Ta ku dzunisiwa ka Simoni
1Hi lembe ra 172 Demetriyo wa vumbirhi a hlengeleta mavuthu ya yena, a ya eMediya ku ya lava ku pfuniwa eka nyimpi ya yena na Trifoni. 2Loko Arisake, hosi ya Vaperesi ni Vameda, a twa leswaku Demetriyo wa vumbirhi ú nghenile etikweni ra yena, a rhumela un'wana wa vafambisi va mavuthu ya yena ku ya n'wi khoma. 3Hiloko munhu yoloye a ya hlula mavuthu ya Demetriyo wa vumbirhi, a n'wi khoma a n'wi yisa eka Arisake. Kutani Arisake a pfalela Demetriyo wa vumbirhi ekhotsweni.
4Enkarhini hinkwawo wa ku hanya ka Simoni ku va ni ku rhula etikweni ra Yudiya. Simoni a endlela rixaka ra ka vona leswinene. Mfumo wa yena wu va lowu wu va tsakisaka, swi tikomba hi ku fundzha loku va n'wi kombeke kona evutomini bya yena hinkwabyo. 5Ku tlula kwalaho, ku fundzhiwa ka yena ku va lokukulu loko a ya teka muti wa Yopa, a wu endla hlaluko ra tingalava, kutani a pfula ndlela yo ya eswihlaleni swa Vagriki. 6A ndlandlamuxa tiko ra yena, a ri lawula hi ku hetiseka. 7A vuyisa vabohiwa lavo tala, a fuma ni miti ya Gazara na Beta-Suru swin'we ni khokholo ra Yerusalema, a susa leswi nyamisaka tiko, ku ri hava loyi a n'wi sivelaka.
8Vayuda va tirimela masimu ya vona hi ku rhula, misava yi humesa swa yona hi xitalo, mirhi yi tswala mihandzu ya yona. 9Vakhalabye va tshama emitsendzeleni, va tibulela hi ta leswinene, majaha ma havaxela swiambalo swo saseka swa nyimpi. 10Simoni a phakela miti swakudya, a yi rhumela ni swa ku tibiyelela ha swona, ku twala ka yena ku kondza ku fika emakun'wini ya misava. 11A tisa ku rhula etikweni, kutani Vaisraele va tsaka hi ku tsaka lokukulu. 12Un'wana ni un'wana wa vona a titshamela endzhutini wa murhi wa yena wa vhinya kumbe wa nkuwa, ku ri hava loyi a va chavisaka. 13Enkarhini wolowo, tihosi hinkwato ta valala va vona a ti hluriwile, kutani tiko a ri nga ha hlaseriwi hi munhu. 14Simoni a pfuna swisiwana exikarhi ka varikwavo, a landzela nawu, a hlongola vahomboloki ni vanhu va tihanyi hinkwavo. 15A khavisa Tempele, kutani a engetelela swibya swa Xivandla lexo hlawuleka.
16Loko mahungu ya rifu ra Yonatani ma twakala eRhoma ni le Sparta, vanhu va kona va vaviseka ngopfu. 17Loko va twa leswaku Simoni makwavo wa Yonatani ú vekiwile ku va Muprista lonkulu ematshan'wini ya hosi yakwe ni leswaku Simoni a fuma tiko ra Yudiya ni miti ya rona, 18va n'wi rhumela marito lama tsariweke eka swiphepherhele swa koporo; ha wona va pfuxeta xinakulobye xa vona, va tiyisa ntwanano lowu a va wu endlile na Yudasi na Yonatani. 19Kutani marito lama tsariweke eswiphepherheleni leswi, ma hlayiwa emahlweni ka ntshungu wa vanhu hinkwavo eYerusalema. 20Tsalwa ra papila leri rhumiweke hi Vasparta hi leri nge:
“Eka wena Simoni Muprista lonkulu, ni ka n'wina vakulukumba va tiko, ni vaprista, ni vamakwerhu Vayuda hinkwavo, hina Vasparta ni varhangeri va hina, hi ri: ‘Xewani!’ 21Varhumiwa lava mi va rhumeke, va hi byerile hi ta ndhuma ni ku xiximeka ka n'wina. Ku ta ka vona wu ve ntsako eka hina. 22Kutani leswi va swi vuleke, swi tsariwile emakanelweni ya tinhlengeletano ta tiko ra hina. Marito ya kona hi lama nge: ‘Numeniya n'wana Antiyoko, na Antipateri n'wana Yasoni, va nga varhumiwa va Vayuda, va tile eka hina ku ta pfuxeta xinakulobye xa hina na vona. 23Swi hi tsakisile ku va amukela hi malwandla, kutani hi vekile tsalwa ra marito ya vona evuhlayiselweni bya matsalwa ya tiko ra hina, leswaku Vasparta va ta tshama va ri na wona. Kutani hi rhumerile tsalwa rin'wana ra marito lawa eka Simoni Muprista lonkulu.’ ”
24Endzhaku ka sweswo, Simoni a rhuma Numeniya eRhoma, a heleketa nyiko ya xitlhangu lexikulu xa nsuku lexi a xi tika 685 kg, xi ri xa ku tiyisa xinakulobye exikarhi ka Vayuda na Varhoma.
25Loko Vayuda va twa hinkwaswo leswi, va ku: “Xana hi nga n'wi nkhensisa ku yini Simoni ni vana va yena? 26Hikuva yena ni vamakwavo ni ndyangu wa tata wa yena, va yimile va tiyile, va lwile ni ku hlongola valala va tiko ra Israele, va ri nyika ntshunxeko.”
