II Vamakabiya 2

₁“Ku tsariwile ebukwini ya matimu leswaku Yeremiya a a lerisile lava a va yisiwa evuhlongeni ku oka ndzilo alitarini ni ku wu tumbeta, hilaha swi vuriweke hakona. ₂Loko a va nyikile nawu wa Xikwembu, ú va lerisile leswaku va nga wu rivali kumbe ku kanganyisiwa hi swifaniso leswi vatliweke swa nsuku ni silivhere ni swikhaviso swa swona. ₃Kutani a va khongotela leswaku va nga tshiki nawu wa Xikwembu ni siku ni rin'we.

₄“Ku tsariwile nakambe ebukwini ya matimu leswaku muprofeta Yeremiya, loko a kumile rito ra Xikwembu, ú lerisile leswaku Ntsonga lowo Hlawuleka na Areka ya ntwanano swi n'wi landzela entshaveni laha Muxe a nga khandziya kona ku vona tiko leri Xikwembu a xi ri tshembisile vanhu va xona. ₅Loko Yeremiya a fika entshaveni a kuma bako, a tumbeta kona Ntsonga lowo Hlawuleka, na Areka ya ntwanano, ni alitari ya mirhi ya risuna. Kutani a pfala nyangwa ya bako, a yi lema.

₆“Van'wana va lava va n'wi landzeke, va khandziya kona va lava ku fungha ndlela, kambe a va yi kumanga. ₇Loko Yeremiya a swi twa a va holovela a ku: ‘Ndhawu leyi a yi nga tiveki ku kondza Xikwembu xi hlengeleta vanhu va xona nakambe ni ku va tsetselela. ₈Enkarhini wolowo HOSI Xikwembu xi ta paluxa swilo leswi, kutani ku kwetsima ka xona ku ta humelela epapeni, hilaha ku kombisiweke hakona eka Muxe ni hilaha Solomoni a kombeleke hakona leswaku Tempele yi khanguriwa hi ku dzuneka lokukulu.’ ”

₉“Swi hlamuseriwile nakambe leswaku, hi vutlhari lebyi a a ri na byona, Solomoni ú humesile magandzelo yo hetisa ni ku khangula Tempele. ₁₀Tanihi leswi Muxe a khongeriseke xiswona eka Xikwembu, na yena Salomoni a khongela, kutani ndzilo wu xika etilweni, wu hisa mangandzelo hinkwawo. ₁₁Muxe a a te: ‘Ma herisiwile, hikuva mhamba yo susa swidyoho a yi dyiwanga.’ ₁₂Solomoni na yena a tlangela nkhuvo lowu masiku ya 8.

₁₃“Timhaka leti ti tsariwile ebukwini ya matimu ya tihosi ni le bukwini ya mintirho ya Nehemiya leyi tsariweke hi yena n'wini. Naswona Nehemiya ú akile yindlu ya vuhlayiselo bya tibuku ni ku hlengeleta tibuku ta tihosi ni ta vaprofeta, swin'we ni matsalwa ya Davhida ni mapapila ya tihosi hi tlhelo ra timhamba ta magandzelo. ₁₄Yudasi na yena ú hlengeletile tibuku hinkwato leti hangalasiweke hikwalaho ka nyimpi, kutani ti le mavokweni ya hina. ₁₅Loko mi ti lava, rhumani vanhu va ta ti amukela, va mi tisela tona.

₁₆“Sweswi hi le kusuhi ni ku tlangela nkhuvo wa ku hlawulekisiwa ka Tempele. Hikokwalaho hi mi tsalela ku kombela leswaku na n'wina mi tlangela nkhuvo lowu. ₁₇I Xikwembu lexi poniseke vanhu va xona ni ku va tlherisela tiko ro hlawuleka ra vona, ni vuhosi, ni vuprista, ni mintirho ya Tempele, ₁₈hilaha xi tshembiseke hakona hi nawu wa xona. Kutani hi tshemba leswaku ku nga ri khale Xikwembu xi ta hi twela vusiwana, xi ta vuyisa eXivandleni xa xona lexo hlawuleka, hina hi hangalakeke ematlhelweni hinkwawo ya misava, hikuva xi hi ponisile eka makhombo lamakulu ni ku basisa xivandla lexi.”

