Vaavanyisi 4

₁Loko Ehudi a lovile, Vaisraele va engeta va endla leswo biha emahlweni ka HOSI Xikwembu. ₂Kutani xi va nyiketa emavokweni ya Yabini hosi ya Kanana, loyi a a fuma a ri eHasoro. Mufambisi wa mavuthu ya yena a a ri Sisera, loyi a a tshama eHaroxete-wa-Vamatiko. ₃Yabini ú xanisile Vaisraele swinene ku ringana malembe ya 20, hikuva a a ri ni makalichi ya nsimbhi ya 900. Kutani Vaisraele va huwelela eka HOSI Xikwembu, va kombela ku pfuniwa.

₄Enkarhini lowu muprofeta wa xisati loyi a va ku i Debora, nkata Lapidoto, a a ri yena muavanyisi wa Vaisraele. ₅A a toloverile ku tshama ehansi ka murhi wa ncindzu (“Ncindzu-wa-Debora”) exikarhi ka Rhama na Betele, emagangeni ya Efrayimi. Kutani Vaisraele a va tlhandlukela eka yena va ya avanyiseriwa timhaka. ₆Siku rin'wana, Debora a vitana Baraka n'wana Abinowama loyi a a tshama emutini wa Kedexe wa va ka Neftali, a ku ka yena: “Xileriso xa HOSI Xikwembu xa Israele, hi lexi: ‘Famba u ya hlengeleta mavuthu entshaveni ya Taboro, u hlawula vavanuna va 10 000 eka nyimba ya ka Neftali ni ya ka Zebuloni. ₇Kutani mina HOSI ndzi ta yenga Sisera mufambisi wa mavuthu ya Yabini, a ta hlangana na wena exinambyaneni xa Kixoni, a ri ni makalichi ni masocha ya yena; kutani mina ndzi ta n'wi nyiketa emavokweni ya wena.’ ” ₈Baraka a ku ka Debora: “Loko wena u pfumela ku famba na mina, ndzi ta ya; kambe loko u nga pfumeli, a ndzi nga yi!” ₉Debora a ku: “Hiswona, ndzi ta famba na wena; kambe lomu u yaka kona, u wu nga vuyi ni ku dzunisiwa, hikuva HOSI Xikwembu xi ta nyiketa Sisera emavokweni ya wansati.” Kutani Debora a suka a famba na Baraka, va ya eKedexe. ₁₀Kutani Baraka a vitana va ka Zebuloni ni va ka Neftali, va tlhandlukela emutini wa Kedexe, va ri na Debora. Vavanuna lava a va fambisiwa hi Baraka a va ringana 10 000.

₁₁Enkarhini wolowo, Hebere lowa Mukeni a a tihambanisile ni vatukulu va Hobabu mukon'wana wa Muxe, a ya dzima ntsonga wa yena kule na vona, enkuhlwini wa le Saanayimi, kusuhi na Kedexe.

₁₂Loko Sisera a tivisiwile leswaku Baraka n'wana Abinowama ú tlhandlukerile entshaveni ya Taboro, ₁₃a hlengeleta makalichi ya yena ya nsimbhi yo ringana 900, ni masocha ya yena hinkwawo, a suka na wona emutini wa Haroxete-wa-Vamatiko, a kongoma exinambyaneni xa Kixoni. ₁₄Kutani Debora a ku ka Baraka: “Huma u ya lwa, hikuva leri hi rona siku leri HOSI Xikwembu xi nga ta nyiketa Sisera emavokweni ya wena. Ndzi vula ndzi tiyisile ndzi ri, xi ta va mufambisi wa wena!” Kutani Baraka a suka entshaveni ya Taboro, a rhelela a ri ni masocha ya yena ya 10 000. ₁₅Loko masocha ya Baraka ma hlomula mafumu ma nghena enyimpini, HOSI Xikwembu xi hangalasa masocha hinkwawo ya Sisera ni makalichi ya yena hinkwawo, kutani yena a xika ekalichini a tsutsuma. ₁₆Kutani masocha ya Baraka ma hlongorisa makalichi ni masocha ya Sisera ku ya fika emutini wa Haroxete-wa-Vamatiko. Mavuthu hinkwawo ya Sisera ma dlayiwa hi fumu, ku nga sali na munhu ni un'we.

₁₇Loko a ri Sisera yena, a tsutsuma a ya fika entsongeni wa Yaele nkata Hebere lowa Mukeni, hikuva a ku ri ni ku twanana exikarhi ka Yabini hosi ya Hasoro ni va ka Hebere. ₁₈Kutani Yaele a huma a ya hlanganisa Sisera, a ku ka yena: “Tsemakanyela haleno we n'wini wanga, u nga chavi, nghena laha ka mina.” Kutani Sisera a tsemakanya a nghena entsongeni wa Yaele, kutani Yaele a n'wi khubumeta hi nkumba. ₁₉Sisera a ku ka Yaele: “Ndzi kombela swimatana swo nwa, hikuva ndza fa hi torha.” Yaele a n'wi nyika ntswamba lowu a wu ri enkwameni wa dzovo, a nwa, kutani Yaele a engeta a khubumeta Sisera hi nkumba. ₂₀Kutani Sisera a ku ka Yaele: “Yima enyangweni ya ntsonga, kutani loko ko tshuka ku ta munhu a ku vutisa a ku: ‘A ku nghenanga wanuna laha ka wena xana?’ hlamula u ku: ‘E-e!’ ” ₂₁Kambe loko Sisera a ha etlele hikwalaho ka ku karhala ngopfu, Yaele nkata Hebere a teka mhingu ya ntsonga, a teka ni nyundzu, a ya eka Sisera hi ku nyandlamela, a fika a belela mhingu enhlokweni ya Sisera, yi phohla yi ya tlhava ni le hansi, a fisa sweswo. ₂₂Loko Baraka a ta a ri karhi a hlota Sisera, Yaele a n'wi hlanganisa, a ku ka yena: “Tana haleno, wanuna loyi u n'wi lavaka, ndzi ta ku komba yena.” Baraka a ya nghena entsongeni wa Yaele, a kuma Sisera a file, ni mhingu yi ri enhlokweni.

₂₃Hi siku rero, Xikwembu xi endla leswaku Vaisraele va hlula Yabini hosi ya Kanana, ₂₄kutani Vaisraele va sungula ku tshikelela Yabini hosi ya Kanana siku rin'wana ni rin'wana, va kondza va n'wi herisela makumu.