I Samiele 16

₁HOSI Xikwembu xi vutisa Samiele xi ku: “Xana u ta va ni xiviti xa ku rilela Sawulo ku fikela rini, leswi ndzi n'wi tshikeke leswaku a nga ha vi hosi ya Israele, xana? Chela mafurha erimhondzweni ra wena ri tala, u ya laha ndzi nga ta ku rhuma kona, eka Yese wa le Betlehema, hikuva ndzi tihlawulele hosi exikarhi ka majaha ya yena.” ₂Samiele a hlamula a ku: “Ndzi ta fambisa ku yini xana? Loko Sawulo o twa mhaka leyi, ú ta ndzi dlaya.” HOSI Xikwembu xi ku ka yena: “Famba ni thokazi, u ta va byela leswaku u tile ku ta humesela HOSI Xikwembu egandzelo. ₃U ta rhamba Yese egandzelweni; mina ndzi ta ku komba leswi u faneleke ku swi endla, kutani u ta ndzi hlawulela loyi ndzi nga ta ku komba yena, u n'wi chela mafurha enhlokweni.” ₄Samiele a endla hilaha HOSI Xikwembu xi n'wi leriseke hakona, a ya eBetlehema. Vakulukumba va muti va n'wi hlanganisa va ri karhi va rhurhumela, va vutisa va ku: “Xana u ta hi moya wa ku rhula xana?” ₅Yena a va hlamula a ku: “Hi ku rhula ntsena! Ndzi tele ku humesela HOSI Xikwembu egandzelo. Tibasiseni leswaku mi ta va na mina egandzelweni.” Kutani Samiele a basisa Yese ni majaha ya yena, a va rhamba egandzelweni.

₆Loko va fika, Samiele a languta Eliyabu, a anakanya a ku: “Jaha leri ri yimeke emahlweni ka HOSI Xikwembu, ri ta va ri ri rona leri xi ri hlawuleke.” ₇Kambe HOSI Xikwembu xi ku ka yena: “U nga languti ku saseka ka yena kumbe ku leha ka xiyimo xa yena, hikuva a ndzi n'wi hlawulanga. Mina HOSI, a ndzi yi hi leswi vanhu va vonaka swona; vanhu va languta nghohe, kambe mina HOSI ndzi languta mbilu.” ₈Kutani Yese a vitana Abinadaba, a n'wi tisa a hundza hi le mahlweni ka Samiele. Kambe Samiele a ku: “E-e, na yena loyi HOSI Xikwembu a xi n'wi hlawulanga.” ₉Yese a tisa Xama, kutani Samiele a engeta a ku: “Hambi a ri loyi, HOSI Xikwembu a xi n'wi hlawulanga.” ₁₀Yese a tisa vana va yena va 7 va hundza hi le mahlweni ka Samiele. Kambe Samiele a ku ka yena: “Hinkwavo lava, HOSI Xikwembu a xi va hlawulanga.” ₁₁Kutani Samiele a vutisa Yese, a ku: “Xana vana va wena va majaha, va helele hinkwavo xana?” Yese a hlamula a ku: “Ka ha sele lontsongo wa kona, kambe ú le ku riseni ka tinyimpfu.” Samiele a ku ka Yese: “Rhuma vanhu va ya n'wi vitana, hikuva hi nga ka hi nga humesi gandzelo loko a nga si fika.” ₁₂Kutani Yese a rhuma vanhu, va ya vuya na yena. Jaha ra kona a ri ri mbhuri ya mahlo yo saseka ni xivumbeko xo tsakisa. HOSI Xikwembu xi ku ka Samiele: “Loyi, hi yena! Suka u yima u n'wi chela mafurha enhlokweni.” ₁₃Kavaloko Samiele a teka rimhondzo ra mafurha, a chela Davhida enhlokweni exikarhi ka vamakwavo. Kutani Moya wa HOSI Xikwembu wu nghena Davhida hi matimba, wu va na yena ku sukela siku rero ku ya ni ku ya. Samiele yena a tlhelela eRhama.

₁₄Hi nkarhi wolowo, Moya wa HOSI Xikwembu a wu humile eka Sawulo, kutani hi minkarhi yin'wana a a pfa a xanisiwa hi moya lowo biha lowu rhumiweke hi HOSI Xikwembu. ₁₅Malandza ya Sawulo ma ku ka yena: “Ha swi tiva leswaku u xanisiwa hi moya lowo biha lowu rhumiweke hi HOSI Xikwembu. ₁₆Hikokwalaho, wena n'wini wa hina, hi rhume, hina malandza ya wena lama yimeke emahlweni ka wena, hi ya lava munhu loyi a tivaka ku chaya haripa; kutaku loko moya lowo biha lowu rhumiweke hi HOSI Xikwembu wu tshuka wu ku nghena, munhu loyi ú ta chaya haripa, kutani wena u ta antswa.” ₁₇Kutani Sawulo a lerisa malandza ya yena, a ku: “Hiswona, ndzi laveleni munhu loyi a kotaka ku chaya swinene, mi ndzi tisela yena.” ₁₈Un'wana wa majaha a ku ka Sawulo: “Ndzi vonile n'wana Yese wa le Betlehema, la kotaka ku chaya haripa swinene. I jaha ra ntiya-nhlana, nhenha eku lweni, munhu la vulavulaka a nga tilumalumi, wa xiyimo xo saseka; naswona, HOSI Xikwembu xi na yena munhu loyi.” ₁₉Kutani Sawulo a rhuma vanhu eka Yese, a ku: “Ndzi rhumele Davhida n'wana wa wena, la risaka tinyimpfu.” ₂₀Yese a rhumela Davhida eka Sawulo, a famba na ximbutana, ni mbhongolo leyi rhweleke swinkwa, ni nkwama wa dzovo wo tala vhinyo. ₂₁Davhida a ya fika eka Sawulo, a nghena entirhweni wa yena. Sawulo a n'wi tsakela ngopfu, a n'wi endla mukhomi wa matlhari ni switlhangu swa yena. ₂₂Sawulo a rhumela rito eka Yese, a ku: “Davhida wa ndzi tsakisa, ndzi kombela leswaku a ya emahlweni a ndzi tirhela.” ₂₃Ku sukela kwalaho, loko moya lowo biha lowu rhumiweke hi HOSI Xikwembu wu tshuka wu nghenile Sawulo, Davhida a a teka haripa a yi chaya, kutani moya lowo biha a wu huma, Sawulo a sala a rhurile.