Ta ku fuma ka Yowahazi eIsraele
1Hi lembe ra 23 ra ku fuma ka Yowasi n'wana Ahaziya hosi ya le Yuda, Yowahazi n'wana Yehu a sungula ku fuma tiko ra Israele; a fuma malembe ya 17 a ri eSamariya. 2A endla leswo biha emahlweni ka HOSI Xikwembu, emahanyelweni ya yena, a dyoha ku fana na Yerobuwamu n'wana Nebati, loyi a a dyohisile ni Vaisraele; a nga fularhelanga swidyoho leswi. 3Hikokwalaho, HOSI Xikwembu xi hlundzukela Vaisraele, xi va nyiketa kambe na kambe emavokweni ya Hazaele hosi ya le Siriya, ni le mavokweni ya Bene-Hadada n'wana wa yena.
4Kavaloko Yowahazi a khongela hi matimba eka HOSI Xikwembu, kutani xi n'wi yingisa, hikuva a xi vonile ku xaniseka ka Vaisraele, ni hilaha hosi ya le Siriya a yi va tshikelela hakona. 5Hikokwalaho, HOSI Xikwembu xi rhumela Vaisraele munhu loyi a va lamulelaka. Vaisraele va ntshunxiwa eka Vasiriya, kutani va tshama hi ku rhula emakaya ya vona, ku fana ni khale. 6Hambiswiritano, a va tshikanga swidyoho swa ndyangu wa Yerobuwamu, munhu loyi a a dyohisile Vaisraele, kambe va hanyile eka swona. Hambi yi ri mhandze ya Axera xikwembukazi, va yi tshikile yi yimile eSamariya.
7Yowahazi a a nga sali na munhu: A ko va ni vagadi va tihanci va 50 ntsena, ni makalichi ya khume, ni tinhenha ta 10 000 leto famba hi milenge; hosi ya le Siriya a yi va herisile, yi va kandziyele tanihi mungu eku huleni. 8Kutani ke, mintirho leyin'wana ya Yowahazi, ni hinkwaswo leswi a swi endleke, ni ta vunhenha bya yena, swi tsariwile eka “Buku ya Matimu” ya tihosi ta Israele. 9Yowahazi a tietlelela, kutani a lahliwa eSamariya, Yowasi n'wana wa yena a sala a fuma.
Ta ku fuma ka Yowasi eIsraele
10Hi lembe ra 37 ra ku fuma ka Yowasi etikweni ra Yuda, Yowasi n'wana Yowahazi a sungula ku fuma tiko ra Israele; a fuma malembe ya 16 a ri eSamariya; 11na yena a endla leswo biha emahlweni ka HOSI Xikwembu. A nga fularhelanga swidyoho hinkwaswo leswi Yerobuwamu n'wana Nebati a a dyohisile Vaisraele ha swona, kambe ú hanyile eka swona. 12Kutani ke, mintirho leyin'wana ya Yowasi, ni hinkwaswo leswi a swi endleke, ni ta vunhenha lebyi a lweke na Amasiya hosi ya Yuda ha byona, swi tsariwile eka “Buku ya Matimu” ya tihosi ta Israele. 13Yowasi a tietlelela, a lahliwa eSamariya, emasirheni ya vakokwa wa yena tihosi ta Israele. Kutani vuhosi bya yena byi sala byi tekiwa hi Yerobuwamu.
Ta ku fa ka muprofeta Elixa
14Enkarhini wolowo, Elixa a khomiwa hi vuvabyi lebyi nga n'wi yisa eku feni. Hosi Yowasi wa Israele a rhelela ku ya n'wi pfuxela, a fika a korhama ehenhla ka yena, a ri karhi a rila, a ku: “Tatana, tatana! Makalichi ya Vaisraele, ni vagadi va tihanci ta kona!” 15Elixa a ku ka hosi: “Teka vurha ni miseve.” Yowasi a endlisa sweswo. 16Kutani muprofeta a ku ka hosi ya Israele: “Konga vurha lebyi!” Hosi yi byi konga. Elixa a tlhandleka mavoko ya yena ehenhla ka mavoko ya hosi. 17Kutani a lerisa a ku: “Pfulani fasitere ra le tlhelo ra vuxa.” Va ri pfula. Elixa a engeta a ku: “Copa!” Yowasi a endlisa sweswo. Kutani Elixa a ku ka yena: “Lowu i nseve wa HOSI Xikwembu lowu hlulaka; i nseve lowu nga ta hlula Vasiriya, hikuva u ta lwa na Vasiriya le Afeka, u kondza u va heta va ku bì!” 18Elixa a engeta a ku: “Teka miseve leyi.” Yowasi a yi teka. “Tlhava misava ha yona”, ku vula muprofeta; hosi yi tlhava kanharhu, kutani yi yima. 19Munhu wa Xikwembu a karihela Yowasi, a ku ka yena: “Mawaku loko ingi u tlhavile kantlhanu kumbe ka-6. A wu ta va u hlurile Vasiriya, u va heta va ku bì! Kambe sweswi u ta hlula Vasiriya kanharhu ntsena.”
20Elixa a fa, kutani va n'wi lahla esirheni. Eminkarhini yoleyo mintlawa ya swigevenga swa le Mowabu a yi tolovele ku nghena etikweni ra Israele lembe rin'wana ni rin'wana. 21Siku rin'wana vanhu a va ri eku lahleni ka munhu, kutani ntlawa wun'wana exikarhi ka mintlawa leyi ya swigevenga wo tshuka wu humelela; hiloko lava lahlaka munhu va cukumeta ntsumbu wa yena esirheni ra Elixa, va suka va tsutsuma. Kutani loko ntsumbu lowu wu khumbana ni marhambu ya Elixa, mufi a pfuka eku feni, a yima hi milenge.
Ta Vaisraele loko va lwa ni Vasiriya
22Hazaele hosi ya le Siriya ú xanisile Vaisraele emasikwini hinkwawo ya ku hanya ka Yowahazi. 23Kambe HOSI Xikwembu xi va kombile tintswalo, xi va twela vusiwana ni ku va tsetselela, hikwalaho ka ntwanano wa xona na Abrahama na Isaka na Yakobo; a xi va lovisanga, naswona a xi va cukumetanga, ku fikela siku ra namuntlha.
24Hosi Hazaele wa le Siriya a fa, kutani n'wana wa yena Bene-Hadada a sala a fuma. 25Kutani Yowasi n'wana Yowahazi a lwa na Bene-Hadada n'wana Hazaele, a n'wi hlula kanharhu, kutani a tlhela a fuma miti ya Israele leyi Bene-Hadada a a yi tekele Yowahazi tata wa Yowasi hi matlhari.
