Levhitika 18

₁HOSI Xikwembu xi byela Muxe ₂ku ya tivisa Vaisraele marito ya xona lama nge: “Hi mina HOSI Xikwembu xa n'wina. ₃Mi nga tshuki mi landza mahanyelo ya tiko ra Egipta leri a mi tshama eka rona, naswona mi nga tshuki mi tekela mahanyelo ya tiko ra Kanana leri ndzi mi yisaka eka rona. Mi nga tshuki mi hanya hi milawu ya vona. ₄Mi fanele ku landza swiletelo swa mina, mi hlayisa milawu ya mina, mi hanya ha yona. Hi mina HOSI, Xikwembu xa n'wina. ₅Ina, hlayisani milawu ya mina ni swiletelo swa mina, hikuva munhu loyi a endlaka sweswo, ú ta hanya. Hi mina HOSI!

₆“Ku nga tshuki ku va ni un'we wa ka n'wina loyi a yaka a ya etlela ni wansati loyi swi yilaka leswaku a hlangana na yena. Hi mina HOSI!

₇“U nga tshuki u khomisa tata wa wena tingana hi ku etlela ni mana wa wena; munhu loyi i mana wa wena, hikokwalaho u nga tshuki u etlela na yena. ₈Naswona, u nga tshuki u khomisa tata wa wena tingana hi ku etlela ni un'wana wa vasati va yena.

₉“U nga tshuki u etlela ni makwenu wa xisati; a nga va loyi mi mameke vele rin'we, kumbe loyi mi ngo hlangana eka tatana.

₁₀“U nga tshuki u etlela ni ntukulu wa wena wa xisati; a nga va n'wana wa n'wana wa wena wa xinuna, kumbe n'wana wa n'wana wa wena wa xisati; hikuva sweswo i ku tikhomisa tingana.

₁₁“U nga tshuki u etlela ni makwenu wa xisati, loyi mi hambaneke hi vamanana, kumbe loyi mi hlanganaka eka tatana, hikuva munhu loyi i makwenu.

₁₂“U nga tshuki u etlela ni makwavo wa xisati wa tata wa wena hikuva i hahani wa wena.

₁₃“U nga tshuki u etlela ni makwavo wa xisati wa mana wa wena, hikuva na yena i mana wa wena.

₁₄“U nga tshuki u khomisa makwavo wa tata wa wena tingana hi ku etlela ni nsati wa yena, hikuva wansati loyi i mana wa wena.

₁₅“U nga tshuki u etlela ni nsati wa n'wana wa wena, hikuva i n'wingi wa wena, hikokwalaho u nga tshuki u etlela na yena.

₁₆“U nga tshuki u khomisa makwenu tingana hi ku etlela ni nsati wa yena.

₁₇“Loko u etlela ni wansati, u nga tshuki u ya etlela ni n'wana wa wansati loyi, naswona u nga tshuki u teka ntukulu wa xisati wa wansati loyi; a nga va n'wana wa yena wa xinuna kumbe n'wana wa n'wana wa yena wa xisati, hikuva vanhu lava i maxaka ya wansati loyi; ku etlela na vona i vuphukuphuku lebyikulu.

₁₈“U nga tshuki u teka namu wa wena leswaku a ta va nhlantswa, nsati wa wena a ha hanya.

₁₉“U nga tshuki u ya etlela ni wansati loyi a nga masikwini ya yena ya n'hweti, hikuva a nga tenganga.

₂₀“U nga tshuki u tinyamisa hi ku ya etlela ni nsati wa muakelani.

₂₁“U nga tshuki u nyiketa n'wana wa wena leswaku a hiseriwa Moloko xikwembu xa Vaamoni; sweswo ku ta va ku ri ku nyamisa vito ra mina HOSI, Xikwembu xa wena.

₂₂“U nga tshuki u etlela ni wanuna wonge o va wansati; sweswo i manyala!

₂₃“U nga tshuki u tinyamisa hi ku etlela ni xifuwo xihi na xihi; hambi a ri wansati, a nga tshuki a ya etlela ni xifuwo; sweswo swa yila.

₂₄“Mi nga tshuki mi tinyamisa hi ku endla xin'wana xa swilo leswi; hi swona leswi nyamisaka vamatiko lava ndzi va hlongoleke va suka emahlweni ka n'wina; ₂₅hikokwalaho, na rona tiko ra vona ri nyamisiwile, kutani ndzi bile vaaki va rona hikwalaho ka swidyoho leswi, va hlongoriwa va huma etikweni. ₂₆Kutani n'wina mi fanele ku hlayisa milawu ni swiletelo swa mina, mi nga tshuki mi endla ni xin'we xa swilo leswi swa manyala; a nga va Muisraele kumbe munhu loyi a luveleke exikarhi ka n'wina, a nga tshuki a swi endla. ₂₇Vanhu lava a va akile laha tikweni leri mi nga si fika, a va endla swilo leswi hinkwaswo swa manyala, kutani va nyamisa tiko. ₂₈Loko na n'wina mo endla sweswo, mi nyamisa tiko leri; mi ta hlongoriwa mi humesiwa laha tikweni, ku fana ni lava va hlongoriweke, va huma eka rona. ₂₉Un'wana ni un'wana loyi a nga ta endla manyala lawa, ú ta hlongoriwa a suka exikarhi ka va ka vona. ₃₀Hikokwalaho, hlayisani leswi ndzi mi lerisaka swona, mi nga tshuki mi tekelela mikhuva ya manyala leyi a yi endliwa laha tikweni leri mi nga si fika; mi nga tshuki mi tinyamisa hi yona: Hi mina HOSI Xikwembu xa n'wina.”