Yobo 13

₁“Leswi hinkwaswo, ndzi swi vonile hi mahlo,

ndzi swi twile hi tindleve ta mina.

₂Leswi mi swi tivaka, na mina ndza swi tiva,

a mi ndzi tluli hi nchumu.

₃Kambe mina ndzi lava ntsena ku ya vulavula na Xikwembu-xa-matimba-hinkwawo,

ndzi navela ngopfu ku xi andlalela mhaka ya mina.

₄N'wina mo tlhandleka mavunwa ehenhla ka mavunwa,

vun'anga bya n'wina hinkwenu i bya hava.

₅Loko a mi lo kota ku miyela,

a ma ha ta voniwa mi ri tintlhari.

₆“Yingisani ndzi mi byela miehleketo ya mina,

ndzi lombeni tindleve, ndzi mi hlamula,

₇Xana mi nga tirhela Xikwembu hi mavunwa xana?

Mi nga xisa vanhu hi vito ra xona ke?

₈Xana mi lava ku yimelela Xikwembu xana?

Mhaka ya xona, mi nga kota ku yi seketela ke?

₉Loko Xikwembu xo mi kambisisa, mi nga pona ke,

mi nga xi kanganyisa kukota munhu xana?

₁₀Hakunene Xikwembu xi ta mi tshinya,

loko mi ndzi lumbeta, hambi ku ri exihundleni.

₁₁Vukulukumba bya xona byi ta mi chavisa,

mi ta rhurhumela emahlweni ka xona.

₁₂Swivuriso leswi mi swi tirhisaka a swi pfuni nchumu,

makhokholo ya n'wina i ndzhope ntsena!

₁₃“Miyelani, mi ndzi tshika ndzi vulavula,

a ndzi na mhaka ni leswaku ku ta humelela yini.

₁₄Hikokwalaho ndzi tilulamiserile ku fa,

ku hlayisa vutomi bya mina a ndza ha swi lavi.

₁₅Xikwembu xi nga ndzi dlaya, ndza swi tiva,

kambe ndzi ta xi andlalela mhaka ya mina.

₁₆Hi ku endla sweswo, kumbexana ndzi nga pona,

hikuva la lwaka ni Xikwembu a nge yimi emahlweni ka xona.

₁₇Marito ya mina, ma yingiseni swinene

mi twa xirilo xa mina.

₁₈Ndzi tiyimiserile ku hlamusela mhaka ya mina;

ndza swi tiva leswaku ndzi ta khana.

₁₉I mani loyi a nga lavaka ku phikisana na mina,

leswi ndzi nga kusuhi ni ku lova ndzi miyela ke?

₂₀“Wena Xikwembu, ndzi endlele swilo swimbirhi,

kutani a ndzi nga ha ku tumbeleli.

₂₁Swona hi leswi: Tshika ku ndzi ba,

naswona u nga ha ndzi chavisi.

₂₂Ndzi vitane, mina ndzi ta hlamula;

ndzi pfumelele ku vulavula na wena, kutani u ndzi hlamula na wena.

₂₃Xana swihoxo ni swidyoho swa mina i swingani ke?

Ndzi kombe leswi ndzi ku dyoheleke ha swona.

₂₄Hikwalaho ka yini u ndzi fularhela,

u ndzi fanisa ni nala wa wena xana?

₂₅Xana u lava ku chavisa tluka leri hahaka,

u landzelela mavivi lama omeke xana?

₂₆U ndzi veke nandzu wo bava ngopfu,

u ndzi bela ni swidyoho swa vuntshwa bya mina.

₂₇U ndzi bohile milenge, u ndzi sala ndzhaku,

u xiyaxiya lomu ndzi yaka kona.

₂₈Kasi ndzi munhu la tibolelaka,

ndzi fana ni xiambalo xo dyiwa hi nsumbha.”