Yobo 34

₂“Ndzi yingiseni, n'wina mi tlhariheke,

rhiyani tindleve, leswi mi nga ni vutivi.

₃Swakudya swi nantswiwa hi nomo,

marito ma hleriwa hi tindleve:

₄A hi hlawuleni lama lulameke,

hi hatla hi vona lama nga manene.

₅Yobo ú vulavurile a ku: ‘Ndzi munhu wo lulama,

kambe Xikwembu xi ala ku ndzi lwela.

₆Emhakeni ya mina, xi fihla ntiyiso,

xi ndzi pfatlanya xilondza, ndzi nga ri mudyohi!’

₇Ku hava wanuna wo kota Yobo:

Ú fundza mindzhukano enon'weni, onge yo va mati.

₈Ú tala ku longoloka ni vadyohi,

a rhendzeleka-rhendzeleka ni lavo homboloka.

₉Hi yena Yobo la nga te: ‘Munhu la tsakelaka Xikwembu,

a nge vuyeriwi hi nchumu!’

₁₀“Hikokwalaho, ndzi yingiseni n'wina vanhu va miehleketo:

Xikwembu xi nge pfuki xi endle swo biha,

Lowa-matimba-hinkwawo a nge dyohi ni siku ni rin'we.

₁₁Loko Xikwembu xi ba munhu, xi n'wi bela mintirho ya yena,

xi n'wi avela leswi a nga lo tilavela hi swiendlo swakwe.

₁₂Xikwembu xi nge pfuki xi endlile swo biha,

Lowa-matimba-hinkwawo a nge tluli nawu ni siku ni rin'we.

₁₃Xana i mani la vekeke misava emavokweni ya Xikwembu xana?

Xi lerisiwe hi mani ku hlayisa ntumbuluko ke?

₁₄Loko a xo tihanyela xi ri xoxe,

ni loko xi tekela swivumbiwa emoya lowu xi nga wu huhutela eka swona,

₁₅a swi ta hatla swi lova hinkwaswo,

vanhu va tlhelela entshurini wa misava.

₁₆“Wena Yobo, loko u ri ni ku twisisa, rhiya ndleve,

u twa leswi ndzi vulaka swona.

₁₇Loko hakunene Xikwembu xi venga milawu, xi nga fumisa ku yini;

leswi xi lulameke xi nga ni matimba, u nga xi vekisa ku yini enandzu ke?

₁₈Xi tshinya tihosi xi ku: ‘A mi pfuni nchumu!’

Eka vachaviseki, xi ku: ‘N'wina mi vadyohi!’

₁₉A xi yimeleli lavakulu

kumbe ku amukela vafumi xi ri karhi xi tshika vapfumari,

hikuva hinkwavo i swivumbiwa swa xona.

₂₀Hi ku copeta ka tihlo, va timeka nivusiku,

tiko ra vona ri va hundzukela, va tsutsuma;

lava fumaka hi tihanyi, Xikwembu xi va susa hi xoxe.

₂₁Hakunene xi kambisisa mahanyelo ya vanhu,

xi vona ni mikhuva ya vona hinkwayo.

₂₂Ku hava munyama, hambi wu ri wo chavisa,

lowu vadyohi va nga tumbelaka eka wona.

₂₃“Xikwembu xi nge vekeriwi nkarhi

wo yisa munhu eku avanyisiweni.

₂₄Lava matimba, xi va herisa xi nga tsundzuxiwanga hi munhu,

xi veka van'wana, va sala va fuma.

₂₅Leswi xi voneke mintirho ya vona,

xi va susa hi vusiku byin'we, va tshoveleleka;

₂₆xi va makala hi mpama kukota vadyohi,

vanhu hinkwavo va ri karhi va swi vona,

₂₇hikuva va xi fularhele,

va hambuka etindleleni ta xona hinkwato.

₂₈Swisiwana leswi va swi xaniseke swi huwelerile,

Xikwembu xi twile xirilo xa lava tsongahatiweke.

₂₉“Loko Xikwembu xi hlawula ku miyela,

i mani la nga xi vekaka nandzu hi mhaka ya swona ke;

ni loko xi tifihla, xi nga sindzisiwa hi mani ku vonaka ke?

Ehenhla ka tiko ro karhi ni vanhu va rona,

₃₀xi nga veka musandzi evuhosini,

loyi a rhiyelaka varikwavo emintlhamu.

₃₁Kambe loko a ku ka Xikwembu: ‘Ndza hlambanya,

leswaku a ndzi nga ha dyohi,

₃₂ndzi kombe leswi a swi ndzi tumbelela;

loko ndzi onhile, a ndzi nga ha engeti!’

₃₃Xana Xikwembu xi nge n'wi rivaleli xana? U ri yini wena mukaneti?

Hi wena u fanelaka ku hlawula, ku nga ri mina,

u boxa leswi u swi tivaka.

₃₄“Vanhu va miehleketo, vona lava tlhariheke,

loko va ndzi twa, va ta ku ka mina:

₃₅‘Yobo ú vula leswi a nga swi tiviki,

marito ya yena a hi ya loyi a twisisaka timhaka.’

₃₆Ingi Yobo a nga kamberiwa mhaka ya yena yi ko yi hela,

hikuva ú hlamula kukota lavo homboloka.

₃₇Ú tlhandlekela xidyoho ehenhla ka xin'wana,

ú tsakela swona ntsena exikarhi ka hina,

a ri karhi a tata marito yo sandza Xikwembu.”