Esaya 28

₁Yi ni khombo, harhi leyi swidakwa swa ka Efrayimi swi tinyungubyisaka ha yona:

Swiluva swa yona swi ta vuna!

Wu ni khombo muti wa vanhu vo hluriwa hi hinyo,

lowu akiweke enhlohlorhini ya ntshava,

lowu langutanaka ni masimu layo nona:

₂N'wini wa hinkwaswo ú ta rhumela nhenha ya matimba ku ya wu hlasela;

yi ta wu yela ku fana ni xihangu ni xidzedze lexo chavisa;

yi ta wisetela hinkwaswo hi tihanyi

kukota ndhambi ya mati.

₃Harhi leyi swidakwa swa ka Efrayimi swi tinyungubyisaka ha yona,

yi ta kandziyeriwa;

₄swiluva swa yona swi ta vuna!

Muti lowu akiweke enhlohlorhini ya ntshava, lowu langutanaka ni masimu layo nona,

wu ta fana ni makuwa ya matatana

lawa loko vanhu va ma vona, va ma tsutsumelaka, va kha va dya.

₅Enkarhini wolowo, HOSI ya matimba hinkwawo

yi ta va harhi leyo dzuneka

etinhlokweni ta masalela ya vanhu va yona,

yi ta va xidlodlo lexi va nga ta bomba ha xona.

₆HOSI Xikwembu xi ta nyika vaavanyisi moya wo avanyisa timhaka hi ku lulama,

lava rindzaka muti leswaku wu nga hlaseriwi, xi ta va tiyisa.

₇Vaprista ni vaprofeta, na vona va rhurhumela hi mhaka ya vhinyo,

va dedeleka-dedeleka hi byalwa;

vhinyo yi va hlanganisile nhloko,

byalwa bya va dedelekisa;

hikokwalaho swivono a va ha koti ku swi hlamusela,

va tsandzeka ni ku avanyisa timhaka.

₈Matafula hinkwawo ma lo pyì, hi mahlanta,

ku pfumaleka ni xindhawana lexi baseke.

₉Vanhu lava va ndzi sandza, va ku:

“Xana munhu loyi u dyondzisa vamani,

leswi a swi vulavulaka, u swi hlamusela vamani, xana?

Ú hi endla wonge ho va tindzumulo,

wonge ha ha ku tshikisiwa ku mama!

₁₀Loko ri xile, ho twa mhaka yin'we ya ‘swiletelo’,

yi hundzuke risimu ra chela, yi hlayiwa yi vuyeleriwa,

yi hlayiwa hi ku nonoka.”

₁₁Sweswi HOSI Xikwembu xi ta vulavula ni vanhu lava

hi ku tirhisa vanhu vambe, lava vulavulaka ririmi leri nga twisisekiki;

₁₂xi va byerile xi ku: “Tshamani mi wisa,

lava karheleke, va tshikeni va wisa,

hikuva lowu i nkarhi wo koka moya.”

Kambe a va xi yingisanga.

₁₃Hikokwalaho, vanhu lava va ta wa hi xikosi, va vaviseka,

loko va twa HOSI Xikwembu xi va byela swo leswi va swi vuleke, loko va ku:

“Ho twa mhaka yin'we ya ‘swiletelo’,

yi hlayiwa yi vuyeleriwa,

yi hlayiwa hi ku nonoka.”

Va ta tsutsuma,

kambe va ta hlongorisiwa, va khomiwa.

₁₄N'wina mi fumaka vanhu emutini lowu wa Yerusalema,

mi tolovele ngopfu ku sandza,

hikokwalaho, yingisani rito ra HOSI Xikwembu.

₁₅Mi tidzunisa, mi ku mi endlile ntwanano ni rifu,

ni leswaku xivandla xa vafi i munghana wa n'wina;

mi tshemba leswaku khombo lero chavisa leri taka

ri ta hundza hi le kule,

hikuva mi teka mavunwa mi ma endla khokholo,

mi tiendlela xisirhelelo hi ku xisa van'wana.

