Yobo 19

₂“Xana mi ta tshika rini ku ndzi karhata,

mi ta ndzi tlhava hi marito ku fikela rini?

₃Mo tshamela ku ndzi rhuketela!

Xana a mi na tingana ku ndzi veka nandzu xana?

₄Hambiloko a ndzo va ni xihoxo,

a xi ta tiva hi mina ntsena.

₅Hakunene, loko mi lwa na mina, ma tikurisa;

ku vaviseka ka mina, mi ri ndzi lo tivangela!

₆Kambe swi tiveni: I Xikwembu xi ndzi vangelaka khombo leri,

xi ndzi khubumetile hi ritavala ra xona.

₇“Ndzi ba nkalanga ndzi ri: ‘Ndza xanisekoo!’ kambe a ndzi hlamuriwi;

ndzi huwelela hi matimba, kambe a ndzi lweriwi hi munhu.

₈Xikwembu xi hingakanyile ndlela ya mina,

xi yi funengetile hi xinyami, ndzi nga ha koti ku hundza.

₉Xi ndzi susele ndzhuti,

xi ndzi tekela ni ku xiximeka.

₁₀Xi le ku ndzi fayeni ku fana ni khumbi ndzi ko ndzi hela,

xi tsuvula ku tshemba ka mina tanihi murhi.

₁₁Xi pfurhisa vukari bya xona ehenhla ka mina,

onge ndzo va nala eka xona.

₁₂Tinhenha ta xona ta hlengeletana,

ti khoma ndlela ku ta ndzi hlasela,

ti fika ti rhendzela muti wa mina.

₁₃“Xikwembu xi ndzi hambanisile ni varikwerhu,

va ka hina va ndzi fularhele.

₁₄Maxaka ni vanghana va mina va ndzi tshikile,

₁₅lava a va ri vaendzi laha ka mina, va ndzi rivele.

Malandza ya mina ya xisati ma ndzi vula muluveri,

ndzi hundzukile xi-ta-xi-famba emahlweni ka wona.

₁₆Loko ndzi vitana hlonga, a ri hlamuri,

hambi ndzi ri khongela kunene!

₁₇Loko ndzi hefemula, ndzi nun'hweta nsati wa mina,

va ka hina, ndzi va hlambisa timbilu.

₁₈Hambi va ri vana lavatsongo va ndzi sandza,

va ndzi hlekula loko ndzi ringeta ku pfuka.

₁₉Vanghana va mina hinkwavo va ndzi hundzukele,

ndzi tshikiwa hi lava a va ndzi rhandza khale.

₂₀Ndzi lo sala marhambu ntsena,

ni meno ya mina ma gulekile hinkwawo.

₂₁“N'wina vanakulorhi, ndzi tweleni vusiwana, ndzi ri, ndzi tweleni vusiwana,

hikuva Xikwembu xi ndzi bile.

₂₂Leswi Xikwembu xi ndzi salaka ndzhaku, ndzi tshikeni,

ma ha ndzi xanisela yini ke?

₂₃“Mawaku loko marito ya mina ma nga tsariwa,

loko ma nga mpfampfarhutiwa kunene etsalweni ra koporo,

₂₄mawaku loko ma nga kovotliwa eribyeni hi peni ya nsimbhi,

maletere ma cheriwa ntsopfu ma nga ha suki!

₂₅“Kambe ndza swi tiva leswaku Mulweri wa mina wa hanya,

eku heteleleni, hi yena la nga ta sala a yimile laha misaveni.

₂₆Loko vuvabyi lebyi byi ta va byi ndzi hete nhlonge,

ndza ha ta va munhu, ndzi vona Xikwembu.

₂₇Ndzi ta xi vona hi ya mina mahlo,

mina hi ndzexe, ku nga ri un'wana!

Ndzi langutela nkarhi lowu hi mahlo-ngati.

₂₈Loko mi vula leswaku mi lava ku engeta mi ndzi xanisa,

mi ko mi kuma xivangelo xa khombo leri ra mina,

₂₉mi fanele ku chava fumu,

hikuva ku hlundzuka ku vanga ku biwa hi fumu,

kutani mi ta tiva leswaku Muavanyisi, ú kona!”