Mintirho 11

₁Kambe vaapostola ni vamakwavo eHosini lava akeke eYudiya va twa leswaku vamatiko na vona va amukele Rito ra Xikwembu. ₂Kuteloko Petro a tlhandlukele eYerusalema, lava a va tsakela swa ku yimba va tengisana na yena, ₃va ku: “Wena, u nghene eka vavanuna lava nga yimbangiki, u dya na vona.”

₄Kutani Petro a sungula ku va byela timhaka hi ku longoloka ka tona, a ku: ₅“A ndzi ri emutini wa Yopa, ndzi ri karhi ndzi khongela; kutani ndzi ngheniwa hi moya, ndzi vona xilo lexi fanaka ni nguvu leyikulu, yi ri karhi yi xika yi nembeletiwa hi le tilweni hi tinhla ta mune, yi fika kusuhi na mina. ₆Loko ndzi langutisisa swinene endzeni ka yona, ndzi vona swifuwo swo famba hi milenge ni mavoko, ni swiharhi, ni leswi kokovaka, ni leswi hahaka empfhukeni. ₇Kutani ndzi twa rito leri nge ka mina: ‘Petro, suka u yima, u tlhava u dya!’ ₈Kutani ndzi ku: ‘E-e, Hosi, ndzi nga ka ndzi nga swi endli, hikuva a ku si tshama ku nghena xilo lexi yilaka kumbe lexi nga tengangiki enon'wini wa mina, ni siku ni rin'we.’ ₉Rito ri engeta ri huma etilweni, ri ku: ‘Swilo leswi Xikwembu xi nga vula leswaku swi tengile, u nga vuli leswaku swa yila.’ ₁₀Swilo leswi swi humelela kanharhu. Kutani hinkwaswo swi tlhela swi tlheriseriwa etilweni. ₁₁Hi nkarhi wolowo ku tshuka ku humelela vavanuna vanharhu enyangweni ya yindlu leyi a ndzi tshama ka yona; a va rhumiwile ka mina, va huma eKhezariya. ₁₂Kutani Moya wu ndzi byela leswaku ndzi famba na vona, ndzi nga kanakani; na vona vamakwerhu va 6 lava, va famba na mina; kutani hi nghena eka Korneliyo yoloyi. ₁₃Kavaloko a hi byela hilaha a voneke ntsumi endlwini ya yena, yi yimile yi ku: ‘Rhuma vanhu va ya eYopa, va ya vitana Simoni loyi va nge i Petro; ₁₄hi yena la nga ta ku byela timhaka leti u nga ta ponisiwa ha tona, wena ni va ndyangu wa wena hinkwavo.’ ₁₅Loko ndzi sungula ku vulavula, Moya lowo Kwetsima wu ta ehenhla ka vona, hi mukhuva lowu wu nga ta ha wona ni le henhla ka hina eku sunguleni. ₁₆Kutani ndzi anakanya rito ra Hosi leri nge: ‘Yohane ú khuvurile hi mati, kambe n'wina mi ta khuvuriwa hi Moya lowo Kwetsima.’ ₁₇Kutani ke, leswi Xikwembu xi va nyikeke nyiko leyi fanaka ni leyi hi nga yi kuma hina, hi ku pfumela eka Hosi Yesu Kriste, xana a ndzi ri mani mina ku alela Xikwembu xana?”

₁₈Loko va twa timhaka teto, va miyela va nga ha vileli; kutani va dzunisa Xikwembu, va ku: “Loko swi ri tano, na vona vamatiko Xikwembu xi va nyikile ku hundzuka loku yisaka evutomini.”

₁₉Loko va ri lava a va hangalasiwile hi ku xanisiwa loku nga humelela enkarhini wa ku dlawa ka Stefano, va hundzela emahlweni ku ya fika le Fenikiya, ni le Kipra, ni le Antiyoka, va ri karhi va dyondzisa Rito eka Vayuda ntsena. ₂₀Kambe van'wana va vona, va nga vavanuna lava humeke eKipra ni le Kirena, loko va fike le Antiyoka, va vula Rito ni le ka Vagriki, va va tivisa Evhangeli ya Hosi Yesu. ₂₁Matimba ya Hosi a ma ri na vona; kutani vanhu lavo tala va pfumela, va hundzukela ka Hosi.

₂₂Kuteloko mahungu ya timhaka teto ma ya fika etindleveni ta kereke ya le Yerusalema, ku rhumiwa Barnaba leswaku a ya eAntiyoka. ₂₃Loko a fika kona, ni loko a vona leswi tintswalo ta Xikwembu ti tirheke swona, a tsaka; kutani a va khongotela hinkwavo ku namarhela Hosi ni ku yi chivirikela hi mbilu. ₂₄Barnaba a a ri wanuna lonene, la teleke Moya lowo Kwetsima ni ku pfumela; kutani ntshungu lowukulu wu engeteriwa entlaweni wa Hosi. ₂₅Kavaloko Barnaba a ya eTarso ku ya lava Sawulo. ₂₆Kuteloko a n'wi kumile, a vuya na yena eAntiyoka. Va hlengeletana ni kereke lembe hinkwaro, va ri karhi va dyondzisa ntshungu lowukulu. Emutini wa Antiyoka, hi kona laha vadyondzisiwa va nga sungula ku vuriwa Vakriste kona.

₂₇Emasikwini walawo, vaprofeta va rhelela hi le Yerusalema, va ta eAntiyoka. ₂₈Un'wana wa vona, loyi a va ku i Agabo, a suka a yima, a tivisa hi matimba ya Moya leswaku ndlala leyikulu yi ta wa emisaveni hinkwayo (kunene yi humelele enkarhini wa hosi Klawudiyo). ₂₉Kutani vadyondzisiwa va twanana leswaku un'wana ni un'wana wa vona, ú ta rhumela leswi a swi kotaka ku pfuna vamakwavo lava akeke etikweni ra Yudiya. ₃₀Kunene va endlisa sweswo, kutani va rhumela tinyiko ta kona eka vakulukumba, ti famba na Barnaba na Sawulo.