Habakuku 1

₂Xana ndza ha ta rila eka wena ku fikela rini,

u nga yingisi, we HOSI,

ni ku huwelela eka wena, ndzi ku: “Ha xaniseka!”

kambe u nga hi lamuleli, ke?

₃Hikwalaho ka yini u ndzi komba mahlori layo tano ke?

Xana maxangu ya kona u nga ma languta ntsena xana?

Vanhu va onhaka ni ku xanisana emahlweni ka mina;

va tengisana etihubyeni, va pfuxa timholovo.

₄Kutani nawu a wa ha tirhi,

timhaka a ta ha avanyisiwi hi ku lulama, ni siku ni rin'we.

Lavo biha va tlharihela lavo lulama,

kutani timhaka ti avanyisiwa hi ndlela yo homboloka.

₅“Langutani swa le matikweni man'wana, mi swi xiyisisa;

hlamalani, mi hlamarisisa,

hikuva ndzi le ku tirheni eminkarhini ya n'wina,

ntirho wa kona a mi nga wu kholwi loko va mi tivisa wona.

₆Ndzi yingiseni ke: Ndzi karhi ndza pfuxa Vakalediya,

rixaka leri ro leva, ra xihatla.

Va handzula mananga ma sala ma hlangana,

va ya phangha matiko lama nga riki ya vona.

₇Vanhu lava va chavisa hakunene, va tshukisa ngopfu.

Va avanyisa timhaka ni ku fambisa vuhosi bya vona va nga vutisanga munhu.

₈Tihanci ta vona ti tlula tiyingwe hi ku tsutsuma,

ti hisekela ku lwa ku tlula mahlolwa lama hlotaka nivusiku;

eku tsutsumeni ka tona ti paletela ni misava!

Vagadi va tona va pfa hi le matikweni ya le kule,

va haha ku fana ni makoti lama bvungaka swakudya.

₉Hinkwavo va tela ku ta xanisa vanhu,

tinghohe ta vona ti kongoma emahlweni,

va vuya ni mahlonga

yo ringana sava ra lwandle hi ku tala.

₁₀Va sola tihosi;

tindhuna, va tlanga ha tona.

Makhokholo hinkwawo a hi nchumu eka vona,

hikuva va fumbetela tinhulu ta misava, va khandziya ha tona ekhokholweni va ri phangha.

₁₁Kutani va hundzela emahlweni ku fana ni xihuhuri,

va nyamalala.

Va ni nandzu vanhu lava;

matimba ya vona, va ma endla xikwembu xa vona.”

₁₂Xana a hi wena la nga HOSI ku sukela emasungulweni ya hinkwaswo xana,

wena Xikwembu xanga ni Muhlawuleki wanga, wena la nga riki na ku fa, xana?

Wena HOSI, u hlawurile Vakalediya ku hi avanyisa;

wena Ribye ra masungulo, u va vekile ku hi tshinya.

₁₃Mahlo ya wena a ma tsakeli ku hlalela leswo biha, hikuva ma tengile ngopfu;

a wu languti leswo biha, u nga endli nchumu.

Kutani ke, hikwalaho ka yini u languta ntsena vaxisi,

u miyelela yini loko lavo biha va mita vanhu-kulobye lava lulameke ku tlula vona ke?

₁₄U vumba vanhu va fana ni tinhlampfi ta lwandle,

kumbe swikokovi swo pfumala mufambisi.

₁₅Vakalediya va ringela vanhu hinkwavo hi swinjovo tanihi tinhlampfi;

va va tsavula hi tinkoka ta vona,

va va hlengeleta hi masole ya vona,

kutani va cina hi ku tsaka.

₁₆Hikokwalaho, va humesela tinkoka ta vona emagandzelo,

va hisela masole ya vona emirhi ya risuna;

hikuva ha swona Vakalediya va hanya emafurheni,

eswakudyeni leswo xawula.

₁₇Xana Vakalediya va ta tshamela ku hlengeleta leswi phasiweke hi tinkoka ta vona ke?

Xana va ta dlaya vanhu va matiko hi tihanyi hilaha ku nga heriki xana?