I Vatesalonika 1

₁Mina Pawulo, na Silvano, na Timotiya, hi tsalela va kereke ya le Tesalonika, lava nga vanhu va Xikwembu Tatana, ni va Hosi Yesu Kriste, hi ri:

Tintswalo ni ku rhula a swi ve na n'wina!

₂Hi nkhensa Xikwembu masiku hinkwawo hikwalaho ka n'wina hinkwenu, hi ri karhi hi mi anakanya emikhongelweni ya hina. ₃Emahlweni ka Xikwembu Tata wa hina, hi tsundzuka hilaha ku pfumela ka n'wina ku tikombeke hakona hi swiendlo, ni leswaku mi chivirika eku languteleni ka Hosi ya hina Yesu Kriste, hi rirhandzu ni ku tikarhata. ₄Ha swi tiva, vamakwerhu, leswaku Xikwembu xa mi rhandza, ni leswaku xi mi hlawurile. ₅Hikuva Evhangeli leyi hi yi twarisaka, a yi tanga eka n'wina hi marito ntsena, kambe hi matimba, ni Moya lowo Kwetsima, ni ku khorwisa ka yona loku hetisekeke. Ma tiva hilaha hi nga hanya hakona exikarhi ka n'wina ku mi pfuna. ₆Kutani na n'wina mi landzile mitila ya hina ni ya Hosi, hikuva, hambileswi mi nga xaniseka ngopfu, mi amukerile Rito ra Xikwembu hi ku tsaka loku nyikiwaka hi Moya lowo Kwetsima. ₇Hi mukhuva wolowo, mi hundzukile xikombiso eka hinkwavo lava pfumeleke ematikweni ya Makedoniya ni ya le Akaya. ₈A hi ntsena Rito ra Hosi ro huma eka n'wina leri twakarisiwaka le Makedoniya ni le Akaya, kambe na kona ku pfumela ka n'wina eka Xikwembu ku twakele hinkwako; hikokwalaho a swi faneri leswaku hi nga ha vula xa nchumu. ₉Vanhu lava hinkwavo va rungula hilaha mi hi amukeleke hakona exikarhi ka n'wina, ni hilaha mi nga hundzukela eka Xikwembu hakona, mi fularhela swikwembu swa hava, leswaku mi tirhela Xikwembu lexi hanyaka, xa ntiyiso. ₁₀Naswona mi langutela ku ta ka N'wana wa xona Yesu hi le matilweni, loyi xi n'wi pfuxeke exikarhi ka vafi, loyi a hi lamulelaka eku avanyiseni ka xona loku taka.