzu, wu fana ni wa mhamba yo susa swidyoho: Nyama ya xifuwo xa kona i ya muprista loyi a basisaka swidyoho ha xona.

₈“Loko munhu a humesa magandzelo lama hisiwaka, dzovo ra xifuwo xa kona ri ta va ra muprista loyi a fambiseke ntirho wa magandzelo. ₉Muprista loyi a fambisaka ntirho wa magandzelo ya swa le masin'wini, ú ta kuma leswi swekiweke kunene, kumbe leswi oxiweke kumbe leswi katingiweke. ₁₀Kasi mapa ya magandzelo ya swa le masin'wini, lama cheriweke mafurha kumbe lama nga cheriwangiki, ma ta va ya vaprista hinkwavo, va phakeriwa mimpimo leyi ringanaka.

₁₁“Nawu hi tlhelo ra magandzelo ya xinakulobye, lawa munhu a nga ma humeselaka HOSI Xikwembu, hi lowu: ₁₂Loko magandzelo lawa munhu wa kona a ma humesaka ma ri ya ku nkhensa Xikwembu, ú fanele ku tlhandlekela hi swimbhundzwa leswo-ke-comela leswi cheriweke mafurha, ni xinkwa lexo oma lexo-ke-comela lexi totiweke mafurha, ni swimbhundzwa swa mapa lamanene lama pfuviweke ni mafurha. ₁₃Tlhandlakambirhi, ú fanele ku ma humesa ni swimbhundzwa swin'wana leswi cheriweke comela. ₁₄Eka swinkwa leswi ni swimbhundzwa leswi, a a pambule xin'we-xin'we, yi va nyiko leyi humeseriwaka HOSI Xikwembu; leswi swi ta va swa muprista loyi a nga ta fambisa ntirho wo xuva hi ngati ya xifuwo xa magandzelo lawa ya xinakulobye. ₁₅Nyama ya magandzelo ya xinakulobye lawa munhu a nkhensaka Xikwembu ha wona, yi fanele ku dyiwa yi hela hi siku leri a ma humesaka ha rona; a nga tshuki a siya yin'wana ku kondza ku fika mpundzu wa siku leri tlhandlamaka. ₁₆Kambe loko magandzelo ya kona ma ri lawa a tiboheke hi ku hlambanya leswaku ú ta ma humesa, kumbe lawa a ngo ma humesa hi ku titwa, nyama ya xifuwo xa kona yi nga ha dyiwa siku leri a ma humesaka ha rona, kutani leyi salaka yi nga hetisiwa siku leri tlhandlamaka. ₁₇Kambe loko hi siku ra vunharhu ko tshuka ku va ni nyama leyi ya ha saleke, yona yi fanele ku hisiwa. ₁₈Loko nyama leyi nga ta va ya ha sele hi siku ra vunharhu, yo dyiwa, loyi a humesaka magandzelo ya kona ya xinakulobye a nge nkhensiwi, swi ta tekiwa wonge a nga humesanga nchumu; sweswo swa yila, loyi a dyaka nyama ya kona ú ta va a tivangele nandzu. ₁₉Nyama leyi khumbaneke ni swilo leswi nga tengangiki, yi nga tshuki yi dyiwa, a yi hisiwe!

“Vanhu hinkwavo lava tengeke, va nga dya nyama ₂₀ya magandzelo ya xinakulobye lama humeseriwaka HOSI Xikwembu, kambe munhu loyi a dyaka nyama leyi enkarhini lowu a nga tengangiki, ú fanele ku hlongoriwa a suka exikarhi ka va ka vona. ₂₁Munhu a nga tshuka a khumbana ni xilo lexi nga tengangiki; ku nga va thyaka ra vanhu, kumbe xiharhi lexi nga tengangiki, kumbe xilo xihi na xihi lexi yilaka hi ku ka xi nga tenganga; loko munhu wo tano o dya nyama ya xifuwo xa magandzelo ya xinakulobye lama humeseriwaka HOSI Xikwembu, ú fanele ku hlongoriwa a suka exikarhi ka va ka vona.”

