Xikwembu xi ta ba tiko ra Etiyopiya
1Ku ni tiko leri pfumaka hi switsotso,
ri nga tiko ra Etiyopiya leri nga ntsungeni wa milambu,
2leri rhumaka vayimeri va rona ematikweni,
va famba enambyeni wa Nilo hi mabyatso yo lukiwa hi tinhlanga.
N'wina varhumiwa vo famba hi ku hatlisa,
mukani mi tlhelela eka vanhu va ka n'wina vo leha, vo saseka,
lava chaviwaka emisaveni hinkwayo,
va nga vanhu vo tiya, lava tivaka ku lwa,
lava milambu yi tsemakanyaka hi le tikweni ra vona.
3N'wina hinkwenu mi akeke emisaveni,
n'wina mi tshamaka ematikweni,
langutani mujeko lowu yimisiweke etintshaveni,
rhiyani ndleve mi twa ku ba ka mhalamhala,
4hikuva HOSI Xikwembu xi ndzi byerile xi ku:
“Ndzi ta languta matiko ndzi ri evutshan'wini bya mina,
ndzi timiyelerile ku fana ni ku hisa ka dyambu hi ximumu,
kumbe mberha leyi waka enkarhini wa xirimo.
5Loko swiluva swa vhinya swi dzudzekile,
ni mihandzu ya kona yi sungula ku vupfa ntshovelo wu nga si fika,
swirhabyana leswi nga tswalangiki swi ta khutuleriwa hi mikwana,
ni marhavi lama hangalakeke ma ta tsemiwa ma cukumetiwa.
6Na yona mintsumbu hinkwayo ya Vaetiyopiya
yi ta nyiketiwa eka makoti ya le tintshaveni
ni ka swiharhi swa nhova;
yi ta dyiwa hi makoti enkarhini wa ximumu,
swiharhi swi ta yi dya enkarhini wa xixika.”
7Enkarhini wolowo, vanhu lavo leha, vo saseka,
lava chaviwaka emisaveni hinkwayo,
va nga vanhu vo tiya, lava tivaka ku lwa,
lava milambu yi tsemakanyaka hi le tikweni ra vona,
va ta yisa tinyiko ta vona entshaveni ya Siyoni,
laha HOSI ya matimba hinkwawo yi gandzeriwaka kona.