₁₉Yasoni wa Kirene ú tsarile tibuku ta 5 ta mintirho ya Yudasi Makabiya ni vamakwavo, ni ta ku hlawulekisiwa ka Tempele, ni ta ku khanguriwa ka alitari. ₂₀Etibukwini leti a a hlamusela hi ta ku lwa ka Vayuda na Antiyoko Epifani ni n'wana wa yena Antiyoko Yupatoro, ₂₁ni ta swivono swa le tilweni leswi humeleleke eka lava va chivirikelaka Xiyuda. Hambiloko va nga ri vangani, Vayuda va tekile tiko hinkwaro ni ku hlongorisa mavuthu ya vamatiko. ₂₂Va tlhela va teka Tempele yo tiveka swinene ematlhelweni hinkwawo ya misava ni ku ntshunxa Yerusalema, kutani va pfuxa milawu leyi a yi ri kusuhi no herisiwa. Va swi kotile ku endla leswi hinkwaswo, hikuva Xikwembu xi va kombile tintswalo.

₂₃Sweswi ndzi ta ringeta ku katsakanya eka buku yin'we tibuku ta 5 leti tsariweke hi Yasoni. ₂₄Ndzi xiyaxiyile tinhlayo leto tala leti nga kona etibukwini leti, kutani ndzi vonile leswaku lava navelaka ku tiva timhaka hinkwato ta tona ni ku twisisa matimu ya kona, va nga kuma ku nonon'hweriwa swinene hikwalaho ka leswo tala leswi tsariweke eka tona. ₂₅Timhaka leti, ndzi ringetile ku ti olovisela vahlayi hinkwavo: lava va nga ta ti hlayela ntsena ku tiphina, ti ta va tsakisa, ni lava va nga ta lava ku ti dyondza hi nhloko, a ti nga va nonon'wheli. ₂₆Ntirho lowu wa ku katsakanya tibuku leti, a hi ntirho wo olova, i ntirho wo nonon'hwa wo pfumata vurhongo, ₂₇wo fana ni ntirho wa munhu loyi a navelaka ku lunghisela van'wana nkhuvo ni ku va tsakisa hinkwavo. Hambiswiritano, ndzi tsaka ku sungula ntirho wo tika lowu, leswaku ndzi ta nkhensiwa hi vahlayi lavo tala va buku ya mina. ₂₈Ndzi ta tshikela vutihlamuleri bya vuxokoxoko bya matimu eka Yasoni, kutani ndzi ta ringeta ku katsakanya timhaka letikulu ta matimu lawa. ₂₉Muaki wa yindlu leyintshwa ú fanele a langutisa hinkwaswo swa ntirho wa kona, kambe loyi a yi pendaka ni ku yi khavisa ú langutisa ntsena leswi swi yi sasekisaka. Hi ku vona ka mina, swi tano na mina. ₃₀Ku tiva ni ku twisisa timhaka hinkwato ta matimu, ku ti hlamusela ni ku ti xiyaxiya hi vuxokoxoko, i ntirho wa mutsari wa tona wo sungula. ₃₁Kambe loyi a katsakanyaka timhaka ta kona, ú fanele ku pfumeleriwa ku ti komisa ni ku tshika ku ti tsala hi vuxokoxoko. ₃₂Kutani ke, a ndzi lavi ku vula swin'wana, kambe ndzi ta sungula mahungu ya mina sweswi, hikuva byi nga va byi ri vuphukuphuku ku lehisa xiviko xa matimu, loko hi ri karhi hi komisa matimu hi voxe.