Amosi 5

₂“Israele, nhwana loyi a tengeke, ú wile,

a nga ka a nga ha pfuki;

ú siyiwile a lo lákáhlá ehansi,

ku nga ri na loyi a n'wi pfuxaka.”

₃HOSI N'wini wa hinkwaswo ú vurisa sweswo, ú ri:

“Muti lowu rhumelaka masocha ya 1 000 enyimpini,

wu ta vuya ni dzana ntsena,

lowu wu rhumelaka dzana ra masocha,

wu ta vuya ni khume ntsena ku ta lwela Vaisraele.”

“Lavani mina, mi ta hanya;

₅mi nga tshuki mi lava swa le Betele,

hikuva muti wa Betele wu ta sala wu nga ha ri nchumu,

hambi ku ri eGiligala mi nga ngheni,

hikuva vanhu va Giligala va ta ya evukhumbini hakunene,

ni le Berexeba, mi nga tshuki mi tsemakanyela kona.”

₆Lavani HOSI leswaku mi ta hanya

loko swi nga ri tano, yi ta rhumela ndzilo ehenhla ka n'wina, va ka Yosefa;

wu ta herisa ni muti wa Betele,

ku nga ri na loyi a nga ta wu tima!

₇Mi ni khombo, n'wina mi dyisaka vanhu mbitsi hi ku tshika milawu leyo lulama,

n'wina mi alaka ku avanyisa hi ndlela leyinene.

₈Loyi a vumbeke Xirimela na Mahlahle,

a hundzula xinyami xi va ku vonakala ka mixo,

a tlhela a hundzula nhlekanhi wu va vusiku,

loyi a vitanaka mati ya lwandle a ma humesa,

a cheleta misava ha wona,

vito ra yena i HOSI.

₉Hi yena loyi a lovisaka vanhu va matimba,

a lovisa ni miti ya vona ya makhokholo.

₁₀N'wina mi venga loyi a yimaka ni leswo lulama ehubyeni,

loyi a vulavulaka ntiyiso, ma n'wi nyenya.

₁₁Mi akile tindlu hi maribye lama vatliweke,

kambe mi nga ka mi nga etleli eka tona;

mi rimile masimu layo saseka ya vhinya,

kambe mi nga ka mi nga nwi vhinyo ya kona,

hikuva mi tshikelela vapfumari,

mi va tekela mavele hi nkani.

₁₂Mintirho ya n'wina leyo biha, ndza yi tiva hinkwayo,

ndzi tiva ni ku tala ka swidyoho swa n'wina:

Mi xanisa vanhu lava nga riki na nandzu, mi pfumela ku xaviwa ehubyeni,

mi tlherisa vapfumari loko va ta eku mangaleni.

₁₃Kutani, hi nkarhi lowu wa vubihi,

munhu wo tlhariha, hi loyi a miyelaka.

₁₄Lavani leswo lulama, swi nga ri leswo biha,

mi ta kuma vutomi,

kutani hi kona HOSI, Xikwembu xa matimba hinkwawo, xi nga ta va na n'wina,

hilaha mi toloveleke ku vula hakona.

₁₅Vengani leswo biha, mi rhandza leswinene,

mi avanyisa hi ku lulama etihubyeni ta n'wina,

kutani kumbexana HOSI, Xikwembu xa matimba hinkwawo,

xi ta mi tsetselela n'wina masalela ya Yosefa.

₁₆Hikokwalaho HOSI Xikwembu xa matimba hinkwawo, N'wini wa n'wina,

ú vurisa sweswo ú ri:

“Etimbaleni ta miti hinkwayo ku ta va ni swirilo,

etindleleni hinkwato va ta ku: ‘Yo! Yo!’

Lava tirhaka emasin'wini, va ta vitaniwa ku ta rila nkosi,

ni lava tivaka tinsimu ta mahlomulo, va ta rhambiwa enkosini wa kona;

₁₇hambi ku ri emasin'wini hinkwawo ya vhinya, ku ta va ni ku kalakala,

hikuva ndzi ta vanga makhombo exikarhi ka n'wina,

ku vula mina HOSI.”

₁₈Mi ni khombo, n'wina mi navelaka siku ra HOSI!

Xana mi ri lavela yini siku leri xana?

Eka n'wina, ri ta va siku ra munyama,

ku nga ri ra ku vonakala.

₁₉Swi ta fana ni loko munhu a tsutsuma nghala,

a ya hlangana ni xinkankanka,

kutani loko a tsutsumela endlwini, a khegela khumbi hi voko,

nyoka yi n'wi luma.

₂₀Siku ra HOSI ri tisa munyama hakunene,

ku nga ri ku vonakala,

ri ta va ri lo khwìxìì,

ri pfumala ni ku vangama.

₂₁“Minkhuvo ya n'wina, ndza yi venga, ya ndzi nyenyetsa;

ni risema ra leswi tlhaviwaka etinhlengeletanweni ta n'wina,

a ndzi ri tsakeli!

₂₂Hambiloko mi ndzi humesela magandzelo lama hisiwaka, mi humesa ni tinyiko hi swa le masin'wini,

ndzi nga ka ndzi nga swi amukeli;

ni magandzelo ya xinakulobye lawa mi ma humesaka

hi swifuwo swa n'wina leswi nonisiweke,

a ndzi nga vi na mhaka na wona.

₂₃Sukani eka mina ni vuyimbeleri bya n'wina lebyo tungula;

mpfumawulo wa tiharipa ta n'wina, a ndzi lavi ni ku wu twa.

₂₄Ku avanyisa lokunene a ku khuluke ku fana ni mati,

ni ku lulama a ku hobomulane kukota nambu lowu nga phyiki.

₂₅“Xana n'wina vanhu va Israele, eka malembe ya 40 emananga,

mi tshame mi ndzi humesela magandzelo ni tinyiko ke? E-e!

₂₆Sweswi, tekani swifaniso swa swikwembu leswi mi tiendleleke swona,

xi nga xa Sakuti murhangeri wa kona,

ni xa Kayiwani xikwembu xa nyeleti;

₂₇kutani ndzi ta mi yisa evukhumbini, etikweni rin'wana ku hundza eDamaska.”

HOSI yi vula sweswo, yona yi vuriwaka Xikwembu xa matimba hinkwawo.