Amosi 9

“Bana lwangu ra Tempele

swihukuva swa yona swi kondza swi tsekatseka;

ri mbindzimuxe ri wela ehenhla ka tinhloko ta vanhu hinkwavo;

lava nga ta sala, ndzi ta va herisa hi fumu,

na un'we wa vona a nga ka a nga baleki,

a ku nga phonyoki na un'we.

₂“Hambiloko vo nyokovela va ya exivandleni xa vafi,

ndzi ta ya va humesa kona;

ni loko va nga khandziya va ya ematilweni,

na kona ndzi ta ya va chikisa.

₃Hambiloko va nga ya va ya tumbela enhlohlorhini ya Karmele,

ndzi ta ya ndzi ya va hlota na kona ndzi vuya na vona;

ni loko va nga ndzi nyamalalela hi ku ya tumbela endzeni ka lwandle,

ndzi ta lerisa nyoka ya le matini, yi ya va luma kwale va nga kona.

₄Hambiloko vo tinyiketela ku yisiwa hi valala evukhumbini,

ndzi ta lerisa leswaku va dlayeteriwa kwale hi fumu;

ndzi ta veka tihlo ehenhla ka vona,

ku nga ri ku va hlayisa, kambe ku va herisa.”

₅HOSI ya matimba hinkwawo, N'wini wa hinkwaswo,

ú khumba misava, kutani yi n'oka,

hinkwavo lava tshamaka eka yona va kalakala;

yi ndlandlamuka hinkwayo ku fana ni nambu wa Nilo,

yi tlhela yi vohla kukota nambu wa Nilo le Egipta.

₆Xikwembu xi aka tindlu ta xona ta le henhla ematilweni,

xi khubumeta misava hi tilo ra xona;

xi vitana mati ya lwandle xi ma humesa, xi cheleta misava ha wona: Vito ra xona i HOSI.

₇Hosi yi vula sweswo yi ri:

“N'wina Vaisraele,

xana a ndzi mi teki mi fana ni vanhu va le Etiyopiya xana?

Hambileswi ndzi mi humeseke etikweni ra Egipta,

ndzi mi ringanisa ni Vafilista lava ndzi va humeseke eKafitoro,

ni Vasiriya lava ndzi va humeseke eKiri.

₈Vonani, mina HOSI N'wini wa hinkwaswo,

ndzi vekile tihlo ehenhla ka mfumo lowu wa vadyohi,

ndzi ta wu herisa wu nyamalala laha misaveni,

kambe vatukulu va Yakobo, ndzi nga ka ndzi nga va heriseli makumu.

Ndzi vula sweswo mina HOSI.

₉“Hikokwalaho, ndzi ta lerisa leswaku Vaisraele va sefiwa

exikarhi ka matiko hinkwawo,

ku fana ni loko munhu a sefa mapa,

kutani a ku nga vi na xiribyana ni xin'we lexi nga ta huma esefeni.

₁₀Vadyohi hinkwavo va tiko ra mina lava nge:

‘Hi nga ka hi nga humeleli hi swo biha kumbe ku hlangana na swona’,

va ta dlawa hi fumu.”

₁₁“Hi siku ra kona,

ndzi ta pfuxa yindlu ya Davhida leyi weke,

ndzi ta siva timfa ta yona,

ndzi pfuxa ni makhumbi ya yona,

ndzi tlhela ndzi yi aka ku fana ni khale.

₁₂Kutani va ta teka leswi saleke swa tiko ra Edomu,

va teka ni matiko hinkwawo lawa khale a ma ri ehansi ka mina.

Ndzi vula sweswo mina HOSI,

ndzi ta swi endla.”

₁₃HOSI yi vula sweswo, yi ri:

“Vonani, masiku ma ta,

lawa murimi ni mutshoveri va nga ta landzelelana emasin'wini,

ni mubyari wa vhinya a nga ta landzelelana ni mukhi wa yona;

tintshava ti ta mpfempfa vhinyo leyi nga si vilaka,

ni swintshabyana hinkwaswo swi ta khuluka hi yona.

₁₄Ndzi ta tlhela ndzi katekisa vanhu va mina va Israele,

va ta pfuxa marhumbi ya miti ya vona, va tshama eka yona.

Va ta byala tivhinya, va nwa vhinyo ya kona,

va ta rima mintanga, va dya ntshovelo wa yona.

₁₅Ndzi ta va simeka etikweni ra vona;

va nga ka va nga ha simuriwi etikweni leri ndzi va nyikeke rona!

Ndzi vula sweswo, mina HOSI Xikwembu xa n'wina.”