Amosi 2

“Ndzi nga ka ndzi nga tshiki ku ba vanhu va le Mowabu,

hikuva va dyoha va vuyelela-vuyelela:

Va hisile marhambu ya hosi ya Edomu,

ku sala nkuma ntsena.

₂Hikokwalaho ndzi ta rhumela ndzilo etikweni ra Mowabu,

wu ta herisa ni tindlu ta vuhosi ta le Keriyoto;

Vamowabu va ta fa exikarhi ka mpfilumpfilu wa nyimpi,

emukhosini ni ku biweni ka mhalamhala.

₃Ndzi ta susa mufambisi wa vona exikarhi ka vona,

ndzi n'wi dlaya, yena ni tindhuna ta yena.”

HOSI yi vula sweswo.

“Ndzi nga ka ndzi tshiki ku ba vanhu va le Yuda,

hikuva va dyoha va vuyelela-vuyelela:

Va tshikile nawu wa mina HOSI,

ni swileriso swa mina a va swi hlayisanga;

va hambukile va ya tirhela swikwembu swa hava,

leswi vatata wa vona va swi tirheleke.

₅Hikokwalaho ndzi ta rhumela ndzilo etikweni ra Yuda,

wu ta herisa ni tindlu ta vuhosi ta le Yerusalema.”

“Ndzi nga ka ndzi nga tshiki ku ba vanhu va le Israele,

hikuva va dyoha va vuyelela-vuyelela:

Va kumile mali hi ku xavisa vanhu lava lulameke,

va xavisile ni swisiwana hi nxavonyana wa tintanghu.

₇Va tsakela ngopfu ku kandziyela swisiwana ehansi,

va gombonyokisa timhaka ta vapfumari;

tatana ni jaha ra yena va yela nhwanyana un'we,

va endlela ku nyamisa vito ra mina lero hlawuleka.

₈Hinkwako laha va gandzelaka kona, va etlela eminkumbeni

leyi va nga yi tekela lava nga ni milandzu;

ni le ndlwini ya mina Xikwembu xa vona,

va nwa vhinyo leyi humesiweke ku riha milandzu.

₉Kasi hi mina ndzi va heriseleke Vaamori,

vanhu lava ringanaka ni mirhi ya kedari hi ku leha,

lava tiyeke ku fana ni mirhi ya minkuhlu;

ndzi mbumburhuxile mihandzu ya kona,

ndzi tsema ni timitsu ta kona.

₁₀“Ka ha ri mina loyi a mi humeseke etikweni ra Egipta,

ndzi mi fambisa malembe ya 40 emananga,

leswaku ndzi ta mi nyika tiko ra Vaamori ri va ra n'wina.

₁₁Van'wana va vana va n'wina, ndzi va vekile ku va vaprofeta,

van'wana va majaha ya n'wina, ndzi va vekile ku va Vanaziri.

Xana a hi swona ke, n'wina Vaisraele,

ku vutisa mina HOSI?

₁₂Kambe n'wina mi nwisile Vanaziri evhinyo,

mi byele ni vaprofeta leswaku va nga ha tirhi ntirho wa vona.

₁₃“Vonani, mina ndzi ta mi phyandlasa,

ku fana ni golonyi leyi rhwaleke tinyandza,

loko yi phyandlasa swilo ehansi.

₁₄Lava nga ni rivilo, va nge kumi nkarhi wo tsutsuma,

ni lava nga ni matimba, va ta heleriwa ha wona;

hambi yi ri nhenha, yi nga ka yi nga tiponisi.

₁₅Loyi a lwaka hi vurha, a nge yimi,

hambi loyi a nga ni rivilo, a nge phonyoki,

ni mugadi wa hanci a nge koti ku tiponisa.

₁₆Hi siku ra kona, hambi nhenha leyi nga ni xivindzi ku tlula tinhenha-kulobye,

yi ta suka yi tsutsuma yi nga ambalanga nchumu.”

HOSI yi vula sweswo.