Esaya 63

₁Xana munhu loyi a taka a huma eBosira etikweni ra Edomu,

a nga va a ri mani xana?

Xana i mani loyi a taka a bombile hi swiambalo swo tshwuka swi ku júú, xana?

La kandziyaka hansi hi matimba lamakulu, i mani ke?

“Hi mina HOSI, mina ndzi nga ni matimba yo ponisa,

ndzi ta ndzi ta tivisa leswaku ndzi hlurile.”

₂Xana leswo tshwuka leswi tlhambukeleke swiambalo swa wena i ntswini ke?

Hikwalaho ka yini nkhancu wa wena wu fana ni wa loyi a pyanyaka mihandzu ya vhinya exikhuvutelweni xana?

₃“Ina, ndzi huma eku pyanyeni ka vhinya, ndzi tirhe ndzi ri ndzexe,

a ndzi pfuniwanga hi munhu.

Eku kariheni ka mina, ndzi pyanyeterile vanhu va matiko man'wana,

ndzi va kandziyerile evukarini bya mina,

kutani ngati ya vona yi tlhambukele swiambalo swa mina

yi swi thyakisa hinkwaswo.

₄A ndzi tiyimiserile ku rihiseta esikwini rero,

nkarhi wa ku kutsula vanhu va mina, a wu fikile.

₅Ndzi lavile matlhelo hinkwawo, ndzi nga kumi loyi a nga ndzi pfunaka;

ndzi hlamarile ku vona leswaku a ku ri hava vo ndzi seketela;

hiloko ndzi tirha hi matimba ya mina,

ndzi tiseketela hi vukari bya mina.

₆Eku hlundzukeni ka mina, ndzi kandziyerile vamatiko,

ndzi va fayetela hi vukari bya mina,

ngati ya vona, ndzi yi halatela hansi.”

₇Ndzi nga ka ndzi nga rivali rirhandzu ro tshembeka ra HOSI Xikwembu,

ni mintirho ya xona leyi dzunekaka;

ndzi ta anakanya hinkwaswo leswi xi nga hi endlela swona, hina Vaisraele,

ni vunene lebyikulu lebyi xi nga hi komba byona,

endzalweni ya musa wa xona ni tintswalo ta xona.

₈HOSI Xikwembu xi te: “Lava i vanhu va mina hakunene,

va nga ka va nga ndzi kanganyisi!”

Hikokwalaho, xi vile muponisi wa vona

₉emaxangwini ya vona hinkwawo;

a va ponisiwanga hi murhumiwa kumbe ntsumi,

xi va ponisile hi xoxe.

Xi va twele vusiwana, xi va kutsula hi rirhandzu ra xona,

eminkarhini hinkwayo leyi hundzeke, xi va vukarhile, xi va hlayisa.

₁₀Kambe Vaisraele va tiarisile,

va khunguvanyisa Moya wa xona lowo Kwetsima,

kutani xona xi hundzuka nala wa vona,

xi lwa na vona hi xiviri.

₁₁Hiloko vanhu va xona va sungula ku tsundzuka

minkarhi ya khale, emasikwini ya Muxe,

kutani va ku:

“Xana HOSI Xikwembu lexi humeseke varhangeri va vanhu va xona ematini ya lwandle, xi kwihi xana?

Hi vula xona lexi xi va nyikeke Moya wa xona lowo Kwetsima!

₁₂Xikwembu lexi tiyiseke Muxe hi matimba ya xona,

xi avanyisa ni mati ya lwandle hi le xikarhi emahlweni ka Vaisraele,

leswaku vito ra xona ri ta ka ri nga rivariwi,

₁₃xona Xikwembu lexi tsemakanyiseke Vaisraele hi le xikarhi ka swidziva,

xana sweswi, xi kwihi ke?

A va famba kukota hanci leyi tsutsumaka erivaleni;

a va kalanga va khuguka.

₁₄Moya wa HOSI Xikwembu wu va nyikile ku wisa,

va kota tihomu leti rhelelaka enkoveni;

vanhu va xona xi va rhangerile hi mukhuva wolowo,

leswaku vito ra xona ri ta dzunisiwa.”

₁₅“We HOSI, hi langute u ri ematilweni laha u tshamaka kona,

exivandleni xa wena lexo kwetsima, xo saseka.

Xana ku hiseka ka wena ni matimba ya wena, swi kwihi ke?

Xana u alela yini ku hi twela vusiwana, u hi komba tintswalo, xana?

₁₆Tata wa hina, hi wena HOSI,

hikuva Abrahama a nga ha hi tivi,

hambi a ri Yakobo, ú hi rivarile.

Hi wena tata wa hina,

ku sukela khale, hi ku thyile vito ra ‘Mukutsuri’!

₁₇We HOSI, xana u hi tshikele yini hi hambuka endleleni ya wena,

u tlhele u nonon'hwisa timbilu ta hina leswaku hi nga ha chavi, xana?

Tlhela u vuya, u nga tshiki malandza ya wena,

va nga vanhu va tinyimba ta Israele ndzhaka ya wena.

₁₈Tempele ya wena, yi vile ya hina vanhu va wena lavo hlawuleka,

kambe a swi hetanga nkarhi, hikuva valala va hina va yi mbundzumuxile yi wa.

₁₉Sweswi swi endla wonge a wu si tshama u va mupfuni wa hina,

ho fana ni vanhu lava nga riki va wena.”