Hosiya 1

₁Lawa i marito lawa HOSI Xikwembu xi ma rhwexeke Hosiya n'wana Beri, eminkarhini ya Uziya, na Yotamu, na Akazi, na Hezekiya, tihosi ta Yuda, na Yerobuwamu n'wana Yowasi, hosi ya Israele.

₂Loko HOSI Xikwembu xi sungula ku rhwexa Hosiya marito ya xona, xi te ka yena: “Leswi tiko ri endlaka vunghwavava lebyikulu hi ku fularhela mina HOSI, na wena yana u ya titekela nsati loyi a nga nghwavava, a ta ku velekela vana vo fana na yena.” ₃Hiloko Hosiya a ya a ya titekela Gomere n'wana Diblayimi, kutani Gomere a tika, a veleka n'wana wa mufana.

₄Kutani HOSI Xikwembu xi ku ka Hosiya: “N'wi thye vito ra Yizriele, hikuva ku nga ri khale, ndzi ta ba va ka Yehu hikwalaho ka ngati leyi va yi halateke eYizriele, ndzi herisa ni mfumo wa Israele. ₅Hi siku ra kona, ndzi ta tshova vurha bya Israele erivaleni ra Yizriele.”

₆Gomere a engeta a tika, a veleka n'wana wa nhwanyana. Kutani HOSI Xikwembu xi ku ka Hosiya: “N'wi thye vito ra Lo-Ruhama” (hileswaku: “La nga tsetseleriwangiki”), “hikuva ku sukela sweswi, vanhu va tiko ra Israele a ndzi nga ha va tsetseleri, ni ku va rivalela a ndzi nga ha va rivaleri. ₇Kambe vanhu va tiko ra Yuda vona, ndzi ta va tsetselela mina HOSI Xikwembu xa vona, ndzi va ponisa. A ndzi nga ha va ponisi hi swa tinyimpi swo fana ni vurha, kumbe fumu, kumbe tihanci, hambi va ri vagadi va tihanci.”

₈Loko Gomere a lumurile Lo-Ruhama, a tika, a veleka n'wana wa mufana. ₉Kutani HOSI Xikwembu xi ku: “N'wi thye vito ra Lo-Ami” (hileswaku: “Lava nga riki vanhu va mina”), “hikuva a mi vanhu va mina, naswona a ndzi nga ha vi Xikwembu xa n'wina.”

₁₀Hambiswiritano, vanhu va tiko ra Israele va ta tala ku fana ni sava ra lwandle leri nga pimekiki, ni ku hlayeka ri nga hlayekiki. Endhawini leyi va nga tshama va byeriwa leswaku “A mi vanhu va mina”, va ta vuriwa “Vana va Xikwembu lexi hanyaka.” ₁₁Kutani vanhu va tiko ra Yuda ni va tiko ra Israele va ta hlengeletana, va tihlawulela murhangeri un'we; kutani va ta kula va ndlandlamuka, hikuva ri ta va lerikulu siku ra Yizriele.