₂₂HOSI Xikwembu xi byela Muxe ₂₃ku ya vulavula na Vaisraele, a ku ka vona: “Mi nga tshuki mi dya mafurha, ma nga va ya homu kumbe ya nyimpfu kumbe ya mbuti. ₂₄Hambi ma ri mafurha ya xifuwo lexi nga lo tifela hi xoxe, kumbe lexi dlayiweke hi swivandzana, mi nga tshuki mi dya, kambe mi nga endla swin'wana ha wona. ₂₅Munhu un'wana ni un'wana loyi a dyaka mafurha ya xifuwo lexi vanhu va nga xi tlhavaka va humesela HOSI Xikwembu magandzelo ha xona, ú fanele ku hlongoriwa a suka exikarhi ka va ka vona.

₂₆“Hinkwako lomu mi akeke kona, mi nga tshuki mi dya ngati ya tinyanyana kumbe ya swifuwo. ₂₇Un'wana ni un'wana loyi a dyaka ngati, yi nga va yihi kumbe yihi, ú fanele ku hlongoriwa a suka exikarhi ka va ka vona.”

₂₈HOSI Xikwembu xi byela Muxe ₂₉ku ya vulavula na Vaisraele, a ku ka vona: “Loko munhu a lava ku humesela HOSI Xikwembu magandzelo ya xinakulobye, ú fanele ku pambula swin'wana swa magandzelo lawa a ma humesaka, ₃₀a swi yisa eka HOSI Xikwembu hi voko ra yena, swi va swa magandzelo lama hisiwaka; ú ta yisa mafurha, a yisa ni xifuva lexi xi nga ta widzeriwa HOSI Xikwembu, xi va nyiko ya xona leyo hlawuleka. ₃₁Muprista ú ta hisa mafurha ya kona ehenhla ka alitari, kasi xifuva xi ta va xa Aroni ni vana va yena. ₃₂Nenge wa xinene wa xifuwo xa magandzelo ya xinakulobye wu ta nyikiwa muprista ₃₃loyi a nga ta fambisa ntirho wo xuva hi ngati ni wa ku hisa mafurha. Exikarhi ka vana va Aroni, hi yena loyi a nga ta kuma nenge lowu, wu va wa yena. ₃₄Xifuva xa nyiko leyo hlawuleka ni nenge lowu humesiwaka wu va nyiko, swi fanele ku va swa muprista Aroni ni vana va yena; swi ta pamburiwa eka magandzelo ya xinakulobye ya Vaisraele, hi ku landza nawu lowu wu nga ta va boha hilaha ku nga heriki. ₃₅Lexi i xiphemu xa Aroni ni vana va yena lexi pamburiwaka eka magandzelo lama hiseriwaka HOSI Xikwembu; va hlawuleriwile xona siku va vekiweke entirhweni wa vuprista leswaku va ta tirhela HOSI Xikwembu. ₃₆Esikwini leri ra ku cheriwa ka vona mafurha enhlokweni, HOSI Xikwembu xi lerisile leswaku Vaisraele va hamba va va nyika xiphemu lexi; vaprista va fanele ku nyikiwa xona hilaha ku nga heriki.”

₃₇Leyi hi yona milawu ya magandzelo lama hisiwaka, ni ya magandzelo ya swa le masin'wini, ni ya timhamba to susa swidyoho, ni ya magandzelo yo riha milandzu, ni ya magandzelo ya siku ra ku vekiwa ka vaprista, ni ya magandzelo ya xinakulobye. ₃₈Muxe ú nyikiwile yona hi HOSI Xikwembu entshaveni ya Sinayi, siku xi leriseke Vaisraele leswaku va xi humesela magandzelo, loko va ri emananga ya Sinayi.