Yeremiya 2

“ ‘Ndzi anakanya ku tshembeka ka n'wina loko ma ha ri lavantshwa,

ni rirhandzu ra n'wina loko ma ha ku hloma,

ni hilaha a mi ndzi namarhela hakona emananga, lomu ku nga byariwiki nchumu.

₃N'wina Vaisraele, a mi ri va mina ntsena,

mi fana ni leswi rhangeke ku tshoveriwa.

Hinkwavo lava a va mi xanisa, a va tivangela nandzu,

va wela hi makhombo.

Ndzi vula sweswo mina HOSI.’ ”

“Xana vatata wa n'wina ndzi va dyohele ha yini,

leswi va nga ndzi fularhela,

va ya namarhela swilo leswo ka swi nga tivikani,

kutani na vona va hundzuka vanhu vo ka va nga tivikani, xana?

₆A va vutisanga va ku: ‘Xana HOSI Xikwembu xi kwihi,

xona lexi xi hi humeseke etikweni ra Egipta, xana?’

Kasi hi mina ndzi mi fambiseke emananga,

etikweni ra sava ni magova,

etikweni leri omeke ra xinyami xo chavisa;

hi mina ndzi mi fambiseke laha ku nga hundziki munhu,

laha ku nga tshamiki munhu na un'we!

₇Kutani ndzi mi fikisile etikweni leri noneke,

leswaku mi tidyela mihandzu ya rona mi tiphina ha yona;

kambe mi lo na nghena, mo nyamisa tiko ra mina,

mi onhetela ndzhaka ya mina.

₈Vaprista a va ha vutisanga leswaku mina HOSI

ndzi nga va ndzi ri kwihi.

Lava tivaka nawu a va vanga na mhaka na mina,

varhangeri va ndzi dyoherile;

vaprofeta va dyondzisile hi vito ra Baali,

va landzelela swikwembu leswi nga pfuniki nchumu.

₉Hikokwalaho ndza ha lava ku tengisana na n'wina,

na vona vatukulu va n'wina ndzi ta tengisana na vona.

Ndzi vula sweswo mina HOSI!

₁₀“Pelani lwandle mi ya xiyaxiya exihlaleni xa Kipra;

rhumani vanhu va ya eka va ka Kedari, va ya languta,

va vona loko mhaka yo tano yi tshama yi humelela:

₁₁Xana vamatiko va tshama va tshika swikwembu swa vona xana?

E-e! (Kasi swikwembu swa kona a hi swa ntiyiso!)

Kambe vanhu va mina va ndzi tshikile, mina Xikwembu xa vona lexi dzunekaka,

va tilavela leswi nga pfuniki nchumu.

₁₂Hikokwalaho mina HOSI ndzi vula sweswo ndzi ri:

N'wina swivumbiwa swa le tilweni, hlamalani mhaka leyi,

chavani mi rhurhumela swinene,

₁₃hikuva vanhu va mina va ndzi dyoherile kambirhi:

Va ndzi tshikile mina ndzi nga xihlovo xa mati lama khulukaka,

kutani va tikovotlele makhele yo hlayisela mati,

kambe makhele ya kona a ma pfunanga nchumu, hikuva a ma pandzekile.”

₁₄Xana Israele ú lo endliwa hlonga,

kumbe ú velekiwile endyangwini wa mahlonga xana? E-e!

Loko swi ri tano, hikwalaho ka yini valala va yena

va phangha swilo swa yena ke?

₁₅Va bonga kukota tinghala,

va lwa na yena va ri karhi va ba huwa;

tiko ra yena va ri onhetele ngopfu,

miti ya yena yi hundzuke marhumbi, a ka ha tshami munhu eka yona.

₁₆Hambi va ri vanhu va le Nofu ni va le Tahapanese,

va ta n'wi faya nhloko.

₁₇N'wina Vaisraele, makhombo lawa mi lo tivangela;

mi tshikile HOSI Xikwembu xa n'wina,

enkarhini lowu a xi mi komba ndlela.

₁₈Kutani sweswi swi mi pfuna yini ku tsutsumela le Egipta,

mi ya nwa mati enambyeni wa Nilo xana?

Ni ku ya le Asiriya mi ya nwa mati enambyeni wa Yufrata,

swi mi pfuna yini xana?

₁₉Vubihi bya n'wina ni ku tiarisa ka n'wina,

swi ta mi vangela ku biwa mi twa ku vava,

kutani mi ta swi tiva ni ku swi vona

leswaku ku tshika HOSI Xikwembu xa n'wina i mhaka leyo biha leyi dyisaka mbitsi.

Ni ku ndzi chava, a ma ha ndzi chavi!

Yi vula sweswo HOSI ya matimba hinkwawo, N'wini wa n'wina.

₂₀HOSI Xikwembu xi ri:

“N'wina Vaisraele, i khale mi arile ku fumiwa hi mina,

mi ndzi tshikile mi nga lavi ku ndzi tirhela.

Mi yile mi ya khongela eswitsungeni hinkwaswo,

ni le hansi ka mirhi hinkwayo leyi tlhumeke,

mi etlela kukota tinghwavava.

