Genesa 30

₁Kuteloko Rahele a vona leswaku a nga kumi vana, a sungula ku vondzoka Leya, kutani a ku ka Yakobo: “Ndzi nyike vana, loko swi nga ri tano, mina ndzi ta tidlaya!” ₂Kutani Yakobo a hlundzukela Rahele a ku ka yena: “Xana mina ndzi nga tirha ntirho lowu tirhiwaka hi Xikwembu xana? Hi xona xi endleke leswaku u nga kumi vana!” ₃Kutani Rahele a ku: “Biliha nandza wa mina hi loyi, etlela na yena leswaku a ta ndzi velekela vana, lava nga ta va va mina.” ₄Hiloko Rahele a teka Biliha nandza wa yena a n'wi nyika Yakobo leswaku a va nsati wa yena. Kutani Yakobo a tivana na yena. ₅Biliha a tika a velekela Yakobo n'wana wa mufana, ₆kutani Rahele a ku: “Xikwembu xi ndzi avanyisele mhaka, xi yingise xikombelo xa mina, kutani xi ndzi nyika n'wana wa mufana.” Kutani Rahele a n'wi thya vito ra Dani (hileswaku: “Ku avanyisela”). ₇Biliha nandza wa Rahele a engeta a tika nakambe, kutani a velekela Yakobo n'wana wa vumbirhi wa mufana, ₈kutani Rahele a ku: “Mina ni makwerhu Leya hi lwile ngopfu, kambe mina ndzi hlurile.” Kutani n'wana loyi a n'wi thya vito ra Neftali (hileswaku: “Ku lwa”).

₉Kuteloko Leya a vona leswaku a nga ha kumi vana, a teka nandza wa yena Zilipa a n'wi nyika Yakobo leswaku a va nsati wa yena. ₁₀Hiloko Zilipa nandza wa Leya a velekela Yakobo n'wana wa mufana, ₁₁kutani Leya a ku: “Ndzi katekile!”, kutani a n'wi thya vito ra Gadi (hileswaku: “Ku kateka”). ₁₂Zilipa nandza wa Leya a engeta a velekela Yakobo n'wana wa vumbirhi wa mufana, ₁₃kutani Leya a ku: “Ndzi tsakile ngopfu! Vavasati va ta ndzi vitana munhu wa ntsako.” Kutani a thya n'wana loyi vito ra Asere (hileswaku: “Ntsako”).

₁₄Enkarhini wa ku tshovela koroni, Rhuveni a ya emasin'wini, kutani a kuma marhanga ya rirhandzu; hiloko a muka na wona a ya nyika mana wa yena Leya. Kutani Rahele a ku ka Leya: “Ndzi kombela leswaku u ndzi pambulela marhanga ya rirhandzu lawa n'wana wa wena a vuyeke na wona.” ₁₅Kutani Leya a ku ka Rahele: “Xana i mhaka yitsongo eka wena leswi u nga ndzi tekela nuna xana? Wa ha lava ni ku ndzi tekela marhanga ya rirhandzu ya n'wananga xana?” Rahele a hlamula a ku: “Loko wo ndzi pambulela marhanga ya rirhandzu ya n'wana wa wena, Yakobo a nga ta a ta etlela na wena vusiku bya namuntlha hikokwalaho ka marhanga ya n'wana wa wena.” ₁₆Madyambu wolawo loko Yakobo a vuya hi le masin'wini, Leya a n'wi hlanganisa a ku ka yena: “U fanele ku ta u ta etlela na mina, hikuva ndzi ku xavile hi marhanga ya rirhandzu ya n'wananga.” Kutani Yakobo a tivana na Leya vusiku byebyo. ₁₇Kutani Xikwembu xi hlamula xikhongelo xa Leya, a tika, a velekela Yakobo n'wana wa mufana wa vuntlhanu. ₁₈Leya a ku: “Xikwembu xi ndzi nyikile hakelo ya mina, hikuva ndzi nyiketile nandza wa mina eka nuna wa mina.” Kutani n'wana loyi a n'wi thya vito ra Isakara (hileswaku: “Hakelo”). ₁₉Kutani Leya a engeta a tika, a velekela Yakobo n'wana wa mufana wa vu-6. ₂₀Kutani Leya a ku: “Xikwembu xi ndzi nyikile nyiko yo saseka, kutani nuna wa mina ú ta ndzi khoma kahle, hikuva ndzi n'wi velekerile majaha ya 6.” Kutani a thya n'wana loyi vito ra Zebuloni (hileswaku: “Nyiko” kumbe “Ku khoma kahle”). ₂₁Endzhaku ka sweswo, Leya a kuma n'wana wa nhwanyana, kutani a n'wi thya vito ra Dina.

₂₂Kutani Xikwembu xi tsundzuka Rahele, xi hlamula xikhongelo xa yena, xi endla leswaku a kuma vana. ₂₃Kutani a tika, a veleka n'wana wa mufana, kutani a ku: “Xikwembu xi susile tingana ta mina.” ₂₄Kutani a n'wi thya vito ra Yosefa (hileswaku: “Ku engeta”), a ku: “Mawaku loko HOSI yi nga engeta yi ndzi nyika n'wana un'wana wa mufana!”

