Xikwembu xi ta ba tiko ra Egipta
1Lawa i mahungu hi tlhelo ra tiko ra Egipta.
Vonani, HOSI Xikwembu xa ta,
xi ta hi papa ra rivilo swinene, xi tela Vaegipta;
swifaniso swa swikwembu swa Vaegipta swi ta rhurhumela emahlweni ka xona,
hambi va ri vona Vaegipta va ta hela matimba hi ku chava.
2HOSI Xikwembu xi ri:
“Ndzi ta endla leswaku Vaegipta va lwa,
va dlayana hi xivona,
hambi vaakelani va ta tshamela ku lwa,
muti wun'wana wu ta ya hlasela wun'wana,
hosi yin'wana yi ta lwa ni hosi yin'wana.
3Vaegipta va ta helela hi vutlhari bya vona,
makungu ya vona ndzi ta ma pfilunganya,
va ta ya vutisa timhaka eka swifaniso swa swikwembu ni le ka vanyamusoro,
eka lava nga ni swikwembu, ni le ka swingomantanda.
4Ndzi ta nyiketa Vaegipta emavokweni ya munhu wo karhata ngopfu, a va mufumi wa vona;
va ta rhangeriwa hi hosi yo kariha swinene.
Mina N'wini wa hinkwaswo, Hosi ya matimba hinkwawo, ndzi vula sweswo.”
5Mati ya nambu wa Nilo ma ta phya,
nambu wu ta sala wu omile, wu nga ha ri na nchumu.
6Migerho leyi sukaka enambyeni wa Nilo yi ta nun'hwa,
swinambyana swa le Egipta swi ta phya swi oma,
nhlanga ni majekejeke swi ta vuna.
7Eribuweni ra Nilo ku ta sala rivala ntsena,
swilo hinkwaswo leswi byariweke kona, swi ta oma,
kutani moya wu ta swi hahisa, swi nyamalala.
8Vaphasi va tinhlampfi va ta rila swinene,
hinkwavo lava njovelaka kunene,
ni lava kukutaka hi ritavala,
va ta hela matimba.
9Vatirhi lava lunghisaka byewu bya ntsembyani,
ni lava va byi lukaka, va ta hela ntamu hi ku chava.
10Van'wankumi etikweni va ta lahlekeriwa hi swa vona,
lava thoriweke va ta xaniseka hinkwavo.
11Varhangeri va muti wa Sowani i swiphukuphuku,
vatsundzuxi va Faro lavo tlhariha, va n'wi nyika switsundzuxo swo ka swi nga pfuni nchumu;
va byela hosi Faro, va ku: “Hina hi dyondzisiwile hi tintlhari,
hi leteriwile hi tihosi ta khale!”
12We Faro, tintlhari ta wena ti kwihi xana?
A ti ku tivise leswi HOSI Xikwembu xi lavaka ku swi endla tiko ra Egipta.
13Varhangeri va muti wa Sowani va hundzuke swiphukuphuku,
varhangeri va muti wa Nofu va xisana;
vona lava tiko ra Egipta ri tiyaka ha vona,
va ri lahlekisa.
14HOSI Xikwembu xi pfilunganyisile miehleketo ya vona,
xi tsekatsekisa tiko, a ra ha humeleli;
ri dedeleka ku fana ni xidakwa
lexi rhetisaka hi mahlanta ya xona.
15Etikweni ra Egipta, a ku nga ha vi na lexi nga ta endliwa,
hi mufuwi kumbe xisiwana,
hi munhu lontsongo kumbe lonkulu.
Vaegipta va ta gandzela Xikwembu
16Nkarhi wa ta lowu Vaegipta va nga ta rhurhumela hi ku chava ku fana ni vavasati, loko va vona HOSI ya matimba hinkwawo yi tlakusile voko, yi lava ku va ba. 17Vaegipta va ta ri chava ngopfu tiko ra Yuda. Loko munhu o tshuka a kumbukile tiko ra Yuda emahlweni ka Vaegipta, va ta rhurhumela hinkwavo, hikwalaho ka makungu lawa HOSI ya matimba hinkwawo yi nga na wona ehenhla ka vona.
18Enkarhini wolowo, etikweni ra Egipta, ku ta va ni miti ya ntlhanu leyi vaaki va yona va nga ta vulavula Xiheveru, va tiboha ku tirhela HOSI ya matimba hinkwawo. Wun'wana wa miti leyi wu ta vuriwa “Muti-wa-Dyambu”.
19Enkarhini wolowo, ku ta va ni alitari ya HOSI Xikwembu exikarhi ka tiko ra Egipta, ni ribye ra xona ra xitsundzuxo endzilekaneni wa kona. 20Swilo leswi swi ta va xikombiso ni vumbhoni bya leswaku HOSI ya matimba hinkwawo yi kona etikweni ra Egipta. Loko Vaegipta va huwelela eka yona hikwalaho ka lava va va xanisaka, yi ta va rhumela mulamuleri loyi a nga ta va sirhelela ni ku va ponisa. 21HOSI Xikwembu xi ta tikombisa eka Vaegipta; kutani ku sukela esikwini rero, Vaegipta va ta hamba va xi tiva, va xi tirhela hi ku xi humesela magandzelo ni tinyiko; loko va tiboha hi ku hlambanya ku humesela HOSI Xikwembu xilo xin'wana, va ta endla hilaha va hlambanyeke hakona. 22HOSI Xikwembu xi ta ba tiko ra Egipta. Xi ta ri ba xi tlhela xi ri horisa; Vaegipta va ta tlhelela eka xona, kutani xi ta yingisa ku tisola ka vona, xi va horisa.
23Enkarhini wolowo, ku ta va ni gondzo lerikulu leri sukelaka le Egipta ri kongoma le Asiriya. Vaasiriya ni Vaegipta va ta fambelana, va hamba va khongela swin'we.
24Enkarhini wolowo, tiko ra Israele ri ta ringana ni tiko ra Egipta ni ra Asiriya hi matimba, kutani misava hinkwayo yi ta katekisiwa hikwalaho ka matiko lawa manharhu, 25hikuva wona ma ta va ma katekisiwile hi HOSI ya matimba hinkwawo, yi ku: “A ku katekisiwe Vaegipta, vona vanhu va mina, ni Vaasiriya, lava ndzi va vumbeke, ni Vaisraele, yona ndzhaka ya mina.”
