Yobo 10

₁“Ndzi karhele ku hanya;

hikokwalaho ndzi lava ku boxa leswi swi ndzi vilerisaka,

ndzi phofula leswi nga mbilwini ya mina.

₂Wena Xikwembu, ndzi ri, u nga ndzi veki nandzu,

kambe ndzi kombe leswi ndzi ku dyoheleke swona.

₃Xana eka wena i mhaka yo saseka loko u ndzi tshikelela, u sola ntirho wa mavoko ya wena,

u ri karhi u katekisa makungu ya lavo homboloka xana?

₄“Xana u languta swilo hi mahlo ya nyama,

u swi vona hilaha vanhu va swi vonaka hakona xana?

₅Xana nkarhi wa wena wa ku hanya wu lo koma,

wu fana ni masiku kumbe malembe ya munhu xana?

₆Hikwalaho ka yini u handza-handza,

u hlota swidyoho ni swihoxo swa mina, xana?

₇Wa swi tiva leswaku mina a ndzi dyohanga nchumu,

kambe ku hava loyi a nga ndzi lamulelaka emavokweni ya wena!

₈Hi wena u vumbeke swirho swa mina hinkwaswo loko u ndzi tumbuluxa,

kambe sweswi wa ndzi dlaya!

₉Tsundzuka leswaku u ndzi endlile hi vumba ntsena;

xana u lava leswaku ndzi tlhelela entshurini xana?

₁₀U ndzi vumbile ekhwirini ra manana,

kukotisa ntswamba loko wu kamiwa wu endla rivomba.

₁₁U ndzi funengetile hi nyama ni nhlonge,

u hlanganisa marhambu ya mina, u ma luka hi misiha.

₁₂U ndzi hanyisile hi rirhandzu ro tshembeka,

u sirhelela vutomi bya mina.

₁₃Kambe ndza swi tiva: Exihundleni xa mbilu ya wena,

u ni makungu ya ku ndzi xanisa:

₁₄Loko ndzi dyoha, u hatla u swi vona,

u ala ni ku ndzi rivalela.

₁₅Siku ndzi dyohaka, ndzi le khombyeni,

kambe loko ndzi endla leswinene, ndzi tsandzeka ku tlakusa nhloko,

hikuva ndzi tshikeleriwa hi mahlomulo,

ndzi vona maxangu ntsena.

₁₆Loko ndzi tipfuxa hi ndzexe, wena u ndzi hlota onge wo va nghala,

u ndzi hlasela hi ndlela yo hlamarisa.

₁₇U vitana timbhoni letintshwa ti ta ndzi lumbeta,

u engetelela ku ndzi hlundzukela,

kutani makhombo ma ndzi wela hi ku khatakanya.

₁₈“U ndzi humesele yini ekhwirini ra manana?

Ingi ndzi lo fa ndzi nga si voniwa hi munhu!

₁₉A ndzi ta fana ni loyi a nga kombiwangiki misava,

a ndzi ta va ndzi yisiwile esirheni siku ndzi velekiweke.

₂₀Masiku ya mina ya ku hanya ma komile ngopfu;

ndzi tshike u hambana na mina, ndzi ta wisanyana,

₂₁ndzi nga si rhelela ndzi ya exivandleni xa vafi, laha ndzi nga ta ka ndzi nga ha vuyi,

ndzi nga si nghena etikweni ra xinyami xo chavisa,

₂₂laha ku nga lo khwíxíí vusiku ni nhlekanhi,

exinyamini xa mpfilumpfilu lowukulu!”