Yobo 7

₁“Laha misaveni, munhu ú rhwexiwa ntirho lowu a nga wu laviki,

vutomi bya yena byi fana ni bya muthoriwa.

₂Munhu i hlonga leri tshwaka hi mumu ri navela ndzhuti,

i mutirhi la langutelaka siku ra ku holeriwa.

₃Na mina, a ndza ha hanyeli nchumu,

vusiku ni nhlekanhi ndzi kombiwa maxangu lama nga riki na ku hela.

₄Loko ndzi etlele, ndzi ku: ‘Ri ta xa rini?’

kambe vusiku bya kona byi lehile ngopfu,

ndzi vumbuluka-vumbuluka vurhonga byi ko byi tshwuka.

₅Miri wa mina wu tele thyaka ni swivungu,

swilondza swa mina swi handzuka swi humesa vuvopfu.

₆Masiku ya mina ma tsutsuma kukota nereta ya murhungi,

ngoti ya kona yi hatla yi hela.

₇“Wena Xikwembu, wa swi tiva, vutomi bya mina i hikanyana ntsena;

a ndzi nga ha tlheli ndzi vona minkateko.

₈Wena mulanguteri wanga, a wu nga ha ndzi voni,

u ta ndzi lava hi mahlo, kambe ndzi ta va ndzi fambile.

₉Munhu la rhelelaka a ya exivandleni xa vafi, a nga ha vuyi,

ú fana ni papa leri hundzaka ri nyamalala;

₁₀mufi a nga ha vuyi endlwini ya yena,

varikwavo a va ha n'wi tivi.

₁₁“E-e, a ndza ha koti ku miyela,

mbilu ya mina ya vava, ndzi vaviseka emoyeni,

hikokwalaho ndzi ta vulavula, ndzi phofula.

₁₂Leswi u pfalaka tindlela ta mina matlhelo hinkwawo,

xana ndzo va lwandle kumbe nyoka ya mati ke?

₁₃Loko ndzi ringeta ku tilata ndzi wisanyana,

ndzi rivala maxangu evurhongweni,

₁₄wena u ndzi rhumela milorho yo chavisa,

u ndzi vangela nkelunkelu hi swivono swo karhata.

₁₅A swi ta antswa loko ndzi tihinga ndzi fa,

ku ri ni ku sala marhambu hi ndlela leyi.

₁₆Vutomi a bya ha ndzi tsakisi, ndzi karhele ku hanya;

we Xikwembu, ndzi tshike, hikuva masiku ya mina ma hela.

₁₇Xana munhu wa nyama o va yini, leswaku u tikarhatela yena xana?

Ku n'wi anakanya hi ndlela leyi, a swi pfuni nchumu!

₁₈Hikwalaho ka yini u n'wi sala ndzhaku masiku hinkwawo,

ni ku n'wi kambela nkarhi wihi na wihi, ke?

₁₉U ta ndzi honokela ku fikela rini?

Ndzi tshike ndzi mita marha!

₂₀Ndza swi tiva, ndzi mudyohi,

kambe a ndzi dyoheli wena,

we mukamberi wa vanhu.

Xana u ndzi copela yini hi miseve ya wena,

ndzi ku tikela ha yini xana?

₂₁U alela yini ku ndzi rivalela swidyoho, ni ku susa milandzu ya mina,

leswi ndzi nga kusuhi ni ku latiwa esirheni ke?

U nge he ndzi kumi, loko u ndzi lava,

hikuva ndzi ta va ndzi nga ha ri kona.”