Kavaloko va tsala leswi landzelaka eka swiphepherhele swa koporo, va swi hayeka etiphuphini entshaveni ya Siyoni. 27Marito lawa ma va tsaleke hi lama nge:
“Hi siku ra 18 ra n'hweti ya Elulu, hi lembe ra 172, ri nga lembe ra vunharhu ra ku fuma ka Simoni Muprista lonkulu, 28hi hlengeletanile endhawini ya Asaramele, hi ri ni ntshungu wa vaprista, ni varhangeri, ni vakulukumba, ni vanhu hinkwavo va tiko, kutani hi tivisiwile marito lama nge: 29‘Hakanyingi loko tinyimpi ti humelela etikweni ra hina, Simoni n'wana Matatiya, yena muprista wa ndyangu wa Yoyaribi, swin'we ni vamakwavo, va nyiketile vutomi bya vona ku lwa ni valala va hina, leswaku Tempele na nawu wa Xikwembu swi hlayiseka. Va tisile ku dzuneka lokukulu erixakeni ra ka hina. 30Yonatani ú hlanganisile vanhu va ka hina, a va Muprista lonkulu a nga si fa. 31Kutani loko valala va tiko ra Yudiya va kungele ku ri hlasela ni ku teka Xivandla lexo hlawuleka, 32Simoni ú humelerile a lwela tiko ra yena. Ú tirhisile mali leyo tala ya yena ku xava matlhari ni ku hakela masocha ya Vayuda. 33Ú akelerile miti ya Yudiya, ni muti wa Beta-Suru lowu nga endzilekaneni wa Yudiya, laha matlhari ya valala a ya hlayisiwa eku sunguleni, kutani a veka eka wona masocha ya Vayuda. 34Ú akerile ni muti wa Yopa lowu nga kusuhi ni lwandle, ni muti wa Gazara lowu nga endzilekaneni wa Azoto, laha valala a va tshama kona eku sunguleni. Ú vekile Vayuda emitini leyi, kutani a yisa eka yona hinkwaswo leswi vanhu va kona a va swi lava. 35Loko vanhu va vonile hilaha Simoni a va tirhela hakona ni hilaha a a hisekela hakona ku tlakusa rixaka ra ka vona, va n'wi endlile murhangeri ni Muprista lonkulu. Va n'wi endla leswi hikwalaho ka ku tshembeka ka yena, ni ku lulama ka yena, ni swiendlo hinkwaswo swa yena swa ku tlakusa matimba ya tiko ra vona.
36“ ‘Enkarhini wa vurhangeri bya yena swilo a swi famba kahle, vamatiko va hlongoriwile etikweni ra Yudiya, swi va tano ni lava a va ri ekhokholweni ra Yerusalema, laha a va hamba va huma ku ya nyamisa Xivandla lexo hlawuleka. 37Simoni ú vekile Vayuda ekhokholweni leri, a ri tiyisa ku sirhelela Yudiya na Yerusalema, a tlakusa ni rirhangu ra Yerusalema. 38Hikwalaho ka swona, hosi Demetriyo wa vumbirhi ú n'wi tiyisile ku va Muprista lonkulu, 39a n'wi endla un'wana wa “Vanghana va hosi”, kutani a n'wi fundzha ngopfu. 40Demetriyo wa vumbirhi ú endlile sweswo, hikuva a a twile leswaku Varhoma a va tivula vanghana va Vayuda, ni vaseketeri va vona, ni vamakwavo, hi leswaku a va amukerile varhumiwa va Simoni ni mafundzha lamakulu.
41“ ‘Kutani Vayuda ni vaprista va vona va bohile leswaku Simoni ni vatukulu va yena va va varhangeri ni Vaprista lavakulu, ku kondza ku humelela muprofeta wa xiviri. 42Simoni ú vile ndhunankulu ya mavuthu ya vona, kutani timhaka ta Xivandla lexo hlawuleka, ni ta matlhari, ni ta makhokholo, ni ta tiko hinkwaro, ti vekiwile emavokweni ya yena. 43Vanhu va n'wi yingisile eka hinkwaswo-nkwaswo. Mintwanano hinkwayo ya mfumo yi tsariwile hi vito ra yena. Hikokwalaho, ú kumile fanelo ya ku ambexiwa xiambalo xa xivunguvungu ni xisirhelelo xa nsuku xa le makatleni.
44“ ‘Ku hava munhu na un'we kumbe muprista loyi a nga ta pfumeleriwa ku hundzuluxa swiboho leswi, kumbe ku kaneta leswi Simoni a nga ta swi vula, kumbe ku ambexiwa xiambalo xa xivunguvungu ni xisirhelelo xa le makatleni. 45Mani na mani loyi a nga ta tlula swiboho leswi kumbe ku swi hundzuluxa, ú ta fanela ku xupuriwa.’ ”
46Kavaloko vanhu hinkwavo va twanana leswaku Simoni a nyikiwa matimba ya ku tirha hi ku landza swiboho leswi. 47Kutani Simoni a nkhensa, naswona a amukela ku va Muprista lonkulu, ni ndhunankulu, ni murhangeri, ni mulweri wa vaprista ni Vayuda hinkwavo.
48Nakambe nhlengeletano yi lerisa leswaku swiboho leswi swi tsariwa eka swiphepherhele swa koporo, ni leswaku swiphepherhele leswi swi vekiwa erivaleni eXivandleni lexo hlawuleka, 49ni leswaku tsalwa ra swiboho leswi ri vekiwa endlwini yo hlayisela tinhundzu ta Tempele, laha Simoni ni vana va yena va nga ta swi kuma hi ku olova.
