Yohane 4

₁Vafarisi a va twile mahungu ya vanhu lava nge: “Yesu ú tlula Yohane hi ku kuma vadyondzisiwa ni ku khuvula.” ₂(Hambileswi a a nga ri yena Yesu hi xiviri loyi a a khuvula, kambe a ku khuvula vadyondzisiwa va yena.) ₃Loko Yesu a twile sweswo, a suka eYudiya, a tlhelela eGaleliya. ₄A a fanele ku tsemakanya hi le tikweni ra Samariya. ₅Kutani a fika emutini lowu a va ku i Sikari, kwale Samariya, kusuhi ni nsimu leyi Yakobo a a nyikile Yosefa, n'wana wa yena. ₆Xihlovo xa Yakobo a xi ri kona kwalaho. Leswi Yesu a a karhele hi ku famba, a ya wisa eka xona. A wu lava ku va nkarhi wa nhlekanhi.

₇Kutani ku ta fika wansati wa Musamariya a ta eku keni ka mati. Yesu a ku ka yena: “Ndzi nyike mati ndzi nwa.” ₈Vadyondzisiwa va yena vona a va yile emutini ku ya xava swakudya. ₉Wansati wa Musamariya a ku ka yena: “Leswi wena u nga Muyuda, u komberisa ku yini mati eka mina ndzi nga wansati wa Musamariya xana?” (Mhaka hileswaku Vayuda ni Vasamariya a va nga fambelani.) ₁₀Yesu a n'wi hlamula, a ku: “Loko onge u tivile leswi Xikwembu xi nyikaka swona, ni loyi a vulavulaka na wena a ku: ‘Ndzi nyike mati ndzi nwa’, a wu ta va u komberile eka yena, kutani a a ta va a ku nyikile mati lama hanyaka.” ₁₁Wansati a ku ka yena: “Hosi, a wu na xikelelo, ni xihlovo xi entile; mati lama hanyaka, u nga ma kuma kwihi xana? ₁₂Xana u lonkulu eka Yakobo tata wa hina, la hi nyikeke xihlovo lexi, lexi na yena a nga nwa ka xona, yena ni vana va yena ni swifuwo swa yena ke?” ₁₃Yesu a n'wi hlamula, a ku: “Un'wana ni un'wana la nwaka mati lawa, ú ta tlhela a twa torha. ₁₄Kambe un'wana ni un'wana la nwaka mati lawa ndzi nga ta n'wi nyika wona, a nga ka a nga ha tlheli a twa torha ni siku ni rin'we; kambe mati lawa ndzi nga ta n'wi nyika wona, ma ta va eka yena xihlovo xa mati lama pfelelaka, ku yisa evutomini lebyi nga heriki.” ₁₅Wansati a ku ka yena: “Hosi, ndzi nyike mati wolawo, ndzi ta ka ndzi nga ha twi torha, ndzi nga ha tlheli ndzi ta eku keni kwala.”

₁₆Yesu a ku ka yena: “Famba, u ya vitana nuna wa wena, mi ta haleno.” ₁₇Wansati a n'wi hlamula, a ku: “A ndzi na nuna.” Yesu a ku ka yena: “Wa vurisa loko u ku, a wu na nuna, ₁₈hikuva u vile ni vanuna va ntlhanu, kutani loyi u nga na yena sweswi, a hi nuna wa wena; kwalaho u tiyisile.” ₁₉Wansati a ku ka yena: “Hosi, ndza swi vona leswaku u muprofeta. ₂₀Vatata wa hina va gandzerile entshaveni leyi; kutani n'wina mi ri: ‘Ndhawu leyi vanhu va fanelaka ku gandzelela eka yona, hi le Yerusalema.’ ” ₂₁Yesu a ku ka yena: “Twana mina manana: Nkarhi wa ta, lowu mi nga ta ka mi nga ha gandzeri Tatana mi ri entshaveni leyi, hambi ku ri eYerusalema. ₂₂N'wina mi gandzela lexi mi nga xi tiviki; hina hi gandzela lexi hi xi tivaka; hikuva ku ponisiwa ku huma eka Vayuda. ₂₃Kambe nkarhi wa ta, ni sweswi wu tile, lowu vagandzeri va xiviri va nga ta gandzela Tatana hi moya ni ntiyiso, hikuva Tatana ú lava vagandzeri lavo tano. ₂₄Xikwembu i moya; kutani lava xi gandzelaka, va fanele ku xi gandzela hi moya ni ntiyiso.” ₂₅Wansati a ku ka yena: “Ndza swi tiva leswaku Mesiya, loyi a vuriwaka Kriste, wa ta; siku a taka, ú ta hi tivisa swilo hinkwaswo.” ₂₆Yesu a ku ka yena: “Ndzi yena, mina ndzi vulavulaka na wena.”

