Ezekiele 18

₁HOSI Xikwembu xi engeta xi vulavula na mina xi ku: ₂“Laha tikweni ra Israele, mi tolovele ku vula xivuriso lexi nge:

₅“Ndzi nga fanisa mhaka leyi hi munhu wo lulama: Ú hlayisa milawu, a endla leswi lulameke ntsena. ₆A nga khongeli swikwembu swa hava swa Vaisraele, a nga swi humeseli magandzelo eswitsungeni. Munhu wo tano a nga nyamisi nsati wa muakelani, naswona a nga etleli ni wansati la nga masikwini ya yena ya n'hweti. ₇A nga xanisi munhu-kulobye, kumbe ku n'wi tekela swa yena; loko xisiwana xi n'wi tamerisa xilo xo khomela nandzu wa mali, ú hatla a tlherisa xilo xa kona. Lava sikaka, wa va phamela, a ambexa lava pfumalaka swiambalo. ₈Loko a lombisa mali, a nga lavi ntswalo wa yona, a nga bindzuli ha yona. Ú chava ku endla leswo homboloka; timhaka ta vanhu, wa ti tsema hi ku lulama. ₉Ú landzelela milawu ya mina, a hlayisa ni swiletelo swa mina, a hanya ha swona. Hakunene munhu wo tano ú ta kuma ku hanya, hikuva ú lulamile. Ndzi vula sweswo mina HOSI N'wini wa hinkwaswo.

₁₀“Kambe swi nga endleka leswaku munhu loyi wo lulama a kuma n'wana wa xinuna la nga xigevenga kumbe mudlayi, n'wana la endlaka xin'wana ni xin'wana xa leswo biha, ₁₁leswi tata wa yena a chavaka ku swi endla: N'wana wa kona ú humesela swikwembu swa hava emagandzelo eswitsungeni, a nyamisa nsati wa muakelani, ₁₂a xanisa swisiwana ni vapfumari, a va tekela swilo swa vona; a nga va tlheriseli swilo leswi va n'wi tameriseke swona ku khomela nandzu wa mali, a endla swa manyala hi ku khongela swikwembu swa hava; ₁₃loko a lombisa mali, ú lava ntswalo wa yona, a bindzula ha yona. Xana munhu wo tano a nga kuma ku hanya xana? E-e, a nge hanyi, ú ta fa hakunene, hikuva ú endlile swilo leswi hinkwaswo swa manyala; rifu ra yena, ú ta va a lo tivangela yena n'winyi.

₁₄“Hi tlhelo rin'wana swi nga endleka leswaku n'wana loyi wo homboloka na yena a kuma n'wana wa xinuna; loko n'wana wa kona a vona swidyoho hinkwaswo leswi tata wa yena a swi endleke, a chava ku tekela mutswari: ₁₅A nga khongeli swikwembu swa hava swa Vaisraele, a nga swi humeseli magandzelo eswitsungeni; a nga nyamisi nsati wa muakelani, ₁₆a nga xanisi munhu-kulobye, kumbe ku n'wi tekela swa yena, a n'wi tlherisela swo khomela nandzu wa mali. Lava sikaka, wa va phamela, a ambexa lava pfumalaka swiambalo. ₁₇Ú chava ku endla leswo homboloka; loko a lombisa mali, a nga lavi ntswalo wa yona, a nga bindzuli ha yona. Ú hlayisa milawu ya mina ni switsundzuxo swa mina, a hanya ha swona. Munhu wo tano a nge feli swidyoho swa tata wa yena; hakunene, ú ta kuma ku hanya. ₁₈Kambe tata wa kona yena ú ta fela mintirho ya yena leyo homboloka, hikuva ú xanisile varikwavo, a va tekela swa vona, a endla leswi biheke exikarhi ka va ka vona.

