Eksoda 30

₁“Mi ta endla alitari yo hisela kona mirhi ya risuna mi yi endla hi mapulangi ya murhi wa munga. ₂Ehenhla ni le hansi ka yona, ku ta ringanana: 50 cm ku leha ni 50 cm ku anama, ni 100 cm ku ya ehenhla; timhondzo ta yona ti ta khomana na yona. ₃Mi ta yi nameka nsuku lowo tenga, ehenhla ni le matlhelo hinkwawo, mi nameka ni timhondzo ta yona, mi endla ni nkonye wa nsuku ku rhendzeleka na yona. ₄Mi ta yi endlela ni swingwavila swimbirhi hi nsuku, mi swi vekela ehansi ka nkonye hi matlhelo mambirhi ya yona; eka swona ku ta tlhomiwa timhandze to rhwala alitari ha tona. ₅Timhandze ta kona mi ta ti vatla hi murhi wa munga, mi ti nameka nsuku. ₆Mi ta veka alitari emahlweni ka xisirhelelo lexi sivaka Areka ya Ntwanano, laha ndzi nga ta hlangana na n'wina kona. ₇Kutani Aroni ú ta hisa swinun'hweriso ehenhla ka yona mpundzu wun'wana ni wun'wana; ú ta swi hisa enkarhini lowu a lunghisaka timboni ha wona. ₈Ú ta tlhela a hisa swinun'hweriso leswi namadyambu, enkarhini lowu a lumekaka timboni ha wona; vatukulu va n'wina hinkwavo na vona va ta humesa magandzelo lawa ya mirhi ya risuna emahlweni ka mina HOSI, hilaha ku nga heriki. ₉Ehenhla ka alitari leyi, mi nga tshuki mi hisa mirhi ya risuna leyi mi nga lerisiwangiki yona, mi nga humeseli kona magandzelo ya nyama ni ya mapa, naswona mi nga cheli swakunwa swa magandzelo ehenhla ka yona. ₁₀Kan'we hi lembe, Aroni ú ta basisa alitari hi ku teka ngatinyana ya xifuwo lexi tlhaveriweke mhamba yo susa swidyoho, a tota timhondzo ta alitari; alitari yi ta basisiwa hi ndlela leyi kan'we hi lembe, ni le ka vatukulu va n'wina hinkwavo. Alitari leyi yi ta va yi hlawulekile ngopfu eka mina HOSI.”

₁₁Kutani HOSI Xikwembu xi ku ka Muxe: ₁₂“Loko ku hlayiwa ntsengo wa Vaisraele lava taka eku tsariseni, un'wana ni un'wana wa vona ú ta humesa nhlengo wa ku kutsula vutomi bya yena, a humesela mina HOSI Xikwembu, siku vanhu va hlayiwaka, leswaku va nga tshuki va wela hi ntungu, loko va ri karhi va hlayiwa. ₁₃Un'wana ni un'wana la hundzaka eku hlayiweni, ú ta humesa nhlengo wa silivhere ya 6 g, yi nga hafu ya ntiko wo pima ha wona, lowu hlayisiwaka exivandleni lexo hlawuleka; nhlengo lowu wu ta va wa mina HOSI, ₁₄wu humesiwa hi munhu un'wana ni un'wana wa malembe ya 20 ni ku ya ehenhla la taka eku hlayiweni. ₁₅Mufumi a nga ka a nga humesi ku tlula silivhere ya 6 g, ni xisiwana a xi nga humesi ehansi ka silivhere yo ringana na yoleyo, loko mi ri karhi mi humesa nhlengo wa mina wo kutsula vutomi bya n'wina ha wona. ₁₆Mi ta amukela nhlengo wa kona eka Vaisraele, kutani mi wu tirhisa ku fambisa mintirho ya Ntsonga lowo Hlawuleka; nhlengo lowu wa ku kutsula vutomi bya n'wina, wu ta endla leswaku mina HOSI ndzi tsundzuka Vaisraele.”

₁₇Kutani HOSI Xikwembu xi ku ka Muxe: ₁₈“U ta vumba sambelo hi koporo, ni xikhatelo xa rona, u swi vumba hi koporo. U ta veka xibya lexi exikarhi ka Ntsonga lowo Hlawuleka ni alitari, u chela mati eka xona. ₁₉Mati lawa, Aroni ni vana va yena va ta hlamba mavoko ni milenge ha wona. ₂₀Loko va nghena eka Ntsonga lowo Hlawuleka, kumbe loko va tshinela kusuhi ni alitari ku ya tirha kona, ni ku ndzi hisela magandzelo mina HOSI Xikwembu, va ta rhanga hi ku hlamba hi mati lawa, leswaku va nga tshuki va fa. ₂₁Va ta hlamba mavoko ni milenge, hikuva loko va nga endlisi sweswo, va ta fa. Lowu i nawu lowu nga ta ka wu nga hundzuki, eka Aroni ni vana va yena, wu ta boha hambi va ri vatukulu va yena, hilaha ku nga heriki.”

