Eksoda 11

₁Kutani HOSI Xikwembu xi ku ka Muxe: “Ndza ha ta vangela Faro ni Vaegipta khombo rin'we ro hetelela; endzhaku ka swona, ú ta mi tshika mi famba; ku mi tshika ka swona, ú to mi hlongola kunene. ₂Sweswi, hlamusela Vaisraele, vavanuna ni vavasati, leswaku hinkwavo va kombela swo bomba ha swona swa silivhere ni nsuku eka vaakelani va vona.” ₃Kutani HOSI Xikwembu xi endla leswaku Vaisraele va tsakeriwa hi Vaegipta. Naswona, etikweni ra Egipta, Muxe a a ri munhu wo chaviseka swinene emahlweni ka malandza ya Faro ni vaaki va tiko.

₄Kutani Muxe a ku ka Faro: “HOSI Xikwembu xi vurisa sweswo xi ri: ‘Exikarhi ka vusiku, ndzi ta rhendzeleka na tiko ra Egipta. ₅Xin'wana ni xin'wana lexi nga xa mativula etikweni ra Egipta, xi ta fa, ku sukela eka mativula ya Faro loyi vuhosi a byi ta va bya yena, ku fika ni le ka mativula ya nandza wa xisati loyi a silaka mavele, swi ya katsa ni mativula hinkwawo ya swifuwo. ₆Hikokwalaho, ematlhelweni hinkwawo ya tiko, ku ta va ni xirilo lexikulu exikarhi ka Vaegipta; xirilo lexo tano, a xi si tshama xi va kona, naswona a xi nga pfuki xi vile kona nakambe. ₇Kasi, exikarhi ka Vaisraele hinkwavo, a ku nga vi na munhu kumbe xifuwo lexi nga ta vukuriwa hi mbyana. Hi kona mi nga ta tiva leswaku mina HOSI Xikwembu ndzi hlawula Vaisraele eka Vaegipta.’ ”

₈Muxe a engeta a ku: “Hikwalaho ka leswi, malandza ya wena hinkwawo, ma ta rhelela ma ta ka mina, ma ndzi nkhinsamela, ma ku: ‘Suka u famba, wena ni vanhu hinkwavo lava u va rhangelaka emahlweni.’ Kutani hi kona ndzi nga ta famba.” Kwalaho Muxe a huma eka Faro a hlundzukile swinene.

₉HOSI Xikwembu a xi byerile Muxe xi ku: “Ku endlela leswaku swihlamariso swa mina swi andza etikweni ra Egipta, Faro a nga ka a nga ku yingisi.” ₁₀Hakunene, hambileswi Muxe na Aroni va endleke swihlamariso leswi emahlweni ka Faro, HOSI Xikwembu xi nonon'hwisile mbilu ya yena, kutani a ala ku tshika vanhu va Israele va famba, va huma etikweni ra yena.