Xivono xa marhambu lama omeke erivaleni
1HOSI Xikwembu xi ndzi khoma hi matimba ya Moya wa xona, kutani xi ndzi humesa emutini xi ya ndzi veka ehandle erivaleni. Rivala ra kona a ri funengetiwile hi marhambu. 2Kutani xi ndzi famba-fambisa exikarhi ka wona, ndzi kuma leswaku marhambu lawa a ma tele ngopfu, naswona a ma omile swinene. 3Kutani Xikwembu xi ndzi vutisa xi ku: “Ndzi byele we Ezekiele, xana marhambu lawa ma nga tlhela ma kuma ku hanya xana?” Mina ndzi hlamula ndzi ku: “Swi tiva hi wena ntsena, we HOSI N'wini wa hinkwaswo!” 4Hiloko xi ndzi lerisa xi ku: “Vulavula ni marhambu lama omeke lawa, u ma byela ku ndzi yingisa, 5hikuva mina HOSI N'wini wa hinkwaswo ndzi ni rito eka wona leri nge: ‘N'wina marhambu, tivani leswaku ndzi ni makungu ya ku huhutela moya wa vutomi wu nghena eka n'wina, kutani mi ta tlhela mi kuma ku hanya. 6Ndzi ta mirisa misiha ya n'wina, ndzi hlukisa nyama ya n'wina, ndzi mi funengeta hi nhlonge, ndzi hetelela hi ku mi nyika moya wa vutomi leswaku mi tlhela mi kuma ku hanya, kutani mi ta tiva leswaku HOSI Xikwembu, hi mina!’ ”
7Kavaloko ndzi vulavula ni marhambu hilaha Xikwembu xi ndzi leriseke hakona, kutani ku twakala mpfumawulo wa vukotlo-kotlo bya marhambu loko ma sungula ku hlangana ma tlhela ma khomana. 8Kutani loko ndzi langutisisa, ndzi vona misiha yi tlhela yi mila, ndzi vona ni nyama loko yi hluka, nhlonge yi funengeta hinkwaswo; kambe vanhu va kona a va nga hefemuli. 9Hiloko Xikwembu xi ndzi lerisa xi ku: “We Ezekiele, vitana moya wa vutomi, u wu byela leswaku mina HOSI N'wini wa hinkwaswo ndzi ni rito eka wona leri nge: ‘Wena moya wa vutomi, tana u huma ematlhelweni ya mune ya misava, u ta u ta nghena eka mintsumbu ya vanhu lava, leswaku va tlhela va kuma ku hanya!’ ” 10Kavaloko ndzi vitana moya wa vutomi hilaha Xikwembu xi ndzi leriseke hakona, wu ta wu ta nghena eka vanhu lava, kutani va yima hi milenge, va endla ntshungu lowukulu wa ntsandza-vahlayi.
11Kutani Xikwembu xi ku ka mina: “Waswivo we Ezekiele, marhambu lawa ma fananisa tiko hinkwaro ra Vaisraele. Vona va rila va ku: ‘Hi lo oma kukota marhambu, a ha ha tshembi nchumu, hi lovile!’ 12Hikokwalaho vulavula na vona, u va byela leswaku mina HOSI N'wini wa hinkwaswo ndzi ni rito eka vona leri nge: ‘Yingisani n'wina vanhu va mina! Ndzi ta mi pfuxa, ndzi mi humesa emasirheni ya n'wina, ndzi mi vuyisa kaya ka n'wina etikweni ra Israele. 13Kutani loko ndzi ta va ndzi mi pfuxile ni ku mi humesa emasirheni ya n'wina, mi ta tiva leswaku HOSI Xikwembu, hi mina! 14Ndzi ta mi nyika Moya wa mina, kutani mi ta kuma ku hanya; ndzi ta mi tshamisisa etikweni ra n'wina, kutani mi ta tiva leswaku loyi a mi tshembiseke swilo leswi a tlhela a swi endla, hi mina HOSI. Ndzi vula sweswo ndzi tiyisile!’ ”
Xikwembu xi ta hlanganisa tiko ra Yuda ni ra Israele
15HOSI Xikwembu xi vulavula na mina xi ku: 16“We Ezekiele, teka tinhonga timbirhi, kutani eka leyo rhanga, u tsala leswi: ‘Yuda ni Vaisraele lava twananaka na yena.’ Eka leya vumbirhi, tsala u ku: ‘Yosefa ni Vaisraele hinkwavo lava twananaka na yena (va nga va ka Efrayimi).’ 17Tinhonga leti, ti hlanganise evokweni ra wena ti endla nhonga yin'we. 18Loko vanhu va ka n'wina va ku vutisa leswaku swilo leswi swi vula yini, 19va tivise leswaku mina HOSI N'wini wa hinkwaswo ndzi ri: Ndzi le kusuhi ni ku teka nhonga ya Yosefa (leyi nga vokweni ra va ka Efrayimi) ni Vaisraele lava twananaka na yena, ndzi yi hlanganisa ni nhonga ya Yuda, leswaku ti endla nhonga yin'we evokweni ra mina. 20Khoma tinhonga leti u tsaleke mavito eka tona, u ti komba varikwenu, 21kutani u va byela leswaku mina HOSI N'wini wa hinkwaswo ndzi ri, ndzi ta hlengeleta Vaisraele va huma ematikweni hinkwawo lawa va hangalasiweke va ya eka wona, ndzi va vuyisa etikweni ra vona. 22Vaisraele ndzi ta va endla rixaka rin'we, ndzi va tshamisisa etikweni ra vona ra tintshava; hinkwavo va ta fumiwa hi hosi yin'we, va nga ha avani va endla mimfumo mimbirhi. 23A va nga ha engeti va tinyamisa hi swikwembu swa vona swa hava, kumbe hi mintirho ya vona ya manyala, kumbe hi ku tlhelela eswidyohweni swa vona swa khale; ndzi ta va kutsula eka swona ndzi va basisa. Va ta va vanhu va mina, kutani mina ndzi ta va Xikwembu xa vona.
24“Vaisraele hinkwavo va ta va hansi ka Davhida nandza wa mina, va risiwa hi yena ntsena. Va ta landzelela milawu ya mina, va hlayisa ni swiletelo swa mina. 25Va ta tshama etikweni leri vatata wa vona a va akile eka rona, ri nga tiko leri ndzi ri nyikeke Yakobo nandza wa mina; vona ni vana va vona ni vatukulu va vona va ta tshama eka rona minkarhi hinkwayo, kutani Davhida nandza wa mina ú ta va hosi ya vona hilaha ku nga heriki. 26Ndzi ta endla ntwanano na vona, leswaku wu va tisela ku rhula loku nga ta ka ku nga heli. Ndzi ta va katekisa va andza, ndzi aka Tempele ya mina exikarhi ka vona leswaku yi va kona hilaha ku nga heriki. 27Ndzi ta tshama na vona ndzi va Xikwembu xa vona, vona va va vanhu va mina. 28Siku ndzi nga ta pfuxa Tempele ya mina, vamatiko va ta tiva leswaku mina HOSI ndzi tihlawulerile Vaisraele va va vanhu va mina hilaha ku nga heriki.”