₂₁A ndzi mi hlawurile kukota ximilana xo saseka xa vhinya,

ndzi mi simeka emisaveni leyinene.

Kambe mi hundzuke nsinya lowu nga tswaliki nchumu,

lowu timilelaka enhoveni.

₂₂Hambi mi nga hlamba hi swisibi swa tinxaka-xaka,

swivati swa milandzu ya n'wina swa ha to vonaka,

ku vula mina HOSI N'wini wa n'wina!

₂₃“Mi nga vuli mi ku: ‘A hi tinyamisanga,

a hi khongelanga swikwembu swa Baali!’

Tsundzukani hilaha mi dyoheke hakona eminkoveni,

anakanyani leswi mi swi endleke:

A mi tsutsuma mi ya hala ni hala

ku fana ni kamela ya ntswele leyi lavaka nkuzi.

₂₄A mi fana ni mangwa leyi toloveleke emananga,

mi fana ni kamela ya ntswele leyi hefemutekaka, yi nga ha tikoti hi ku navela nkuzi.

Tinkuzi ta kona leti ti yi lavaka, ti nge karhateki hi ku yi hlongorisa;

loko nkarhi wa yona wu fikile, ti ta yi kuma hi ku olova.

₂₅Mina HOSI ndzi ri, mi nga hlakati tintanghu ta n'wina,

naswona mi nga tiomisi minkolo hi torha mi ri karhi mi landza swikwembu swa hava!

Kambe n'wina mi hlamula mi ku: ‘A hi nga swi tshiki.

Swikwembu swa hava ha swi tsakela,

ha ha to swi tirhela!’

₂₆“Loko khamba ri khomiwile, ri ta va ni tingana;

kutani na vona Vaisraele va ta khomiwa hi tingana,

vona, ni tihosi ta vona, ni varhangeri va vona,

ni vaprista va vona, ni vaprofeta va vona.

₂₇Vanhu lava, va teka nsinya va ku i tata wa vona,

ni ribye va ku i mana wa vona.

Va ndzi fularhela ematshan'wini ya ku ndzi langutisa,

kambe loko va ri ekhombyeni, va huwelela eka mina,

va ku: ‘Pfuka u hi lamulela!’

₂₈Xana swi kwihi swikwembu swa n'wina

leswi mi tiendleleke swona xana?

Pfuxani swona, hi vona loko swi nga mi pfuna

loko mi ri ekhombyeni!

Swikwembu swa n'wina va ka Yuda i swinyingi,

swi ringana ni miti ya n'wina hi ku tala.”

₂₉HOSI Xikwembu xi vula sweswo xi ri:

“Hikwalaho ka yini mi ndzi veka nandzu xana?

Hinkwenu mi tiarisile, mi lwa na mina.

₃₀Ndzi mi bile, kambe sweswo a swi pfunanga nchumu,

hikuva a mi pfumelanga ku tshinyiwa;

vaprofeta lava ndzi nga mi rhumela vona,

mi va dlele onge mo va tinghala leti twaka ndlala.

₃₁N'wina vanhu va Israele, yingisani swinene,

hikuva mina HOSI ndzi ni rito eka n'wina:

Xana ndzi mi karhatile n'wina vanhu va mina,

xana ndzi vile tiko lero oma ra xinyami eka n'wina xana?

Loko swi nga ri tano, hikwalaho ka yini mi ku:

‘Hi ta ya lomu hi ku rhandzaka,

a hi swi lavi ku tlhelela eka wena!’ xana?

₃₂Nhwanyana a nga ka a nga rivali vuhlalu bya yena,

na rona hlomisa ri nge rivali swiambalo swa rona swa nkhuvo.

Kambe n'wina vanhu va mina,

i khale swinene mi ndzi rivarile.

₃₃“Wena Israele, ndlela yo tilavela swigangu,

u yi tiva ngopfu!

Hikokwalaho, ku endla xidyoho

i mhaka leyi u yi toloveleke ngopfu,

₃₄ni ngati leyi tlhambukeleke eswiambalweni swa wena,

i ya swisiwana leswi nga riki na nandzu,

ku nga ri ya vanhu lava u va kumeke va ri karhi va yiva!

Kambe ehandle ka leswo hinkwaswo,

₃₅wa ha vula u ku: ‘A ndzi dyohanga nchumu,

hikokwalaho Xikwembu xi nga ka xi nga ndzi hlundzukeli!’

Yingisa! Ndzi ta ku ba hi mhaka ya leswi u nge:

‘A ndzi dyohanga nchumu!’

₃₆U hatlisa ngopfu ku hundzuluxa mikhuva ya wena.

Tiva leswaku Vaegipta va ta ku khomisa tingana,

ku fana ni leswi Vaasiriya va ku endleke swona.

₃₇U ta vuya hi le tikweni ra Egipta

u rhwele mavoko,

hikuva vanhu lava u va tshembaka, mina HOSI ndza va nyenya;

ku ya le ka vona a swi nga ku pfuni nchumu.”