Vaavanyisi 20

₁Kutani Vaisraele hinkwavo, ku suka eDani ku ya fika eBerexeba, ku katsa ni va le tikweni ra Giliyadi, va hlengeletana emahlweni ka HOSI Xikwembu eMispa, va ri ni xikongomelo xin'we. ₂Vafambisi va tinyimba hinkwato ta Vaisraele va yima emahlweni ka nhlengeletano leyi ya vanhu va Xikwembu ma nga masocha ya 400 000 lama fambaka hi milenge. ₃(Va ka Benjamini a va swi twile leswaku Vaisraele va hlengeletanile eMispa.) Vaisraele va vutisa va ku: “Hi byeleni, mhaka leyi yo bihisa leswi yi humelerise ku yini xana?” ₄Mulevhi loyi nsati wa yena a dlayiweke a hlamula a ku: “Mina ni nsati wa mina hi fikile eGibeya, wu nga muti wa va ka Benjamini, hi etlela kona. ₅Hiloko vavanuna va muti wa Gibeya va ndzi tela, va rhendzela yindlu leyi a ndzi ri ka yona vusiku byebyo; kutani va teka nsati wa mina, va ya tlanga hi yena a kondza a fa, kambe makungu ya vona a ku ri ku dlaya mina. ₆Kutani ndzi teka ntsumbu wa nsati wa mina, ndzi wu tsemelela wu huma swirho, ndzi rhuma vanhu va swi yisa etikweni hinkwaro leri nga ndzhaka ya Vaisraele, hikuva leswi va ka Benjamini va swi endleke i ndzhukano ni manyala exikarhi ka Vaisraele. ₇Hinkwenu n'wina Vaisraele, kanelani, mi tsundzuxana hi mhaka leyi.”

₈Kutani vanhu hinkwavo va yima hi rito rin'we, va ku: “Namuntlha a ku mukiwi, a ku na un'we wa hina loyi a nga ta tlhelela ekaya. ₉Kutani hi ta endla leswi: Hi ta hoxa vuhlolotwana hi hlawula lava nga ta ya hlasela muti wa Gibeya. ₁₀Eka vavanuna van'wana ni van'wana va dzana, va tinyimba hinkwato ta Vaisraele, ku ta hlawuriwa vavanuna va khume, lava nga ta hamba va phamela masocha loko ma ri karhi ma rihisela manyala lawa va ka Benjamini lava akeke emutini wa Gibeya, va ma endleke exikarhi ka Vaisraele.” ₁₁Hiloko vavanuna hinkwavo va Israele va hlengeletana hi moya un'we, va ya hlasela muti wa Gibeya.

₁₂Kutani tinyimba ta Vaisraele ti rhuma vanhu va ya eka nyimba hinkwayo ya Benjamini, va fika va ku: “Mhaka leyi mi yi endleke yi bihile ngopfu. ₁₃Kutani sweswi, humesani vavanuna lava va nsele laha Gibeya leswaku hi ta va dlaya, hi susa vubihi exikarhi ka Vaisraele.” Kambe va ka Benjamini va ala ku endla leswi vamakwavo Vaisraele va vulaka swona. ₁₄Kutani va ka Benjamini va hlengeletana va huma emitini ya vona va ya eGibeya, ku ya lwa ni Vaisraele. ₁₅Emitini ya vona, va ka Benjamini va humesile masocha ya 26 000, kasi emutini wa Gibeya hi koxe ku humile tinhenha ta 700. ₁₆Exikarhi ka masocha lawa hinkwawo, a ku ri ni tinhenha ta 700 ta rimatsi, leti hambi wu ri nsisi wun'we a ti ta kota ku wu ba hi ribye ra xipelupelu ti nga hupi. ₁₇Ehandle ka nyimba ya ka Benjamini, tinyimba letin'wana ta Vaisraele ti humesile vavanuna va 400 000, hinkwavo va ri lava tivaka ku lwa nyimpi.

