Yeremiya 52

₁Sedekiyasi a a ri ni malembe ya 21 loko a sungula ku fuma, kutani a fuma malembe ya 11 a ri eYerusalema. Mana wa yena a a ri Hamutala, N'wa-Yeremiya wa le Libina. ₂Ú endlile leswo biha emahlweni ka HOSI Xikwembu, ku fana ni hinkwaswo leswi Yoyakimi a swi endleke. ₃Leswi humeleleke eYerusalema ni le tikweni ra Yuda, swi vangiwile hi vukari bya HOSI Xikwembu, kutani swi fika laha xi va cukumeteke kule na xona.

Kavaloko Sedekiyasi a pfukela hosi ya le Babilona.

₄Hi lembe ra vu-9 ra ku fuma ka Sedekiyasi, hi siku ra khume ra n'hweti ya vukhume, Nebukadnetsara hosi ya le Babilona a ta ni mavuthu ya yena hinkwawo a ta hlasela Yerusalema, a gova emahlweni ka muti, kutani Vakalediya va fumbetela misava yo khandziya erirhangwini ra muti ha yona, yi rhendzela muti hinkwawo. ₅Muti wu rhendzeriwa hi mavuthu ku fikela lembe ra vu-11 ra ku fuma ka hosi Sedekiyasi, ₆kutani ndlala yi va leyikulu emutini, hikuva vaaki va muti a va heleriwile hi swakudya. Kutani hi siku ra vu-9 ra n'hweti ya vumune ya lembe rero, ₇rirhangu ra muti ri boxiwa. Hambileswi mavuthu ya Vakalediya a ma rhendzerile muti, Sedekiyasi ni masocha ya yena hinkwawo va kotile ku baleka nivusiku hi le nyangweni leyi a yi ri xikarhi ka makhumbi mambirhi, kusuhi ni ntanga wa hosi, kutani va tsutsuma hi ndlela leyi kongomaka enkoveni wa Yordani. ₈Kambe mavuthu ya Vakalediya ma hlongorisa hosi Sedekiyasi, ma ya n'wi kuma erivaleni ra Yeriko; kutani masocha hinkwawo ya yena ma hangalaka ma n'wi siya. ₉Vakalediya va khoma hosi Sedekiyasi, va n'wi yisa eka hosi ya Babilona eRibila etikweni ra Hamata, kutani yona yi n'wi vona nandzu. ₁₀Hosi ya Babilona yi lerisa leswaku vana va Sedekiyasi va tsemiwa minkolo, yena Sedekiyasi a ri karhi a swi vona, ku dlayiwa ni varhangeri hinkwavo va tiko ra Yuda, kwale Ribila. ₁₁Va boxa mahlo ya Sedekiyasi, va n'wi boha milenge hi tinketani, kutani hosi ya Babilona yi n'wi yisa etikweni ra yona, yi n'wi pfalela ekhotsweni, a tshama kona a kondza a fa.

₁₂Hi lembe ra vu-19 ra ku fuma ka Nebukadnetsara, hi siku ra khume ra n'hweti ya vuntlhanu, Nebuzaradani nandza wa hosi ya le Babilona, ndhuna ya vasirheleri va yona, a nghena eYerusalema. ₁₃A hisa yindlu ya HOSI Xikwembu ni tindlu ta le ntsindza, ni tindlu tin'wana ta Yerusalema, ngopfu-ngopfu tindlu hinkwato ta vanhu lavo chaviseka. ₁₄Masocha hinkwawo ya Vakalediya lama teke ni ndhuna ya vasirheleri, ma hirimuxa rirhangu hinkwaro leri rhendzelaka Yerusalema. ₁₅Kutani Nebuzaradani ndhuna ya vasirheleri a teka vanhu lava a va sele emutini, van'wana va vona va ri swisiwana ngopfu, a teka ni lava a va tinyiketile eka hosi ya le Babilona, a teka ni masalela ya vavatli ni vaaki, a va yisa evukhumbini hinkwavo. ₁₆Kambe Nebuzaradani ndhuna ya vasirheleri a siya vanhu van'wana va swisiwana etikweni, leswaku va ta sala va hlayisa mirhi ya mihandzu, va byala ni mavele.

