II Tihosi 2

₁Enkarhini lowu HOSI Xikwembu a xi lava ku tlakula Eliya hi xihuhuri a ya etilweni. Kutani siku rin'wana, Eliya na Elixa a va ta va huma eGiligala; ₂loko va ri karhi va famba, Eliya a ku ka Elixa: “Ndza ku kombela, sala kwala, hikuva HOSI Xikwembu xi ndzi rhumile leswaku ndzi ya fika eBetele.” Kambe Elixa a hlamula a ku: “Ndza tiyisa emahlweni ka HOSI Xikwembu lexi hanyaka, ni le mahlweni ka wena, ndzi ri: Ndzi nga ka ndzi nga sali.” Kutani va rhelela swin'we va ya eBetele. ₃Vadyondzisiwa va vaprofeta lava a va ri eBetele, va huma emutini va ta eka Elixa, va ku ka yena: “Xana wa swi tiva leswaku namuntlha, HOSI Xikwembu xi ta ku tekela n'wini wa wena, xi n'wi tlakula a ya ehenhla xana?” Elixa a hlamula a ku: “Ina, ndza swi tiva, mi nga ha vulavuli hi swona.”

₄Kutani Eliya a ku ka Elixa: “Ndza ku kombela, sala kwala, hikuva HOSI Xikwembu xi ndzi rhumile ku ya eYeriko.” Kambe Elixa a hlamula a ku: “Ndza tiyisa emahlweni ka HOSI Xikwembu lexi hanyaka, ni le mahlweni ka wena, ndzi ri: Ndzi nga ka ndzi nga sali.” Kutani va fika eYeriko. ₅Vadyondzisiwa va vaprofeta lava a va ri eYeriko va ta eka Elixa, va n'wi vutisa va ku: “Xana wa swi tiva leswaku namuntlha HOSI Xikwembu xi ta ku tekela n'wini wa wena, xi n'wi tlakula a ya ehenhla xana?” Elixa a hlamula a ku: “Ina, ndza swi tiva, mi nga ha vulavuli hi swona.”

₆Kutani Eliya a ku ka Elixa: “Ndza ku kombela, sala kwala, hikuva HOSI Xikwembu xi ndzi rhumile ku ya enambyeni wa Yordani.” Kambe Elixa a hlamula a ku: “Ndza tiyisa emahlweni ka HOSI Xikwembu lexi hanyaka, ni le mahlweni ka wena, ndzi ri: Ndzi nga ka ndzi nga sali.” Kutani va famba swin'we. ₇Vadyondzisiwa va 50 va vaprofeta va longoloka na vona, va yima hi le tlhelo ekulenyana na vona. Eliya na Elixa vona va ya yima eribuweni ra Yordani. ₈Eliya a teka xiambalo xa yena xa vuprofeta, a xi songa, a ba mati ha xona, kutani ma avana hi le xikarhi, ha vumbirhi bya vona va pela laha ku omeke.

₉Kuteloko va perile, Eliya a ku ka Elixa: “Kombela lexi u lavaka leswaku ndzi ku endlela xona, ndzi nga si tlakuriwa ndzi ku siya.” Kutani Elixa a hlamula a ku: “Ndza ku kombela, ndzi avele moya wa wena kambirhi.” ₁₀Eliya a hlamula a ku: “U komberile xilo lexi nonon'hwaka; hambiswiritano, loko u ndzi vona ndzi ri karhi ndzi tlakuriwa ndzi ku siya, u ta endleriwa swona; kambe loko u nga ndzi voni, a wu nga endleriwi swona.” ₁₁Loko va ri karhi va famba va vulavula, hi nomu lo kalichi ya ndzilo ni tihanci ta ndzilo swi va hambanisa. Kutani Eliya a tlakuleriwa etilweni hi xihuhuri. ₁₂Loko Elixa a swi vona, a huwelela a ku: “Tatana, tatana! Makalichi ya Vaisraele ni vagadi va tihanci ta kona!” Kutani a nga ha n'wi vonanga kambe.

Elixa a khoma swiambalo swa yena, a swi handzula hi le xikarhi. ₁₃Kutani a teka xiambalo xa vuprofeta lexi weke hi le makatleni ya Eliya, a tlhelela enambyeni wa Yordani, a yima eribuweni. ₁₄Kutani a khoma xiambalo lexi weke hi le makatleni ya Eliya, a ba mati ha xona, a ri karhi a vutisa a ku: “Yi kwihi HOSI, xona Xikwembu xa Eliya hi xiviri xa xona ke?” Loko a bile mati ya nambu, wona ma avana hi le xikarhi, kutani a tsemakanya.

₁₅Vadyondzisiwa va vaprofeta lava a va ri eYeriko va n'wi vona va ri kulenyana etlhelo, kutani va ku: “Moya wa Eliya wu nghenile eka Elixa.” Hiloko va ya n'wi hlanganisa, va nkhinsama emahlweni ka yena, ₁₆va ku ka yena: “Languta, hina malandza ya wena, hi ni vavanuna va 50 va matimba; wa nga va pfumelela ku ya lava n'wini wa wena. Kumbexana, moya wa HOSI Xikwembu wu nga va wu n'wi tlakurile, wu ya n'wi hoxa entshaveni yin'wana, kumbe enkoveni wun'wana.” Kambe Elixa a ala, a ku: “Mi nga tshuki mi rhuma munhu.” ₁₇Hambiswiritano, loko va n'wi sindzisile a kondza a khomiwa hi tingana, a ku: “Va rhumeni!” Kutani va rhuma vavanuna lava va 50, va ya lava Eliya masiku manharhu, kambe a va n'wi kumanga. ₁₈Kutani va tlhelela eka Elixa eYeriko, lomu a a ri kona, kutani a ku ka vona: “Xana a ndzi mi byelanga leswaku mi nga yi xana?”

₁₉Endzhaku ka sweswo, vanhu va muti wa Yeriko va ta eka Elixa, va ku ka yena: “Vona: Matshamelo ya muti lowu ma tsakisa, hilaha u swi vonaka hakona wena n'wini wa hina, kambe mati ya kona ma ni vuvabyi, ma vangela vavasati ku onhakeriwa.” ₂₀Elixa a lerisa a ku: “Ndzi tiseleni nkambana lowuntshwa, mi chela munyu eka wona.” Va n'wi tisela swona. ₂₁Kavaloko a rhelela a ya exihlobyeni, a ya xi chela munyu, a ku: “HOSI Xikwembu xi vurisa sweswo xi ri: ‘Ndzi tengisile mati lawa; ku sukela sweswi, a ma nga ha vangi rifu, hambi ku onhakeriwa ka vavasati.’ ” ₂₂Kutani mati lawa ni namuntlha ma ha tengisile sweswo, hilaha Elixa a vuleke hakona.

₂₃Elixa a suka kwalaho, a tlhandlukela eBetele. Loko a ri endleleni leyi kongomaka kona, swifanyetana swin'wana swi huma emutini, swi n'wi hlekula swi ku: “Tlhandluka, wee mpandlhani! Tlhandluka, wee mpandlhani!”

₂₄Elixa a hundzuluka, a languta swifanyetana leswi, a swi holovela hi vito ra HOSI Xikwembu. Hi nomu lo, swinkankanka swimbirhi swa mantswele swi huma hi le xihlahleni, swi kavatlulela swifanyetana swa 42. ₂₅Kavaloko Elixa a hundzela emahlweni, a ya entshaveni ya Karmele; kutani a suka entshaveni, a tlhelela emutini wa Samariya.