I Vamakabiya 7

₁Hi lembe ra 151 Demetriyo, n'wana Seluko, a suka eRhoma kun'we ni vavanuna va nga ri vangani, a nghena engalaveni a pelela emutini wun'wana eribuweni ra lwandle ra Mediteraniya, kutani a tiendla hosi kona. ₂Kutani loko Demetriyo a ri karhi a nghena endlwini ya vuhosi ya vatata wa yena, masocha ya yena ma khoma Antiyoko Yupatoro na Lisiya, ma ku ma ta va yisa eka yena. ₃Kambe loko mhaka leyi yi fika etindleveni ta Demetriyo, a va byela a ku: “A ndzi lavi ku va vona.” ₄Kavaloko masocha ma dlaya Antiyoko Yupatoro na Lisiya, kutani Demetriyo a sala a fuma.

₅Hiloko vahomboloki ni vanhu va tihanyi va Vayuda va ta eka Demetriyo. A va rhangeriwe hi Alkimo, loyi a a navela ku va Muprista lonkulu. ₆Va hehla Vayuda van'wana eka hosi Demetriyo, va ku: “Yudasi ni vamakwavo va dlayetele vanghana va wena hinkwavo, kutani va hi hlongorile etikweni ra rikwerhu. ₇Sweswi, rhumela munhu loyi u n'wi tshembeke ku ya vona hinkwaswo leswi Yudasi a hi onheleke swona ni ku onhela tiko ra hosi, a ta rihisela Yudasi, ni vamakwavo kun'we ni lava va va pfunaka.”

₈Kavaloko Demetriyo a hlawula Bakidi, un'wana wa vanghana va yena loyi a a ri murhangeri wa xifundzha xa Siriyankulu. A a ri munhu wa ndzhuti emfun'weni, naswona a a tshembekile emahlweni ka hosi. ₉Kutani Demetriyo a rhumela Bakidi ni muhomboloki Alkimo, loyi a a n'wi endle Muprista lonkulu, a n'wi lerisa ku rihisela eka Vayuda. ₁₀Kavaloko Bakidi na Alkimo va suka ni mavuthu layo tala, va ya fika etikweni ra Yudiya, kutani va rhumela eka Yudasi ni vamakwavo marito ya ku komba xinakulobye, kambe ma ri ya ku va xisa. ₁₁Kambe Vayuda a va amukelanga marito lawa, hikuva a va vona leswaku valala va tile ni mavuthu layo tala.

₁₂Kavaloko ntlawa wun'wana wa vatsari va nawu wu ta emahlweni ka Alkimo na Bakidi ku ta kombela ntwanano lowu amukelekaka wa ku tinyiketa. ₁₃Vahasidi a va ri vo sungula exikarhi ka Vayuda ku ya kombela xinakulobye, ₁₄hikuva a va ku: “Ku ni muprista wa ndyangu wa ka Aroni exikarhi ka mavuthu lawa, kutani a nga ka a nga hi endli nsele.” ₁₅Alkimo a vulavula marito ya xinakulobye ni ku va hlambanyela a ku: “A hi lavi ku mi vavisa, hambi ku ri ku vavisa vanghana va n'wina.” ₁₆Kavaloko va n'wi tshemba, kambe a khoma vavanuna va 60 exikarhi ka vona, a va dlaya hi siku rin'we. Kutani ku endleka eka vona leswi nga tsariwa khale loko va te:

₁₈Loko va vona leswi humeleleke, Vayuda hinkwavo va chava Alkimo na Bakidi, kutani va ku: “Va hava ntiyiso, va pfumala ni ku lulama, hikuva va tshovile ntwanano, va tlhela va tlula ni ku hlambanya loku va ku hlambanyeke.” ₁₉Kutani Bakidi a suka eYerusalema a ya dzima mixaxa ya yena eBeta-Sayiti, a rhumela masocha ku ya khoma vavanuna lavo tala lava a va tlhakerile eka yena, swin'we ni Vayuda van'wana, a va dlaya, a cukumeta mintsumbu ya vona ekheleni lerikulu. ₂₀A veka Alkimo ku va murhangeri wa tiko, a n'wi siyela ni mavuthu yo n'wi pfuna. Loko a ri yena a tlhelela eka hosi.

₂₁Alkimo a ringeta hi matimba ku tiendla Muprista lonkulu, ₂₂kutani hinkwavo lava vangaka mpfilumpfilu etikweni va n'wi seketela. Tiko hinkwaro ra Yudiya ri wela emavokweni ya vona, kutani va xanisa ngopfu Vayuda. ₂₃Yudasi a vona ku homboloka hinkwako loku Alkimo ni lava a a ri na vona va ku endleke exikarhi ka Vayuda, ku tlula ni leswo biha leswi endliweke hi vamatiko. ₂₄Kavaloko Yudasi a huma a ya hinkwako eYudiya, a rihisela eka vanhu lava a va tlhakile va ya tihlanganisa na Alkimo, a sivela ni van'wana va vona lava a va sele emutini ku huma eka wona. ₂₅Loko Alkimo a vona leswaku Yudasi ni lava a a ri na vona va kuma matimba ni leswaku a tsandzeka ku lwa na vona, a tlhelela eka hosi Demetriyo a va hehla emahlweni ka yena.

