Yuditi 5

₁Loko Holofani ndhunankulu ya mavuthu ya Vaasiriya a twa leswaku Vaisraele va tilulamisele ku lwa ni leswaku va sivile swiphandze swa swintshabyana, va vekele ni swisivelo erivaleni, ₂a hlundzuka ngopfu. Kutani a hlengeleta tindhuna ta Mowabu ni vafambisi va mavuthu ya Amoni ni varhangeri hinkwavo va matiko lama nga eribuweni ra lwandle, ₃a ku ka vona: “Ndzi byeleni n'wina Vakanana, i vanhu vahi lava akeke etikweni ra swintshabyana? Hi yihi miti ya vona? Mavuthu ya vona i mangani? Matimba ni vunhenha bya vona swi huma kwihi? Hosi ya vona leyi fambisaka mavuthu ya vona, i mani? ₄Hikwalaho ka yini eka vanhu hinkwavo lava akeke evupeladyambu va ri vona ntsena lava aleke ku tinyiketa eka mina ke?”

₅Kavaloko Akiyoro, murhangeri wa Vaamoni hinkwavo, a ku ka Holofani: “Hosi yanga, ndzi kombela hi xichavo, ndzi yingise. Ndzi ta ku byela ntiyiso hi vanhu lava akeke etikweni ra swintshabyana leswi nge kusuhi ni mixaxa ya wena. A ndzi nga ku byeli mavunwa. ₆Vanhu lava i vatukulu va Vakalediya. ₇Eminkarhini yin'wana a va akile eMesopotamiya, hikuva a va nga ha gandzeli swikwembu swa vatata wa vona lava a va ri eKalediya. ₈A va tshikile mikhuva ya vakokwa wa vona, va khongela Xikwembu xa matilo, Xikwembu lexi a va sungurile ku xi tiva. Kutani va hlongoriwile etikweni ra vona kule ni swikwembu swa ka vona, va balekela eMesopotamiya laha va tshameke kona nkarhi wo leha.

₉“Kutani Xikwembu xa vona xi va lerisa ku rhurhela etikweni ra Kanana, laha va tshamisekeke va ndlandlamuka hi rifuwo ra nsuku ni silivhere ni tihomu to tala ngopfu. ₁₀Loko ndlala yi wa eKanana, va rhurhele etikweni ra Egipta, laha va tshameke kona va kuma swakudya. Kwalaho va andza ngopfu, va va ntsandza-vahlayi. ₁₁Hikokwalaho hosi ya Egipta yi va khoma hi tihanyi, yi va tshikelela, yi va sindzisa ku vumba switina, yi va tsongahata ni ku va endla mahlonga. ₁₂Kutani Vaisraele va khongela Xikwembu xa vona hi rito leri tlakukeke, kutani xi ba tiko hinkwaro ra Egipta hi mintungu yo pfumala vatshunguri; hikokwalaho Vaegipta va va hlongola va suka exikarhi ka vona. ₁₃Xikwembu xi phyisa Lwandle-ro-Tshwuka emahlweni ka vona, ₁₄xi va fambisa hi ndlela ya Sinayi na Kadexe-Bariniya.

“Vaisraele va hlongola vanhu hinkwavo lava tshamaka emananga. ₁₅Va aka etikweni ra Vaamori, hi matimba ya vona va dlayetela Vaexibona hinkwavo; va pela nambu wa Yordani, va teka tiko hinkwaro ra swintshabyana. ₁₆Va hlongola Vakanana, na Vaperesi, na Vayebusi, na Vaxikeme, na Vagerigasi hinkwavo, kutani va tshama ematikweni ya vanhu lava nkarhi wo leha.

₁₇“Loko va nga dyoheli Xikwembu xa vona, va ndlandlamuka, hikuva Xikwembu lexi xi venga ku homboloka, kutani a xi ri na vona. ₁₈Kambe loko va sungula ku hambuka endleleni leyi xi nga va vekela yona, xi va nyiketa va hluriwa etinyimpini, va yisiwa evuhlongeni ematikweni ya vanhu vambe. Kutani Tempele ya Xikwembu xa vona yi mbundzumuxiwa, ni miti ya vona yi phangiwa hi valala va vona. ₁₉Kambe sweswi va tlhelerile eka Xikwembu xa vona, va vuyile va huma laha a va hangalaseriwe kona, va tshamisa eYerusalema laha Xivandla lexo hlawuleka xa vona xi nga kona. Kutani va akile etikweni ra swintshabyana, hikuva a ku nga ri na munhu kona.

₂₀“Kutani ke, we hosi n'wini wanga, loko ku ri ni xidyoho, hambi lexi vanhu lava va nga xi tiviki, lexi va dyoheleke Xikwembu xa vona ha xona, kambe hina hi tiva xidyoho xa kona, hi nga ya lwa na vona hi va hlula. ₂₁Kambe loko ku ri hava xidyoho exikarhi ka vona, va tshike we hosi yanga, hikuva HOSI Xikwembu xa vona xi ta va sirhelela, na hina hi ta khomisiwa tingana emahlweni ka matiko hinkwawo.”

₂₂Loko Akiyoro a heta ku vulavula, hinkwavo lava a va yimile va rhendzela ntsonga wa Holofani va sungula ku dzumadzuma. Tindhuna ta Holofani ni vavanuna hinkwavo lava humaka eribuweni ra lwandle ni le ka Vamowabu va sindzisa leswaku Akiyoro a dlawa.

₂₃A va ku: “Hikwalaho ka yini hi fanele hi chava Vaisraele? I vanhu lava nga riki na matimba eku lweni. ₂₄Kutani ke, a hi tlhandlukeleni etikweni ra swintshabyana, we hosi Holofani. Vaisraele va ta mitiwa hi mavuthu layo tala ya wena.”