₁₈Vaisraele va tlhandluka va ya vutisa timhaka eka Xikwembu kwale Betele va ku: “Xana i va ka mani exikarhi ka hina lava nga ta hi rhangela loko hi huma nyimpi hi ya lwa ni va ka Benjamini xana?” HOSI Xikwembu xi hlamula xi ku: “Ku ta rhanga va ka Yuda.”

₁₉Siku leri tlhandlamaka, Vaisraele va pfuka nimpundzu, va famba va ya dzima mixaxa ku langutana ni muti wa Gibeya. ₂₀Hiloko vavanuna va Israele va huma ku ya lwa ni va ka Benjamini, va fika va xaxamela kusuhi ni muti wa Gibeya. ₂₁Kutani va ka Benjamini va huma emutini wa Gibeya, va ya eku lweni; siku rero va dlaya vavanuna va Israele vo ringana 22 000. _22-23Hiloko Vaisraele va tlhandluka va ya eBetele, va fika va rila emahlweni ka HOSI Xikwembu dyambu ri kondza ri pela, kutani va vutisa eka xona, va ku: “Xana hi nga tlhela hi ya lwa ni vamakwerhu va ka Benjamini xana?” Xona xi va hlamula xi ku: “Fambani mi ya lwa na vona.” Hiloko Vaisraele va tlhela va kuma matimba, va xaxamela endhawini leyi a va ri eka yona hi siku ro sungula, va tilulamisela ku lwa. ₂₄Kutani hi siku ra vumbirhi, Vaisraele va ya kusuhi ni va ka Benjamini ku ya lwa na vona.

₂₅Kutani va ka Benjamini va tlhela va huma eGibeya, hi siku leri ra vumbirhi, va fika va dlaya vavanuna va Israele va 18 000, hinkwavo va ri masocha. ₂₆Kavaloko vavanuna hinkwavo va mavuthu ya Vaisraele va tlhandluka va kongoma eBetele, va fika va tshama, va rila emahlweni ka HOSI Xikwembu, va nga dyi nchumu siku hinkwaro dyambu ri kondza ri ya pela, va ri karhi va humesela HOSI Xikwembu magandzelo lama hisiwaka, ni ya xinakulobye. _27-28(Enkarhini lowu, Areka ya Ntwanano wa HOSI Xikwembu a yi tshama eBetele. Loyi a a tirha ku hlayisa Areka enkarhini lowu a a ri Finiyasi n'wana Eliyazara wa Aroni.) Vaisraele va vutisa timhaka eka HOSI Xikwembu, va ku: “Xana hi nga tlhela hi ya lwa ni vamakwerhu va ka Benjamini, kumbe hi swi tshika xana?” Xona xi va hlamula xi ku: “Tlhelelani, hikuva mundzuku ndzi ta va nyiketa emavokweni ya n'wina.”

₂₉Hiloko Vaisraele va veka vavanuna va rhendzela muti wa Gibeya, va tumbelela vaaki va wona. ₃₀Kutani Vaisraele va huma ku ya lwa ni va ka Benjamini ra vunharhu, va fika va xaxamela ku fana ni le ku sunguleni, va langutana ni muti wa Gibeya. ₃₁Kutani va ka Benjamini va yela Vaisraele, hiloko Vaisraele va va humesela kule ni muti; va ka Benjamini va endla ku fana ni minkarhi leyin'wana: Va ba Vaisraele, va dlayela van'wana va vona erivaleni ni le magondzweni, ku nga egondzweni leri yaka eBetele, ni le gondzweni leri nghenaka eGibeya. Vaisraele lava dlayiweke a va ri kwalomu ka 30. ₃₂Va ka Benjamini a va ehleketa leswaku va tlherile va hlula Vaisraele, kasi Vaisraele a va endlile makungu yo suka va titsutsumisa ha vomu, leswaku va ta humesa va ka Benjamini emutini, va va yisa emagondzweni. ₃₃Kutani vavanuna hinkwavo va Israele va suka lomu a va xaxamerile kona, va ya xaxamela hi vuntshwa eBaala-Tanara. Hiloko lavan'wana va hatlisa va huma lomu a va tumberile kona, erivaleni ra Gibeya. ₃₄Vavanuna lava a va tumberile a ti ri tinhenha ta 10 000, leti hlawuriweke exikarhi ka Vaisraele hinkwavo; kutani ti yela vaaki va muti wa Gibeya, nyimpi yi fika yi hisa swinene. Va ka Benjamini a va nga swi tivi leswaku khombo ri le ndleleni. ₃₅HOSI Xikwembu xi endla leswaku Vaisraele va hlula va ka Benjamini. Hi siku leri, Vaisraele va dlaya masocha ya va ka Benjamini yo ringana 25 100. ₃₆Hiloko va ka Benjamini va swi vona leswaku va hluriwile.