₂₆Hiloko hosi Demetriyo a rhuma Nikanoro, un'wana wa tinganakana ta yena ta ndhuma, loyi a a venga ni ku nyenyemuka Vayuda, a n'wi lerisa ku va herisa. ₂₇Nikanoro a fika eYerusalema ni mavuthu layo tala, kutani a kanganyisa Yudasi ni vamakwavo hi ku va rhumela mahungu lama kombaka xinakulobye, a ku: ₂₈“Ku nga vi ni ku lwa exikarhi ka mina na n'wina; ndzi ta ta ni vavanuna va nga ri vangani ku ta vonana na n'wina hi ku rhula.” ₂₉Kavaloko a ta eka Yudasi, kutani va xewetana hi ku rhula. Kambe Nikanoro a a tilulamisela ku khoma Yudasi. ₃₀Swi fika etindleveni ta Yudasi leswaku Nikanoro ú tile eka yena hi vuxisi, kutani a n'wi chava, a ala ku hlangana na yena nakambe. ₃₁Loko Nikanoro a vona leswaku makungu ya yena ma paluxekile, a huma ku ya lwa na Yudasi eKaparisalama. ₃₂Masocha ya Nikanoro ya kwalomu ka 500 ma dlayiwa, lavan'wana va tsutsumela ekhokholweni eYerusalema.

₃₃Endzhaku ka sweswo, Nikanoro a tlhandlukela entshaveni ya Siyoni. Vaprista van'wana va huma eXivandleni lexo hlawuleka, va ri ni vakulukumba van'wana, va ya xeweta Nikanoro hi xinakulobye ni ku n'wi komba magandzelo lama hisiwaka lawa a ma humesiwa hi vito ra hosi Demetriyo. ₃₄Kambe Nikanoro a va monya, a va nyamisa, a va sapatela ni ku vulavula hi ku tikurisa, ₃₅kutani a hlambanya hi ku kariha a ku: “Loko Yudasi ni mavuthu ya yena va nga tisiwi eka mina ko sweswi, loko ndzi ta vuya endzhaku ka ku va hlula, ndzi ta hisa yindlu leyi.” Kutani a suka hi ku kariha lokukulu.

₃₆Kavaloko vaprista va nghena exivaveni, va ya yima emahlweni ka alitari ni Tempele, kutani va rila va ku: ₃₇“We HOSI Xikwembu, hi wena u nga hlawula yindlu leyi leswaku yi vuriwa hi vito ra wena, yi va yindlu ya ku khongela ni ku kombela eka vanhu va wena. ₃₈Rihisela eka wanuna loyi ni le ka mavuthu ya yena. A va dlaye hi banga; tsundzuka loko va ku sandza, kutani ku nga poni na un'we eka vona.”

₃₉Kavaloko Nikanoro a suka eYerusalema, a ya dzima mixaxa ya yena eBeta-Horoni, kutani mavuthu ya Vaasiriya ya tihlanganisa na yena. ₄₀Yudasi a ya dzima mixaxa ya yena emutini wa Adasa ni masocha ya 3 000, kutani a khongela a ku: ₄₁“We HOSI Xikwembu, loko varhumiwa va hosi yin'wana ya Vaasiriya va ku sandzile, ntsumi ya wena yi ve yi dlaya masocha ya vona ya 185 000. ₄₂Kutani ke, hi ndlela yoleyo, herisa mavuthu lama nga emahlweni ka hina namuntlha, u endla leswaku hinkwavo va tiva hilaha Nikanoro a rhuketeleke hakona Xivandla lexo hlawuleka. N'wi avanyise hi leswi fambelanaka ni ku homboloka loku ka yena.”

₄₃Kwalaho mavuthu ya Nikanoro ni ya Yudasi ma hlangana ku lwa hi siku ra vu-13 ra n'hweti ya Adara. Mavuthu ya Nikanoro ma hluriwa, Nikanoro a va wo sungula ku dlayiwa. ₄₄Loko masocha ya yena ma vona leswaku Nikanoro ú dlayiwile, ma cukumeta matlhari ya wona ma baleka. ₄₅Vayuda va va hlongorisa siku hinkwaro ku sukela emutini wa Adasa ku ya fika eGazara; loko va ri karhi va va landzelela, va vitanana eku lweni hi ku chaya tinanga. ₄₆Kutani vavanuna va huma emitini hinkwayo ya Yudiya, va rhendzela valala, va va tlherisela eka lava va va hlongorisaka; kwalaho Vaasiriya hinkwavo va dlayiwa, ku nga poni na un'we wa vona.

₄₇Vayuda va teka hinkwaswo leswi va swi phangeke, va tsema nhloko ya Nikanoro ni voko ra yena ra xinene, rorero a a tshambulutile rona loko a tikurisa. Va tisa nhloko leyi ni voko leri, va swi komba vanhu ehandle ka Yerusalema. ₄₈Vanhu va tsaka swinene, va endla nkhuvo lowukulu siku leri. ₄₉Va boha leswaku siku leri ri ta hamba ri tsundzukiwa hi nkhuvo lembe rin'wana ni rin'wana hi siku ra vu-13 ra n'hweti ya Adara. ₅₀Kavaloko tiko ra Yudiya ri kuma ku rhula masiku ma nga ri mangani.