Genesa 21

₁HOSI Xikwembu xi katekisa Sara hilaha xi vuleke hakona, xi n'wi endlela leswi xi n'wi tshembiseke swona. ₂Kutani eku dyuhaleni ka Abrahama, Sara a tika, a n'wi velekela n'wana wa mufana hi nkarhi lowu Xikwembu xi wu tiviseke Abrahama. ₃Kutani Abrahama a thya n'wana loyi Sara a n'wi velekeleke yena evito ra Isaka. ₄Loko Isaka a ri ni masiku ya 8, tata wa yena Abrahama a n'wi yimbisa, hi ku landza xileriso xa Xikwembu. ₅Abrahama a a ri ni malembe ya dzana loko Isaka n'wana wa yena a velekiwa. ₆Kutani Sara a ku: “Xikwembu xi ndzi nyikile nkarhi wa ku hleka, kutani un'wana ni un'wana loyi a nga ta swi twa, ú ta hleka na mina.” ₇Sara a ya emahlweni a ku: “I mani loyi a a ta khorwisa Abrahama leswaku siku rin'wana mina Sara ndzi ta mamisa vana xana? Hi leswi, eku dyuhaleni ka yena ndzi n'wi velekerile n'wana wa mufana!”

₈Loko Isaka a kurile, a lumuriwa. Hi siku ra ku lumuriwa ka yena, Abrahama a endla nkhuvo lowukulu. ₉Kutani Sara a vona Iximaele n'wana Hagara lowa Muegipta na Abrahama, a ri karhi a tlanga na Isaka n'wana wa yena. ₁₀Hiloko Sara a ku ka Abrahama: “Hlongola wansati loyi wa hlonga ni n'wana wa yena, hikuva a ndzi lavi leswaku n'wana wa yena a dya ndzhaka swin'we na Isaka n'wananga.” ₁₁Mhaka leyi, Abrahama yi n'wi khunguvanyisile ngopfu, loko a ehleketa Iximaele n'wana wa yena. ₁₂Kambe Xikwembu xi ku ka Abrahama: “U nga tshuki u khunguvanyeka hikwalaho ka n'wana wa wena ni wansati lowa hlonga ra wena; endla xin'wana ni xin'wana lexi Sara a ku byelaka xona, hikuva Isaka hi yena a nga ta yisa vito ra wena emahlweni. ₁₃Loko a ri Iximaele n'wana wa wansati lowa hlonga, ndzi ta n'wi endla tiko lerikulu hikuva na yena i n'wana wa wena.” ₁₄Hiloko Abrahama a pfuka nimpundzu swinene, a teka xinkwa ni gula ra mati a rhwexa Hagara, a n'wi beburisa ni n'wana, kutani a n'wi hlongola. Hiloko Hagara a suka a famba a ya tsendzeleka emananga ya Berexeba.

₁₅Kuteloko mati ma herile eguleni, Hagara o teka n'wana wa yena a ya n'wi veka ehansi ka ximudyana xin'wana. ₁₆Kutani a suka laha a ku ri na n'wana a famba mpfhukanyana, a ya fika a tshama ehansi, hikuva a a ku: “A ndzi lavi ku vona ku fa ka n'wananga.” Kuteloko Hagara a ri kwale kule, n'wana a sungula ku rila.

₁₇Xirilo xa xifanyetana lexi xi fikile etindleveni ta Xikwembu, kutani ntsumi ya Xikwembu yi huwelela Hagara yi ri etilweni, yi ku ka yena: “Hagara, u karhata hi yini xana? U nga chavi hikuva Xikwembu xi twile xirilo xa xifanyetana kwale hansi ka ximudyana. ₁₈Suka u yima u ya tlakula xifanyetana, u nga xi tshiki, hikuva ndzi ta xi endla tiko lerikulu.” ₁₉Kutani Xikwembu xi pfula Hagara mahlo, a vona xihlovo; hiloko a tata gula ra yena hi mati, a nyika ni xifanyetana xi nwa. ₂₀Xikwembu xi va ni n'wana loyi, kutani a tikulela, a tshama emananga, a tiva swinene ku copa hi nseve. ₂₁A a tshama emananga ya Parani; kutani mana wa yena a ya n'wi tekela nsati etikweni ra Egipta.

₂₂Enkarhini wolowo, Abimeleke a ya eka Abrahama a ri na Pikolo mufambisi wa mavuthu ya yena, a fika a ku ka Abrahama: “Xikwembu xi na wena eka hinkwaswo leswi u swi endlaka; ₂₃hikokwalaho, ndzi kombela leswaku u ndzi tshembisa hi ku hlambanya emahlweni ka Xikwembu leswaku u nga ka u nga ndzi kanganyisi, mina ni vana va mina kumbe vatukulu va mina; ndzi tshembise leswaku leswi ndzi kombeke ku tshembeka ka mina eka wena, na wena u ta endla tano eka mina ni tiko ra mina leri u luveleke eka rona.” ₂₄Abrahama a hlamula a ku: “Ndzi ta hlambanya.”

₂₅Hiloko Abrahama a vilela eka Abimeleke hi mhaka ya xihlovo lexi malandza ya Abimeleke ma n'wi tekeleke xona. ₂₆Kutani Abimeleke a hlamula a ku: “A ndzi tivi leswaku i vamani va endleke mhaka leyi; hambi u ri wena a wu nga si tshama u ndzi byela mhaka leyi; mina ndzi yi twa ro sungula sweswi u ndzi hlamuselaka yona namuntlha.” ₂₇Hiloko Abrahama a teka tinyimpfu ni tihomu a nyika Abimeleke; kutani vavanuna lava vambirhi va endla xinakulobye. ₂₈Abrahama a hlawula swinyimpfana swa xisati swa 7 entlhambini, a swi veka etlhelo. ₂₉Kutani Abimeleke a vutisa Abrahama a ku: “Xana u kombisa yini hi swinyimpfana leswi swa xisati swa 7 leswi u swi hlawuleke u swi veka etlhelo xana?” ₃₀Abrahama a hlamula a ku: “Wena amukela swinyimpfana leswi swa xisati swa 7 eka mina, leswaku u ta va mbhoni ya mina ku tiyisa leswaku hi mina ndzi celeke xihlovo lexi.” ₃₁Hikokwalaho ndhawu leyi yi thyiwile vito ra Berexeba, hikuva hi kona laha vavanuna lava vambirhi va nga hlambanya va ri kona. ₃₂Kutani Abrahama na Abimeleke va endla xinakulobye eBerexeba. Endzhaku ka swona, Abimeleke na Pikolo mufambisi wa mavuthu ya yena va suka va famba va tlhelela etikweni ra Vafilista. ₃₃Kutani Abrahama a byala murhi wa “tamarisiki” eBerexeba, a khongelela kona HOSI, xona Xikwembu lexi nga kona hilaha ku nga heriki. ₃₄Abrahama ú tshamile malembe yo tala etikweni ra Vafilista a ri muluveri.