Yobo 5

₁“We Yobo, khongela, kumbexana u ta hlamuriwa.

Xana a ku na ntsumi leyi yi nga ku pfunaka xana?

₂Xiphunta xi fa hi mbitsi,

mavondzo ma dlaya munhu wo kala mehleketo.

₃Ndzi vonile xiphukuphuku xi dzima timitsu,

kambe ku nga ri khale, ndzi rhuketele muti wa xona.

₄Vana va xona a va hlayisekanga,

loko va tengisiwa ehubyeni, a va sirheleriwi hi munhu.

₅Vanhu va ndlala va xi tekela swakudya,

hambiloko xi swi biyelela hi mitwa;

lava nga ni makungu ya ku yiva,

va navela ku phangha rifuwo ra xona.

₆Makhombo ya xona a mo humelela ntsena-ntsena,

maxangu ma ni xivangelo xa wona.

₇Munhu ú lo velekeriwa ku xaniseka,

kukotisa nhlahle leyi fanelaka ku baleka ndzilweni.”

“Loko mina a ndzo va wena, a ndzi ta khongela Xikwembu,

ndzi boxa mhaka ya mina emahlweni ka xona.

₉Xona xi endla swilo leswikulu swo hlamarisa,

masingita ya xona i ntsandza-vahlayi.

₁₀Hi xona xi nisaka mpfula emisaveni,

xi khulukisa ni milambu ematikweni.

₁₁Xi kutsula lava xanisiwaka,

lava rilaka, xa va chavelela.

₁₂Hi xona xi onhaka makungu ya lavo tlharihela tlhelo,

va nga humeleli eka leswi va swi endlaka.

₁₃Vakanganyisi, xi va phasa hi mano ya vona,

xi hatla xi hangalasa marhengu ya vona.

₁₄Dyambu ri va pelela ka ha ri nhlekanhi,

va gugurhuteka onge i vusiku.

₁₅I Xikwembu lexi ponisaka vapfumari,

xi sirhelela lava lumbetiwaka hi swifumi.

₁₆Hikokwalaho xisiwana xi nyikiwa ku tshemba,

kambe lavo homboloka va pfariwa milomo.

₁₇“Ku katekile munhu loyi Xikwembu xi n'wi tshinyaka,

hikokwalaho u nga ali ku xupuriwa hi xona,

xona Xikwembu-xa-matimba-hinkwawo.

₁₈Loko xi boxa munhu timbanga xi tlhela xi bohelela,

lava xi va baka, xi tlhela xi va horisa.

₁₉Hambiloko u nga wela hi makhombo layo tala ku tlula mpimo,

xi ta ku ponisa eka wona, leswo biha a swi nga ku tshineleli.

₂₀Etindlaleni, a xi nga ku tshiki u fa,

xi ta bakanya matlhari ya valala etinyimpini.

₂₁Siku vanhu va lavaka ku ku tlhava hi marito, xi ta va xi ku tumbetile;

hambiloko tiko ri hlaseriwa, a wu nga chavi nchumu.

₂₂Etindlaleni ni le makhombyeni, u ta tshama u tsakile,

swiharhi swa nhova swi nga ku chavisi.

₂₃Wena ni maribye ya nhova, mi ta twanana,

hambi swi ri swiharhi leswo leva, u ta hanyisana na swona hi ku rhula.

₂₄Emutini wa wena, u ta va u tshamisekile,

loko u ya kamba swifuwo swa wena emadyelweni, u ta swi kuma swi ri kona hinkwaswo.

₂₅U ta va ni vana lavo tala, u va tiva hinkwavo,

vatukulu va wena va ta andza kukota byanyi bya nhova.

₂₆U ta ya eku feni u dyuharile,

u fana ni mavele lama tshoveriwaka ma vupfile.

₂₇Yingisa! Timhaka leti, hi ti kambisisile, to va tona;

tiva leswaku hi wona ntiyiso, wu hlayise!”