Vaisraele va titsutsumisile ha vomu loko va ka Benjamini va va yela, hikuva a va tshemba vavanuna lava a va va vekile va tumbelela vaaki va muti wa Gibeya. ₃₇Hiloko vavanuna lava va hatla va huma lomu a va tumberile kona, va nghena emutini wa Gibeya va rhendzeleka na wona va ri karhi va herisa vaaki va wona hinkwavo hi fumu. ₃₈Vaisraele lava a va fanele ku titsutsumisa ha vomu, a va twananile ni lava tumbeleke leswaku, loko lava tsutsumaka va vona musi lowu tuvikaka swinene wu endla papa emutini, ₃₉va ta hundzuluka va tilwela. Enkarhini lowu va ka Benjamini a va dlayile Vaisraele va 30, kutani va sungula ku ehleketa leswaku va tlherile va va hlula ku fana ni le ku sunguleni. ₄₀Hiloko musi wa xikombiso wu sungula ku tuvika wu endla papa. Va ka Benjamini va te va hundzuluka va languta endzhaku, vo vona muti hinkwawo wu ri karhi wu mbuluka musi. ₄₁Kavaloko vavanuna va Israele va hundzuluka, kutani va ka Benjamini va hlangana tinhloko, hikuva a va swi vona leswaku khombo ri va fikerile. ₄₂Kutani va ka Benjamini va hundzuluka, va suka va tsutsuma hi ku chava Vaisraele, va kongoma tlhelo ra le mananga. Kambe nyimpi a va yi balekanga, hikuva Vaisraele lava a va tumberile a va ta hi tlhelo ra le mutini, va ka Benjamini va sala exikarhi ka Vaisraele, kutani va dlayeteriwa. ₄₃Vaisraele va rhendzela va ka Benjamini, va va hlula, va va hlongorisa ku sukela eNoha ku ya fika etindhawini ta le vuxeni ku langutana na Gibeya. ₄₄Vavanuna va ka Benjamini lava dlayiweke a va ri 18 000, hinkwavo va ri tinhenha ta matimba. ₄₅Van'wana va ka Benjamini va hundzuluka va kongoma eribyeni ra Rimoni hi tlhelo ra le mananga. Eka vona, Vaisraele va dlayela 18 000 emagondzweni; Vaisraele va ya emahlweni va hlongorisa va ka Benjamini ku ya fika eGidomo, kutani va dlaya van'wana va 2 000. ₄₆Masocha ya ka Benjamini lama dlayiweke siku rero a ma ri 25 000, hinkwawo ma ri tinhenha ta matimba. ₄₇Kambe vavanuna va 600 va kotile ku baleka va kongoma emananga, va ya tshama eribyeni ra Rimoni ku ringana tin'hweti ta mune. ₄₈Hiloko vavanuna va Israele va ya va ya hlasela va ka Benjamini lava saleke, va dlayetela vanhu ni swifuwo ni hinkwaswo leswi a va hlangana na swona. Miti hinkwayo leyi va nga yi kuma, va yi hisa hi ndzilo.