Ta Ku dlawa ka Menela
1Hi lembe ra 149 Yudasi ni masocha ya yena va twa leswaku Antiyoko Yupatoro ni mavuthu layo tala ya yena a va ri karhi va ta ku ta hlasela Yudiya. 2Antiyoko Yupatoro a a heleketiwa hi Lisiya, muhlayisi wa yena la langutelaka hinkwaswo swa mfumo wa yena. A va ri ni mavuthu lamakulu ya Vagriki hi leswaku masocha yo ringana 110 000 lama fambaka hi milenge, ni vagadi va tihanci va 5 300, ni tindlopfu ta 22, ni makhalichi ya 300 lama a ya ri ni tin'hwevo.
3Menela a famba na vona, kutani hi vuxisi lebyikulu a va hlohlotela ku ya hlasela Yudiya, ku nga ri ku navelela varikwavo leswinene, kambe hi ku ehleketa leswaku ú ta vekiwa nakambe ku va Muprista lonkulu. 4Kasi Xikwembu, HOSI ya tihosi, xi endla leswaku Antiyoko Yupatoro a hlundzukela Menela. Kutani loko Lisiya a tivisa hosi leswaku Menela a a ri muvangi wa madzolonga hinkwawo, Antiyoko Yupatoro a lerisa leswaku va yisa Menela eBerea ni ni ku n'wi dlaya hi ndlela leyi yi nga toloveriwa ku dlaya swigevanga emutini lowu. 5Emutini lowu a ku ri ni xihondzo lexi ku ya ehenhla a xi ri 25 m, lexi a xi tele nkuma, naswona a ku ri ni muvundzu lowu a wu rhendzeleke xihondzo lexi ematlhelweni hinkwawo ku sukela ehenhla ku ya fikela ehansi enkumeni wa kona. 6Kona kwala va wisa ni ku dlaya un'wana ni un'wana loyi a a ri ni nandzu wo gandzela swikwembu swimbe kumbe wa vugevenga byihi na byihi. 7Menela a dlayiwa hi ndlela leyi, a nga lahliwanga. 8Leswi a swi n'wi fanerile, hikuva a a nyamisile minkarhi yo tala nkuma lowo hlawuleka wa ndzilo wa alitari ya Tempele, kutani ú fele enkumeni.
Nyimpi ekusuhi ni muti wa Modeni
9Hosi Antiyoko Yupatoro a ya emahlweni ku hlasela Yudiya hi ku tikukumuxa lokukulu, a ri ni makungu ya ku xanisa Vayuda hi mahlomulo lama tlulaka lawa va tshamaka va vavisiwa ha wona enkarhini wa mfumo wa tata wa yena. 10Loko Yudasi a twa mhaka leyi, a lerisa Vayuda ku khongela HOSI Xikwembu vusiku ni nhlekanhi leswaku xi va pfuna, hikuva a va ri kusuhi ni ku tekeriwa nawu, ni tiko, ni Tempele leyo hlawuleka. 11A va sungurile ku hanya hi ku ntshunxeka, hikokwalaho a xi nga faneli ku va tshika va wela emavokweni ya vamatiko lava a va xi sandza. 12Kavaloko Vayuda hinkwavo va tshama va khongela Xikwembu xa tintswalo masiku manharhu, va rila, va titsona swakudya ni ku pavalala emahlweni ka xona. Kutani Yudasi a va khongotela ni ku va tiyisa ku tilunghisela ku ya lwa ni valala va vona.
13Endzhaku ka swona, Yudasi a ya hlangana exihundleni ni vakulukumba va Vayuda, kutani va twanana ku huma nyimpi hi ku pfuniwa hi Xikwembu ni ku ya hlasela mavuthu ya Antiyoko Yupatoro ma nga si nghena eYudiya ma ta ku ta rhendzela Yerusalema. 14Kavaloko a veka hinkwaswo emavokweni ya Mutumbuluxi wa tilo ni misava, a tlhela a khongotela masocha ya yena ku lwa hi vunhenha ni ku fela milawu ya vona, na Tempele, na Yerusalema, ni tiko ra ka vona, ni mahanyele ya ka vona hinkwawo. Kutani a ya dzima mixaxa ya mavuthu ya yena kusuhi na Modeni. 15Kavaloko Yudasi a lerisa masocha ya yena ku huwelela enyimpini ma ku: “Ku hlula i ka Xikwembu”, kutani a hlawula vuthu ra majaha ya xivindzi lama tivaka ku lwa swinene, kutani a ya hlasela ntsonga wa hosi nivusiku. Vayuda va dlaya valala va kwalomu va 2 000 emixaxeni ya vona, va tlhava ni ku dlaya ndlopfu leyi rhangelaka tindlopfu tin'wana kun'we ni mugadi wa yona. 16-17Eku heteleleni ku va ni ku chava lokukulu emixaxeni ya valala, kutani Vayuda va suka kwalaho nimpundzu ngopfu. Leswi swi humelerile hikuva Xikwembu a xi pfuna ni ku sirhelela Vayuda.
Antiyoko a endla xinakulobye na Vayuda
18Endzhaku ka loko a vonile vunhenha bya Vayuda, Antiyoko Yupatoro a endla mano man'wana ya ku ya teka tindhawu ta Vayuda. 19A ya hlasela Beta-Suru khokholo lero tiya ra Vayuda, kambe a yimisiwa, a tlheriseriwa ni ku hluriwa. 20Kavaloko Yudasi a rhumela tinhundzu to tala eka Vayuda lava a va sirhelela khokholo ra Beta-Suru. 21Kambe Rhodoko, un'wana wa masocha ya Vayuda, a paluxa xihundla xin'wana eka valala. Kambe a kumiwa, a khomiwa ni ku pfaleriwa ekhotsweni. 22Hosi Antiyoko Yupatoro a ringeta ravumbirhi ku phahlelana mariyeta na vanhu va Beta-Suru, a twanana na vona, kutani a suka kwalaho, a ya hlasela Yudasi ni masocha ya yena, kambe a tlhela a hluriwa. 23Enkarhini lowu Antiyoko Yupatoro a twa leswaku Filipi loyi a a vekiwile ku va mulanguteri wa mfumo wa yena kwale Antiyoka a a n'wi pfukerile. Hikokwalaho Antiyoko Yupatoro a hela matimba, kutani a sungula ku phahlelana mariyeta na Vayuda, a ya twanana na vona, a hlambanya ku va endlela leswi lulameke. Ku tiyisa ntwanano lowu, a humesa gandzelo, a xixima Tempele hi ku hanana swinene Xivandla lexo hlawuleka. 24A amukela Yudasi hi xinakulobye, a veka Hegemonide ku va murhangeri wa xifundzha lexi sukaka ePitolemayi xi ya fika eGerara, 25kutani yena a suka kwalaho a ya fika ePitolomayi. Vanhu va Pitolemayi va hlundzuka hikwalaho ka ntwanano lowu Antiyoko Yupatoro a wu endleke na Vayuda; va hlundzuka ku tlula mpimo, kutani va lava leswaku ntwanano lowu wu herisiwa. 26Kambe Lisiya a va hlamusela ntwanano lowu hilaha a nga swi kotaka hakona, a va khorwisa, a va tsakisa, a endla leswaku va n'wi tshemba, kutani a tlhelela emutini wa Antiyoka.
Antiyoko Yupatoro a a tlheriseriwile eku hlaseleni ka Yudiya hi ndlela leyi.