₂₇Enkarhinyana wolowo vadyondzisiwa va Yesu va ta fika, kutani va hlamala hileswi a vulavulaka ni wansati; hambiswiritano, a ku vanga na un'we la nga te: “U lava yini?” kumbe: “U vulavulela yini na yena ke?” ₂₈Kutani wansati a siya khuwana ra yena, a ya emutini, a ya byela vanhu, a ku: ₂₉“Tanani, mi ta vona munhu loyi a nga ndzi byela hinkwaswo leswi ndzi tshamaka ndzi swi endla; xana a nga ka a nga vi yena Mesiya ke?” ₃₀Kutani va huma emutini va ta eka Yesu.

₃₁Enkarhini wolowo vadyondzisiwa va yena va n'wi khongotela, va ku: “Mufundhisi, wa nga dya!” ₃₂A ku ka vona: “Swakudya ndzi na swona, leswi n'wina mi nga swi tiviki.” ₃₃Vadyondzisiwa va vutisana va ku: “Xana ku nga va ni munhu un'wana la n'wi tiseleke swakudya xana?” ₃₄Yesu a ku ka vona: “Swakudya swa mina i ku endla ku rhandza ka Loyi a ndzi rhumeke, ni ku heta ntirho wa yena swinene. ₃₅Xana a mi tolovelanga ku vula leswaku: ‘Ka ha sele tin'hweti ta mune, kutani ku ta ta ntshovelo’ xana? Vonani, mina ndzi ri, tlakusani mahlo mi languta masimu: Ma vupfele ku tshoveriwa. Nisweswi, ₃₆la tshovelaka ú kuma hakelo, kutani ú hlengeleta mavele, a ma hlengeletela ku kuma vutomi lebyi nga heriki, leswaku loyi a byalaka ni loyi a tshovelaka va kota ku tsaka swin'we. ₃₇Hi mukhuva wolowo xivuriso lexi nge: ‘Un'wana wa byala, un'wana wa tshovela’, xi tiyile. ₃₈Mina ndzi mi rhumile ku tshovela lexi mi nga tikarhatelangiki xona; van'wana va tikarhatile va tirha, kasi n'wina mi lo ta hi ku tshovela swa nyuku wa vona.”

₃₉Vasamariya lavo tala va muti wolowo va pfumela eka Yesu hikwalaho ka leswi vuriweke hi wansati, loko a te: “Ú ndzi byerile hinkwaswo leswi ndzi swi endleke.” ₄₀Hikokwalaho loko Vasamariya va fikile eka Yesu, va n'wi rhamba leswaku a ya xwa le ka vona; kutani a ya xwa masiku mambirhi kona. ₄₁Kutani ku engeteleka lavo tala lava pfumeleke hikwalaho ka ku dyondzisa ka yena; ₄₂hiloko va ku ka wansati: “A ma ha ri wona mahungu ya wena lama endlaka leswaku hi pfumela; hikuva na hina hi n'wi twile, kutani ha swi tiva leswaku loyi i Muponisi wa misava hakunene.”

₄₃Endzhaku ka masiku lawa mambirhi, Yesu a suka, a ya eGaleliya. ₄₄Yena Yesu hi xiviri xa yena a a tiyisile loko a te: “Muprofeta a nga kombiwi xichavo etikweni ra rikwavo.” ₄₅Hambiswiritano loko a fika le Galeliya, Vagaleliya va n'wi amukela, hikuva na vona a va yile enkhubyeni le Yerusalema, kutani a va vonile hinkwaswo leswi a swi endleke enkhubyeni wolowo.

₄₆Kutani Yesu a vuyela kambe eKana wa Galeliya, laha a tshamaka a hundzula mati ma endla vhinyo kona. A ku ri ni ndhuna le Kapernawume, leyi a yi vabyeriwa hi n'wana wa yona wa jaha. ₄₇Loko munhu loyi a twile leswaku Yesu ú tile eGaleliya a huma eYudiya, a ta ka yena, a ta n'wi kombela leswaku a rhelela a ya hanyisa n'wana wa yena, loyi a a ri kusuhi ni ku fa. ₄₈Kutani Yesu a ku ka yena: “Loko mi nga voni mahlori ni swihlamariso, a mi swi koti ku pfumela.” ₄₉Ndhuna yi ku ka yena: “Hosi, wa nga rhelela, jahanyana ra mina ri nga si fa.” ₅₀Yesu a ku ka yena: “Famba, n'wana wa wena ú ta hanya.” Munhu loyi a kholwa leswi Yesu a n'wi byeleke swona, kutani a famba. ₅₁Loko a ha rhelela ku ya kaya, malandza ya yena ma n'wi hlanganisa, ma n'wi tivisa, ma ku: “Jaha ra wena ri hanyile.” ₅₂A va vutisa nkarhi lowu n'wana a nga sungula ku antswa ha wona, kutani va ku ka yena: “Tolo, hi nkarhi wa 1 nindzhenga, ku hisa ka miri wa yena ku yimile.” ₅₃Tata wa yena a tsundzuka leswaku hi wona nkarhi lowu Yesu a nga te ka yena: “N'wana wa wena ú ta hanya.” Kutani yena hi xiviri xa yena ni va ndyangu wa yena hinkwavo, va pfumela.

₅₄Lawa i mahlori ya vumbirhi lawa Yesu a ma endleke loko a fika eGaleliya a huma eYudiya.