₁₆Kambe HOSI N'wini wa hinkwaswo ú vurisa sweswo, ú ri:

“Vonani, ndzi le ku vekeni ka masungulo lama tiyeke emutini wa Siyoni,

ri nga ribye ra yinhla leri sasekeke.

Loyi a tiseketelaka ha rona,

a nga ka a nga tsekatseki.

₁₇Ku avanyisa ka mina lokunene ni ku lulama ka mina

ku ta fana ni ngoti leyi vaaki va pimaka khumbi ha yona.”

Mavunwa lawa mi ma endlaka khokholo ra n'wina, ma ta kukuriwa hi mpfula ya xihangu,

ndhambi yi ta khubumeta xisirhelelo xa n'wina.

₁₈Kutani ntwanano wa n'wina ni rifu wu ta herisiwa,

ni xinakulobye xa n'wina ni xivandla xa vafi xi nga ka xi nga ha vi kona.

Loko khombo lero chavisa ri humelela,

mi ta wiseriwa hansi, mi kandziyeriwa.

₁₉Khombo ra kona a ri nga mi hundzi,

ri ta mi tela vusiku ni nhlekanhi,

siku rin'wana ni rin'wana;

loyi a hlamuseriwaka ta khombo leri,

u ta chava ngopfu!

₂₀Mi ta fana ni munhu wo leha la etlelaka emubedweni wo koma, a nga koti ku nava milenge,

loyi a tifunengetaka hi xinkumbana lexi nga n'wi ringaniki.

₂₁HOSI Xikwembu xi ta ta ku fana ni le ntshaveni ya Perasimi,

xi ta va xi hlundzukile ku fana ni le rivaleni ra Gibeyoni;

xi ta xi ta endla leswi xi faneleke ku swi endla, hambileswi swi nga tolovelekangiki,

xi ta tirha ntirho wa xona, hambileswi wu nga ta hlamarisa vanhu.

₂₂Hikokwalaho, tshikani ku sandza,

hikuva mi nga ya mi bohiwa ku tlula mpimo;

ndzi twile N'wini wa hinkwaswo, HOSI ya matimba hinkwawo,

yi bona makungu yo herisa tiko hinkwaro.

₂₃Rhiyani ndleve, mi yingisa leswi ndzi swi vulaka,

twanani marito lawa ndzi mi byelaka wona.

₂₄Xana murimi, wo tshamela ku rima kambe a nga byali nchumu xana?

Xana nkarhi hinkwawo, wo tshamela ku pfumpfunya a lunghisa misava xana?

₂₅E-e! Loko a fayeterile mabuwu,

ú haxa mbewu ya aneta ni ya kumini,

kasi mbewu ya koroni yona u yi byala hi tinxaxa,

a byala ni maxalana endhawini ya wona,

a teka yin'wana mbewu, a yi byala lomu makumu ka nsimu.

₂₆Murimi wo tano ú endlisa sweswo, hikuva ú leteriwa hi ndlela leyinene,

Xikwembu xa yena xa n'wi dyondzisa.

₂₇Ntshovelo wa aneta a wu huriwi hi xileyi,

kambe wu huriwa hi nhonga,

hambi wu ri ntshovelo wa kumini, a wu huriwi hi vhilwa,

wu huriwa hi nhonga.

₂₈Hambi yi ri koroni a yi huriwi tindzhoho ta kona ti kondza ti fayeteleka;

vhilwa ro hula ha rona leri kokiwaka hi hanci, ri fambisiwa kahle, ri nga fayeteli tindzhoho.

₂₉Vutivi lebyi hinkwabyo byi huma eka HOSI ya matimba hinkwawo,

yona mutsundzuxi wo hlamarisa,

loyi a nga ni vutlhari lebyi tlulaka swilo hinkwaswo.