Yobo 21

₂“Loko mi yingisa swinene leswi ndzi swi vulaka,

hi kona mi nga ta va vachaveleri va mina.

₃Ndzi lehiseleni mbilu, ndza ha ri na rito;

loko ndzi hetile, mi nga ha ya emahlweni mi ndzi hlekula!

₄A ndzi vileli hi maendlele ya loyi a nga munhu ntsena;

hikokwalaho a swi hlamarisi loko ndzi hela mbilu.

₅Ndzi languteni, ndzi ta mi tshukisa namuntlha,

mi tlhela mi tisiva ni milomu hi ku chava.

₆Hambi mina, loko ndzi anakanya mhaka ya kona,

ndza chava, ndzi rhurhumela.

₇“Hikwalaho ka yini lavo homboloka va hanya,

va tshama va tiyile va ko va dyuhala ke?

₈Va tshama ni vana va vona endhawini yin'we,

va vona ni vatukulu va vona.

₉Va titshamela hi ku rhula etindlwini ta vona,

a hi vona va biwaka hi Xikwembu.

₁₀Swifuwo swa vona swa andza minkarhi hinkwayo,

mathokazi ya vona ma veleka ma nga fisi.

₁₁Vana va vona ni vatukulu, va va tshika va tihuhela,

va cina va tsakile, va tlula-tlula kukota swimbutana.

₁₂Va yimbelela va ri karhi va chaya swingomana ni switende,

va ba ni tinanga va tsakile ngopfu,

₁₃Vutomi bya vona hinkwabyo, va hanya emafurheni,

va rhelela va ya esirheni va nga karhatekanga.

₁₄Va tala ku vula va ku: ‘We Xikwembu, suka la ka hina,

a hi lavi ku tiva nchumu hi tindlela ta wena.

₁₅Xana ha boheka ku tirhela Xikwembu-xa-matimba-hinkwawo ke?

Ku huwelela eka xona, swi hi pfuna yini xana?’

₁₆Lavo homboloka va ri, minkateko ya vona va lo tilavela yona,

makungu ya vona ma le kule na Xikwembu.

₁₇“Lavo homboloka a va tali ku tekeriwa ku vonakala,

kumbe ku humeleriwa hi makhombo;

a va tali ku weriwa hi vukari bya Xikwembu.

₁₈A hi kangani va tlakuriwa hi moya wa xidzedze;

a va hahisiwi kukota mungu kumbe mavivi.

₁₉N'wina mi ri, Xikwembu xi tshika lavo homboloka, xi ba vana va vona!

Hikwalaho ka yini xi nga bi vona vinyi ke?

₂₀A va herisiwe va ri karhi va swi vona,

va twisisa vukari bya Lowa-matimba-hinkwawo.

₂₁Loko masiku ya ku hanya ka vona ma ta va ma herile,

ku biwa ka vana va vona a swi nga ha va khumbi.

₂₂“Xana i mani la nga dyondzisaka Xikwembu,

leswi xona xi avanyisaka ni lava matimba, xana?

₂₃“Vanhu van'wana va lova va ha tiyile,

va hundza emisaveni va nga xanisekanga.

₂₄Va fa ni mafurha ya vona,

marhambu ya vona ma ha tsakama.

₂₅Van'wana va dlawa hi xiviti,

va lova va nga vonanga minkateko.

₂₆Kambe hinkwavo va etlerisiwa esirheni,

va funengetiwa hi swivungu.

₂₇“Ndzi tiva miehleketo ya n'wina,

makungu ya n'wina i ku ndzi lumbeta,

₂₈hikuva mi ri: ‘Yi kwihi yindlu ya nganakana,

ntsonga wa lowo homboloka wu kwihi xana?’

₂₉Xana vahundzi va ndlela mi va vutisile,

mi kambisisile vumbhoni bya vona xana?

₃₀Va ri, munhu wo homboloka wa pona emakhombyeni,

siku Xikwembu xi hlundzukaka, yena wa tsetseleriwa.

₃₁Munhu wo tano, a nga kanetiwa hi mani,

i mani la nga n'wi tshinyaka emintirhweni ya yena xana?

₃₂Siku lowo homboloka a yaka eku lahliweni,

ku ni lava rindzaka sirha ra yena;

₃₃ú landzeleriwa hi vanhu lavo tala,

emahlweni ku rhangile ntshungu lowukulu;

loko va seleterile, misava ya kona a yi n'wi tikeli.

₃₄Marito ya n'wina yo vevuka ma nge ndzi chaveleri,

leswi mi ndzi hlamurisaka swona i vuxisi ntsena.”