₂₂Kutani HOSI Xikwembu xi tlhela xi ku ka Muxe: ₂₃“Teka mirhi leyo saseka swinene yo nun'hwerisa ha yona: Mafi ya murhi wa ‘mirha’ ya 6 kg, ni murhi lowo nun'hwela wa ‘sinamoni’ wa 3 kg, ni mafi ya tinhlanga ya 3 kg, ₂₄ni murhi wa ‘kasiya’ wa 6 kg, hi ku ya hi ntiko wo pima ha wona lowu hlayisiwaka exivandleni lexo hlawuleka, ni tinghotsa timbirhi ta mafurha ya murhi wa mutlhwari. ₂₅Kutani mi ta pfanganyisa swilo leswi, hi mukhuva lowu muendli wa mirhi leyo nun'hwerisa a pfanganyisaka ha wona, mi endla mafurha layo hlawuleka yo tola; ma ta va mafurha yo tola lama hlawulekeke. ₂₆Mi ta teka mafurha lawa, mi tota Ntsonga lowo Hlawuleka, ni Areka ya Ntwanano; ₂₇mi ta tota tafula ni swibya swa rona hinkwaswo, mi tota xitlhoma-timboni ni swingolongondzwana swa xona, mi tota ni alitari ya mirhi ya risuna; ₂₈mi tota alitari ya magandzelo lama hisiwaka ni swingolongondzwana swa yona hinkwaswo, ni sambelo, ni xikhatelo xa rona; ₂₉mi ta swi basisa leswaku swi va leswi hlawulekeke swinene; xin'wana ni xin'wana lexi nga ta khumbana ni swilo leswi, xi ta va lexi hlawulekeke. ₃₀Aroni ni vana va yena, na vona mi ta va chela mafurha lawa, mi va hlawulekisa leswaku va va vaprista, va ndzi tirhela. ₃₁Kutani mi ta byela Vaisraele leswaku mina HOSI ndzi ri: ‘Lawa ma ta va mafurha yo tola lama hlawulekeke, lawa mi nga ta ndzi tirhela ha wona, n'wina ni vatukulu va n'wina hilaha ku nga heriki. ₃₂Munhu ntsena, a nga tshuki a totiwa mafurha lawa, naswona mi nga tshuki mi endla mafurha man'wana, hi ku chela mimpimo leyi fanaka ni leyi tirhisiweke ku endla mafurha lawa; wona ma hlawulekile, kutani mi fanele ku ma tirhisa hi ndlela yo hlawuleka. ₃₃Un'wana ni un'wana loyi a nga ta endla mafurha yo fana ni lawa, kumbe loyi a nga ta teka man'wana ya wona a tota munhu wa le handle, ú ta hlongoriwa, a suka erixakeni ra ka vona.’ ”

₃₄Kutani HOSI Xikwembu xi ku ka Muxe: “Lava swinun'hweriso leswi: Murhi wa ‘sitakita’, ni wa ‘onika’, ni wa ‘galibanumi’, ni swinun'hweriso leswi cheriwaka eka murhi wa risuna lowo tenga, mirhi leyi hinkwayo yi va ya mpimo wun'we lowu ringanaka. ₃₅Mi ta hlanganisa swinun'hweriso leswi, mi endla murhi wa risuna, hi mukhuva lowu muendli wa mirhi leyo nun'hwerisa a pfanganyisaka ha wona; murhi wa kona mi wu chela munyu, wu tenga, wu va lowu hlawulekeke. ₃₆Xiphemu xin'wana xa wona, mi ta xi sila xi endla mapa, kutani mi teka mapanyana ya kona mi ma nyunyetela emahlweni ka Areka ya Ntwanano, endzeni ka Ntsonga lowo Hlawuleka, laha ndzi nga ta hlangana na n'wina kona. Murhi lowu wu ta va wu hlawulekile swinene eka n'wina. ₃₇Murhi wa risuna lowu mi nga ta wu endla hi ku tirhisa mimpimo leyi ya swinun'hweriso, mi nga wu endleli ku wu tirhisa n'wina; eka n'wina wu ta va murhi lowu hlawuleriweke HOSI Xikwembu. ₃₈Un'wana ni un'wana loyi a nga ta endla murhi wo fana ni lowu, a lava ku tinun'hwerisa hi risuna ra wona, ú ta hlongoriwa, a susiwa erixakeni ra ka vona.”