Yuditi 4

₁Enkarhini lowu, Vaisraele lava akeke eYudiya a va twile hinkwaswo leswi Holofani, ndhunankulu ya mavuthu ya Nebukadnetsara hosi ya Vaasiriya, a swi endleke eka vamatiko, ni hilaha a heriseke hakona ni ku phangha titempele ta vona hinkwato. ₂Hikokwalaho ke, va chava hi ku chava lokukulu hi mhaka ya ku ta ka yena, va vavisekela Yerusalema kun'we ni Tempele ya HOSI Xikwembu xa vona. ₃Hikuva vanhu hinkwavo va Yudiya a va ha ku vuya hi le vuhlongeni, ni ku tlhela va va kun'we. Naswona a va ha ku hlawulekisa swibya leswo hlawuleka, ni alitari, ni Tempele, swi nga leswi a swi nyamisiwile hi valala va vona. ₄Hiloko va rhumela rito eka swifundza hinkwaswo swa Samariya, ni le Kona, ni le Beta-Horoni, ni le Belemayini, ni le Yeriko, ni le Khova, ni le Ayisora, ni le nkoveni wa Salema. ₅Xikan'we-kan'we va ya fika etinhlohlorhini ta swintshabyana, va biyelela miti leyi a yi ri kona. Va hlengeleta swakudya, va tilulamisela nyimpi, hikuva a va ha ku tshovela masimu ya vona. ₆Kavaloko Yoyakimi muprista lonkulu loyi a a ri eYerusalema enkarhini wolowo, a tsalela vanhu va le Betuli na Beta-Matsayimi, yi nga miti leyi langutaneke na Esdreloni hi tlhelo ra rivala ra Dotani. ₇A va lerisa ku siva swiphandze leswi nga kona eswintshabyanini, leswi valala a va ta kota ku nghena ha swona va hlasela tiko ra Yudiya; kasi a swi olova ku pfala swiphandze leswi, hikuva a swi khumile, swi ringene ku hundza vanhu vambirhi ntsena hi nkarhi wun'we. ₈Kavaloko Vaisraele va endla hilaha Yoyakimi muprista lonkulu ni huvo ya vakulukumba va le Yerusalema va va leriseke hakona.

₉Kutani Vaisraele va khongela Xikwembu hi ku hiseka, va titsongahata hi ku titsona swakudya. ₁₀Vavanuna, ni vasati va vona, ni vana, hambi swifuwo swa vona, ni valuveri lava tshamaka na vona, ni vatirhi va vona lava va va tholeke, ni mahlonga ya vona, hinkwavo va ambala leswo khwaxa. ₁₁Kutani vavanuna ni vavasati hinkwavo va Israele lava akeke eYerusalema, swin'we ni vana va vona, va nkhinsama emahlweni ka Tempele, va tichela nkuma enhlokweni, va andlala swiambalo leswo khwaxa emahlweni ka HOSI. ₁₂Va funengeta ni alitari hi swiambalo leswi swo khwaxa, va huwelela hi rito leri tlakukeke va ri nomu wun'we. Va khongela eka Xikwembu xa Israele hi timbilu leti baseke, va kombela leswaku xi nga tshiki vana va vona va khomiwa ni vasati va vona va nga tshuki va vutliwa, ni miti ya vona yi nga mbundzumuxiwi ni Xivandla lexo hlawuleka xi nga nyamisiwi ni ku onhiwa, hikuva leswi hinkwaswo a swi tsakeriwa ngopfu hi vamatiko. ₁₃Kutani HOSI Xikwembu xi yingisa swikhongelo swa vona, xi languta ku vaviseka ka vona, hikuva vanhu hinkwavo va Yudiya na Yerusalema a va titsona swakudya masiku layo tala emahlweni ka Xivandla lexo hlawuleka xa Xikwembu xa matimba hinkwawo. ₁₄Kutani Yoyakimi muprista lonkulu ni vaprista hinkwavo va yima emahlweni ka HOSI Xikwembu va xi tirhela, va ambale leswo khwaxa, va humesa magandzelo lama hisiwaka ya siku rin'wana ni rin'wana, ni magandzelo lama va tiboheke hi ku hlambanya leswaku va ta ma humesa ni lama va ngo ma humesa hi ku titwa. ₁₅Va tichela nkuma eswihukwini swa vona, va khongela HOSI Xikwembu hi rito leri tlakukeke swinene, leswaku xi pfuna Vaisraele hinkwavo.