₁₉“N'wina vanhu mi ri: ‘Hikwalaho ka yini n'wana loyi a nga beriwi mintirho leyo homboloka ya tata wa yena xana?’ Nhlamulo hileswaku n'wana loyi ú endlile leswi nga swona, swi nga leswi lulameke; ú hlayisile milawu ya mina hinkwayo, a hanya ha yona; hikokwalaho ú ta kuma ku hanya hakunene. ₂₀Munhu la dyoheke, hi yena ntsena loyi a fanelaka ku fa. N'wana a nge beriwi ku homboloka ka tata wa yena, na yena tatana a nge beriwi ku homboloka ka n'wana wa yena. Ku lulama ka munhu wo lulama, ku ta hanyisa yena ntsena, ni ku homboloka ka munhu wo homboloka ku ta dlayisa yena ntsena.

₂₁“Loko munhu wo homboloka o tshuka a hambene ni swidyoho hinkwaswo leswi a a tolovele ku swi endla, kutani a sungula ku hlayisa milawu ya mina, a endla leswi nga swona, swi nga leswo lulama, munhu yoloyi hakunene ú ta kuma ku hanya, a nga ka a nga fi. ₂₂Milandzu hinkwayo leyi a nga tivangela yona, ú ta rivaleriwa yona, kutani a kuma ku hanya hi mhaka ya leswo lulama leswi a swi endlaka sweswi. ₂₃Xana mi anakanya leswaku ndzi tsakela rifu ra munhu wo homboloka xana? E-e! Mina HOSI N'wini wa hinkwaswo ndzi ri, ndzi lava leswaku munhu loyi a hambana ni mikhuva ya yena leyo biha, kutani a kuma ku hanya.

₂₄“Kambe hi tlhelo rin'wana, loko munhu wo lulama o tshuka a tshikile ku endla leswo lulama, kutani a sungula ku dyoha, a tinyiketa emintirhweni ya manyala ya lavo homboloka, xana munhu loyi ú ta kuma ku hanya xana? E-e! Mintirho ya yena ya khale leyo lulama yi ta rivariwa hinkwayo, kutani ú ta fela eku tiariseni ka yena ne ku dyoheni ka yena.

₂₅“N'wina Vaisraele mi tala ku vula leswaku matirhele ya mina HOSI N'wini wa hinkwaswo a ma twali. Ndzi yingiseni! Xana i matirhele ya mani lama nga twaliki xana? I matirhele ya n'wina, ku nga ri ya mina! ₂₆Loko munhu wo lulama a tshika mintirho ya yena leyo lulama kutani a sungula ku endla leswo homboloka a kondza a dlawa hi swona, ú ta va a lo tivangela rifu hi ku homboloka loku ka yena. ₂₇Kambe loko munhu wo homboloka a hambana ni mintirho ya yena leyo biha, kutani a sungula ku endla leswi nga swona, swi nga leswo lulama, munhu yoloyi ú ta ponisa vutomi bya yena, a kuma ku hanya. ₂₈Leswi a nga tikamba, kutani a hambana ni mintirho ya yena hinkwayo leyo homboloka, hakunene ú ta kuma ku hanya, a nga ka a nga fi. ₂₉N'wina Vaisraele mi vula leswaku matirhele ya mina HOSI N'wini wa hinkwaswo a ma twali. Xana i matirhele ya mani lama nga twaliki xana? I matirhele ya n'wina Vaisraele, ku nga ri ya mina!

₃₀“Hikokwalaho, mina HOSI N'wini wa hinkwaswo ndza mi byela n'wina Vaisraele leswaku ndzi ta avanyisa un'wana ni un'wana wa n'wina hi ku ya hi mintirho ya yena. Hundzukani ke, mi hambana ni mintirho ya n'wina hinkwayo leyo homboloka, leswaku swidyoho swa n'wina swi nga tshuki swi mi vangela ku lova. ₃₁Swidyoho hinkwaswo leswi a mi hanya eka swona, swi cukumeteni kule na n'wina, kutani mi tilavela mianakanyo leyintshwa ni moya lowuntshwa! Xana mi susumetiwa ha yini ku tivangela rifu n'wina Vaisraele xana? ₃₂Mina HOSI N'wini wa hinkwaswo ndzi tiyisa leswaku a ndzi tsakeri rifu ra munhu na un'we! Hikokwalaho hundzukani, mi kuma ku hanya!”