I Vatesalonika 4

₁Kutani ke, vamakwerhu, mi dyondzile eka hina hilaha mi fanelaka ku hanya hakona leswaku mi tsakisa Xikwembu, kutani mi hanyile hi mukhuva wolowo. Hikokwalaho, ha mi kombela hi matimba ni ku mi khongotela hi vito ra Hosi Yesu, leswaku mi ya mi kula, mi ri karhi mi hanyisa sweswo. ₂Hikuva mi tiva leswi hi nga mi lerisa swona hi matimba ya Hosi Yesu; ₃naswona ku rhandza ka Xikwembu hi loku: Hileswaku mi endliwa lava tengeke, hi ku fularhela vuoswi hinkwabyo. ₄Un'wana ni un'wana wa n'wina a a tive ku hlayisa miri wa yena hi ndlela leyo tenga ni leyo lulama, ₅ku nga ri hi ku navela loku hisaka, ku fana ni vamatiko lava nga tiviki Xikwembu. ₆Emhakeni leyi, ku nga vi na loyi a dyohelaka makwavo, kumbe ku n'wi dyelela, hikuva Hosi i murihiseli eswilweni leswi hinkwaswo, hilaha hi nga mi byela khale ni ku mi tsundzuxa swinene hakona. ₇Hikuva Xikwembu a xi hi vitanelanga ku hanya ethyakeni, kambe eku tengeni. ₈Hikokwalaho, loyi a alaka xitsundzuxo lexi, a nga soli munhu, kambe ú sola Xikwembu lexi xi mi nyikaka Moya wa xona lowo Kwetsima.

₉Loko ti ri ta ku rhandzana ni vamakwenu eHosini, a mi faneli ku tsaleriwa nchumu hi tona; hikuva i Xikwembu lexi xi mi dyondziseke ku rhandzana; ₁₀kutani hi swona leswi mi swi endlaka eka vamakwerhu hinkwavo lava nge tikweni hinkwaro ra Makedoniya. Hambiswiritano, ha mi khongotela vamakwerhu, leswaku mi ya emahlweni, mi kula erirhandzwini rero. ₁₁Ku navela ka n'wina lokukulu a ku ve ku hanya hi ku rhula, mi tikarhatela swa n'wina, mi tirha hi mavoko ya n'wina, hilaha hi nga rhanga hi mi tsundzuxa hakona. ₁₂Hi mukhuva lowu, mi ta kombiwa xichavo hi va le handle, mi nga ha tikiseli munhu ni un'we.

₁₃Vamakwerhu, ndzi lava leswaku mi tiva ntiyiso hi tlhelo ra lava va tietleleleke, mi ta ka mi nga vaviseki kukota van'wana lava nga riki na ku langutela. ₁₄Hikuva leswi hi pfumelaka leswaku Yesu ú file, a tlhela a pfuka eku feni, hi mukhuva wolowo, hi pfumela leswaku lava tietleleleke, Xikwembu xi ta va pfuxa na Yesu eku feni, xi va vuyisa swin'we na yena.

₁₅Lexi hi mi byelaka xona hi vito ra Hosi, hi lexi: Hina hi nga ta va ha ha hanya loko Hosi yi vuya, hi nga ka hi nga rhangeli lava tietleleleke; ₁₆hikuva Hosi hi xiviri xa yona yi ta xika hi le tilweni, hi mpfumawulo wa rito ra ku lerisa, hi ku huwelela ka ndhuna ya tintsumi, ni ku ba ka mhalamhala ya Xikwembu, kutani lava feleke ka Kriste, va ta rhanga va pfuka eku feni; ₁₇kutani hina lava hi nga ta va ha ha hanya, hi ta tlakuriwa hi ya ehenhla emapapeni swin'we na vona, hi ya hlangana na Hosi empfhukeni. Kutani hi mukhuva wolowo, hi ta va na Hosi hilaha ku nga heriki. ₁₈Hikokwalaho mi fanele ku tiyisana hi marito wolawo.