₁₇Vakalediya va faya tiphuphu ta koporo ni swigolonyana leswi a swi ri endlwini ya HOSI Xikwembu, va faya ni nhlambeto leyikulu ya koporo leyi vuriwaka “Lwandle”, kutani va yisa koporo ya kona hinkwayo eBabilona. ₁₈Va phangha timbita, ni minkombe, ni swikero swo tsemeta tingoti ta timboni, ni tinhlambeto, ni swimbitana swo hisela mirhi ya risuna, ni swibya swin'wana hinkwaswo swa koporo leswi tirhisiwaka eTempeleni. ₁₉Ndhuna ya vasirheleri yi phangha xuma xa nsuku ni silivhere, swi nga leswi tirhisiwaka ku vumba minkambana, ni timbita to oka ndzilo ha tona, ni tinhlambeto, ni timbita tinene, ni switlhoma-timboni, ni swimbitana swo hisela mirhi ya risuna, ni minkambana ya magandzelo ya swakunwa. ₂₀A ku vanga na munhu la koteke ku pima ku tika ka koporo leyi humeke eka swingolongondzwana swa Tempele leswi hosi Solomoni a swi vumbeke, ti nga tiphuphu timbirhi, ni nhlambeto leyikulu, ni tinkuzi ta 12 ta koporo ehansi ka nhlambeto, ni swigolonyana. ₂₁Hi vumbirhi bya tona, tiphuphu a ti lehile 9 m ku ya ehenhla, ti bumburile 6 m; koporo ya tona a yi tsindziyerile 8 cm, naswona tiphuphu a ti nga ri na nchumu endzeni ka tona. ₂₂Tiphuphu leti a ti tlhandlekiwile xidlodlo xa koporo xa 2,50 m ku ya ehenhla. Tiphuphu timbirhi leti, a ti fanana, ti ri ni swifaniso swa swihenge. ₂₃A ku ri ni swihenge swa 96 leswi vonakaka, kambe hinkwaswo a swi ringana dzana, swi khavisa ritavala, swi ri rhendzela.

₂₄Nebuzaradani ndhuna ya vasirheleri a khoma Seraya muprista lonkulu, ni muprista Sofoniya xandla xa yena, a khoma ni vaprista lavanharhu lava rindzaka tinyangwa ta Tempele. ₂₅Emutini, Nebuzaradani a khoma mulanguteri un'wana loyi a a fambisa swa mavuthu, ni vavanuna va 7 va huvo ya hosi lava kumiweke va ha sele emutini; a khoma matsalani wa ndhunankulu ya mavuthu, loyi a a rhamba vavanuna va tiko enyimpini; naswona exikarhi ka vavanuna lava va tiko, a khoma 60 lava kumiweke va ha sele emutini. ₂₆Kavaloko Nebuzaradani ndhuna ya vasirheleri a hlengeleta lava khomiweke, a famba na vona ehosini ya Vababilona eRibila. ₂₇Hosi Nebukadnetsara a lerisa leswaku va biwa, kutani va dlayiwa eRibila, etikweni ra Hamata. Hi wona mukhuva lowu vanhu va ka Yuda va yisiweke evukhumbini ha wona, kule ni tiko ra vona.

₂₈Mintsengo ya vanhu va ka Yuda lava Nebukadnetsara a va yiseke evukhumbini, hi leyi: Hi lembe ra vu-7 ra ku fuma ka yena, ú fambile na vanhu va 3 023. ₂₉Hi lembe ra vu-18 ra ku fuma ka yena, ú khomile vanhu va 832 eYerusalema a va yisa evukhumbini. ₃₀Hi lembe ra vu-23 ra ku fuma ka Nebukadnetsara, Nebuzaradani ndhuna ya vasirheleri ú khomile vanhu va ka Yuda va 745 a va yisa evukhumbini. Hinkwavo lava yisiweke eBabilona a va ri 4 600.

₃₁Hi lembe leri Evhili-Merodaka hosi ya le Babilona a sunguleke ku fuma ha rona, ú tsetselerile Yoyakini hosi ya Yuda, a n'wi humesa ekhotsweni; a ri ri lembe ra 37 ra ku yisiwa ka Yoyakini hosi ya Yuda evukhumbini, hi siku ra 25 ra n'hweti ya vu-12. ₃₂Evhili-Merodaka a vulavula khwatsi na Yoyakini, a n'wi hlayisa ku tlula tihosi tin'wana leti a ti ri na yena evukhumbini eBabilona. ₃₃Kutani Yoyakini a hluvula swiambalo swa yena swa vukhumbi, kutani ku sukela kwalaho, siku rin'wana ni rin'wana Yoyakini a a dya na hosi endlwini ya yona. ₃₄Masiku hinkwawo, hosi ya Babilona a yi pimela Yoyakini swo tihlayisa ha swona. Swi fambise sweswo vutomini bya yena hinkwabyo, ku kondza a fa.