₂₅Kuteloko Rahele a velekile Yosefa, Yakobo a ku ka Labani: “Ndzi pfumelele ndzi famba ndzi ya eka hina etikweni ra rikwerhu. ₂₆Ndzi nyike vasati va mina lava ndzi va tirheleke eka wena, u ndzi nyika ni vana va mina, kutani u ndzi tshika ndzi famba, hikuva ntirho lowu ndzi ku endleleke wona, wa wu tiva.” ₂₇Kambe Labani a ku ka Yakobo: “Yingisa ndzi ku byela: Ndzi hlahluvile ndzi kuma leswaku HOSI yi ndzi katekisile hikwalaho ka wena. ₂₈Ndzi byele leswaku u lava ndzi ku hakela hi yini, ndzi ta ku nyika.” ₂₉Yakobo a ku ka Labani: “Hi wena u tivaka hilaha ndzi ku tirheleke hakona, ni hilaha ndzi ku hlayiseleke swifuwo swa wena hakona. ₃₀Loko mina ndzi nga si fika, a wu ri ni swifuwo switsongo, kambe sweswi swi andzile ngopfu. HOSI yi ku katekisile eka hinkwaswo leswi a ndzi swi tirha, kambe mina ndzi ta sungula rini ku tirhela muti wa mina xana?” ₃₁Labani a ku: “Xana ndzi nga ku nyika yini xana?” Yakobo a hlamula a ku: “U nga ndzi nyiki nchumu! Mina ndzi nga ya emahlweni ndzi ku hlayisela ntlhambi wa wena, ndzi wu risa, kambe hi fanele ku twanana emhakeni leyi: ₃₂Namuntlha ndzi pfumelele ku nghena exikarhi ka ntlhambi wa wena hinkwawo, ndzi susetela tinyimpfu hinkwato leti nga ni mavalavala kumbe ta ntima, ndzi susa ni timbuti hinkwato ta mavalavala. Leyi hi yona hakelo ya mina. ₃₃Siku u nga ta ta u ta vona leswi u ndzi hakeleke hi swona, ku tshembeka ka mina ku ta tikomba. Loko u kuma ndzi ri ni mbuti leyi yi nga riki na mavalavala, kumbe nyimpfu leyi nga riki ya ntima exikarhi ka ntlhambi, u swi hlaya swi ri leswi ndzi nga ta va ndzi lo swi yiva.” ₃₄Labani a ku: “Hiswona! A swi ve hilaha u vuleke hakona.” ₃₅Kambe siku rero, Labani a hlawula swiphongho leswi nga ni mavalavala, ni mathokazi lama nga ni mavalavala, a swi susa exikarhi ka timbuti; a susa ni tinyimpfu ta ntima, kutani a swi nyiketa vana va yena leswaku va swi risa. ₃₆Kutani Labani a tihambanyisa na Yakobo hi mpfhuka wo ringana riendzo ra masiku manharhu. Kutani Yakobo a risa ntlhambi lowun'wana wa Labani hinkwawo.

₃₇Kutani Yakobo a tsema minkhavi ya murhi wa nsihani ni wa “alimondi” ni wa xirhombe-rhombe, a yi kwamula byewu, a siya minkhwati-nkhwati yo basa. ₃₈Kutani a teka minkhavi leyi a yi kwamuleke byewu, a ya yi veka emahlweni ka swifuwo, endzeni ka switsengele leswi swi nwelaka eka swona mati, hikuva swifuwo loko swi ta eku nweni ka mati a swi khandziyana. ₃₉Kutani loko swifuwo swi khandziyana emahlweni ka minkhavi leyi, a swi tswala vana va mavalavala ni va minkhwati-nkhwati. ₄₀Kutani Yakobo a hambanyisa swinyimpfana leswi ni ntlhambi. Yakobo a tlhela a langutanisa tinyimpfu ta Labani ni leta minkhwati-nkhwati ni leta ntima, kutani hi ndlela leyi, Yakobo a tihlengeletela ntlhambi wa yena, a wu hambanyisa ni lowa ka Labani. ₄₁Minkarhi hinkwayo loko swifuwo leswo tiya swi khandziyana, Yakobo a a veka minkhavi emahlweni ka swona endzeni ka switsengele leswaku swi khandziyana exikarhi ka minkhavi leyi. ₄₂Kambe swifuwo leswo tsana Yakobo a a nga swi vekeleli minkhavi, hikokwalaho leswo tsana swi va swa Labani, kasi leswo tiya swi va swa yena Yakobo. ₄₃Hi ndlela leyi, Yakobo a va ni rifuwo lero tala swinene. A a ri ni mintlhambi leyikulu, ni malandza ya xinuna ni ya xisati, ni tikamela ni timbhongolo.