Yeremiya 28

₁Eminkarhini yoleyo, hi n'hweti ya vuntlhanu ya lembe ra vumune ra ku fuma ka Sedekiyasi hosi ya Yuda, Hananiya n'wana Azuri muprofeta wa le Gibiyoni a vulavula na Yeremiya eTempeleni, vaprista ni vanhu hinkwavo va ri karhi va swi twa, a ku: ₂“HOSI ya matimba hinkwawo Xikwembu xa Israele xi vurisa sweswo xi ri: Ndzi tshovile joko leri hosi ya Babilona yi mi rhwexeke rona. ₃Malembe mambirhi ma nga si hundza, ndzi ta va ndzi vuyisile eTempeleni leyi swingolongondzwana swa yona hinkwaswo leswi Nebukadnetsara hosi ya Babilona a swi phangheke a famba na swona. ₄Naswona Yoyakini n'wana Yoyakimi hosi ya Yuda, ni vanhu hinkwavo va tiko ra Yuda lava yisiweke evukhumbini eBabilona, ndzi ta va vuyisa endhawini leyi. Ndzi vula sweswo mina HOSI, hikuva ndzi ta tshova joko ra hosi ya Babilona.”

₅Kutani muprofeta Yeremiya a hlamula muprofeta Hananiya ni vaprista, vanhu hinkwavo lava a va ri eTempeleni va ri karhi va swi twa, ₆a ku: “A swi ve tano! Ingi HOSI Xikwembu xi nga endla leswi u swi vulaka swi humelela hakunene; a xi vuyise haleno swingolongondzwana swa Tempele ni vanhu hinkwavo lava nga vukhumbini eBabilona! ₇Kambe ndzi kombela leswaku u rhiya ndleve, u yingisa leswi ndzi lavaka ku ku byela swona, wena ni ntshungu lowu hinkwawo. ₈Vaprofeta lava hanyeke khale mina na wena hi nga si va kona, va vulavurile ni vanhu va matiko layo tala ni va mimfumo leyikulu, va va tivisa leswaku ku ta va ni tinyimpi ni makhombo ni mintungu. ₉Kambe loko muprofeta a tivisa leswaku ku ta va ni ku rhula etikweni, ku rhumiwa ka yena hi HOSI Xikwembu ku ta tikomba siku ku humelelaka leswi a swi vuleke.”

₁₀Kutani muprofeta Hananiya a teka joko leri a ri ri enhan'wini ya muprofeta Yeremiya, a ri tshova. ₁₁Kutani a engeta a vulavula emahlweni ka vanhu hinkwavo, a ku: “HOSI Xikwembu xi vurisa sweswo xi ri: Hi mukhuva wolowo loko ku nga si hundza malembe mambirhi, ndzi ta va ndzi tshovile joko leri Nebukadnetsara hosi ya Babilona a ri rhwexeke vanhu va matiko hinkwawo.” Kavaloko muprofeta Yeremiya a tifambela.

₁₂Endzhaku ka loko muprofeta Hananiya a tshovile joko leri a ri ri enhan'wini ya muprofeta Yeremiya, HOSI Xikwembu xi vulavula na Yeremiya, xi ku: ₁₃“Famba u ya tivisa Hananiya leswaku mina HOSI ndzi ri: ‘U tshovile joko ra mhandze, kambe ematshan'wini ya rona, u ta rhwexiwa ra nsimbhi. ₁₄Mina HOSI ya matimba hinkwawo Xikwembu xa Israele ndzi ri: Vanhu lava hinkwavo ndzi ta va tlhandleka majoko ya nsimbhi etinhan'wini. Va ta va malandza ya Nebukadnetsara hosi ya Babilona, va n'wi tirhela; ndzi ta n'wi nyika ni swiharhi leswaku a swi fuma.’ ” ₁₅Kutani muprofeta Yeremiya a ku ka muprofeta Hananiya: “We Hananiya, HOSI Xikwembu a xi ku rhumanga, kambe u xisile vanhu lava, kutani va tshemba mavunwa ya wena. ₁₆Hikokwalaho HOSI Xikwembu xi nge: ‘Yingisa, ndzi ta ku susa emisaveni. U ta fa lembe reri, hikuva u tiarisile u lwa na mina HOSI.’ ”

₁₇Kutani hi n'hweti ya vu-7 ya lembe rero, muprofeta Hananiya a fa.