Yoxuwa 20

₁Kutani HOSI Xikwembu xi ku ka Yoxuwa: ₂“Byela Vaisraele leswaku ndzi ri: Hlawulani miti yo tumbela eka yona, leyi ndzi tshameke ndzi rhuma Muxe a ta vulavula na n'wina ha yona. ₃Munhu loyi a tshukaka a dlayile un'wana, kambe ku nga ri havomu, ú ta tsutsuma a ya tumbela eka yona. Miti leyi, vadlayi va ta ya tumbela eka yona loko va chava ku dlayiwa hi varihiseli. ₄Mudlayi ú ta tsutsumela eka wun'wana wa miti leyi, a fika a yima enyangweni, a hlamusela mhaka ya yena eka vakulukumba; kutani va ta n'wi nghenisa emutini, va n'wi komba ndhawu ya yena leswaku a ta tshama na vona. ₅Loko murihiseli a n'wi landza, vakulukumba a va fanelanga ku nyiketa mudlayi emavokweni ya yena, hikuva ú ta va a nga dlayanga munhu-kulobye ha vomu, naswona a a nga ri nala wa yena. ₆Mudlayi ú ta tshama emutini wolowo ku kondza ku fika siku leri a nga ta ya yima emahlweni ka ntshungu a avanyisiwa. Loko munhu loyi a nga muprista lonkulu enkarhini wolowo a lova, mudlayi a nga ha tlhelela eka rikwavo, endyangwini wa yena, emutini lowu a nga suka eka wona.”

₇Kutani va hlawula muti wa Kedexe lowu nga Galeliya emagangeni ya Neftali, na muti wa Xikeme lowu wu nga emagangeni ya Efrayimi, na muti wa Kiriyata-Araba (hileswaku Hebroni) lowu wu nga emagangeni ya Yuda. ₈Entsungeni wa nambu wa Yordani, evuxeni bya Yeriko, va hlawula muti wa Beseri lowu wu nga emananga erivaleni, wu nga muti wa nyimba ya ka Rhuveni, ni muti wa Ramoto lowu wu nga eGiliyadi, wu nga wa nyimba ya ka Gadi, ni muti wa Golani lowu wu nga eBaxani, wu nga wa nyimba ya ka Manase. ₉Miti leyi, a yi hlawuleriwa Vaisraele hinkwavo, ni lava va luveleke exikarhi ka vona, leswaku munhu un'wana ni un'wana loyi a dlayaka un'wana, kambe ku nga ri havomu, a ta tsutsuma a ya tumbela eka yona, leswaku a ta ka a nga dlayiwi hi murihiseli a kondza a ya avanyisiwa hi ntshungu.