I Tihosi 16

₁Hosi Xikwembu xi lerisa Yehu n'wana Hanani ku ya tshinya Baaxa, hi rito leri nge: ₂“Wena Baaxa, a wu nga ri nchumu, kambe ndzi ku kurisile, ndzi ku veka ku va mufambisi wa tiko ra mina ra Israele. Kambe u hanyile hi tindlela ta Yerobuwamu; u dyohisile tiko ra mina ra Israele, kutani swidyoho leswi swa vona swi ndzi hlundzukisile ngopfu. ₃Yingisa ke wena Baaxa, ndzi ta ku herisa hi ndzilo, wena ni va ka n'wina. Ndyangu wa wena, ndzi ta wu herisa ku fana ni ndyangu wa Yerobuwamu n'wana Nebati. ₄Munhu un'wana ni un'wana wa ka Baaxa loyi a nga ta fela emutini, ú ta dyiwa hi timbyana; kasi munhu wa yena loyi a felaka enhoveni, ú ta dyiwa hi makoti.”

₅Kutani ke, mintirho leyin'wana ya Baaxa, ni leswi a swi endleke, ni ta vunhenha bya yena, swi tsariwile eka “Buku ya Matimu” ya tihosi ta Israele. ₆Baaxa a tietlelela, a lahliwa eTirisa, kutani Ela n'wana wa yena a sala a fuma. ₇Hi ku komisa, muprofeta Yehu n'wana Hanani ú rhwexiwile rito ra HOSI Xikwembu ra ku tshinya Baaxa ni ndyangu wa yena hikwalaho ka timhaka leti timbirhi: Xo sungula, hikwalaho ka leswo biha hinkwaswo leswi Baaxa a swi endleke emahlweni ka HOSI Xikwembu, loko a xi hlundzukisa ngopfu, hi mintirho ya yena ni mahanyele ya yena yo fana ni ya ndyangu wa Yerobuwamu; xa vumbirhi, hi mhaka ya leswi a heriseke ndyangu wa Yerobuwamu.

₈Hi lembe ra 26 ra ku fuma ka hosi Asa etikweni ra Yuda, Ela n'wana Baaxa a sungula ku fuma tiko ra Israele eTirisa, a fuma kona malembe mambirhi. ₉Kambe nandza wa yena Zimri, mufambisi wa hafu ya makalichi ya yena ya nyimpi, a boha makungu ya ku vanga vuhosi. Siku rin'wana le Tirisa, loko Ela a ri karhi a nwa a pyopyiwa endlwini ya Arisa, mulanguteri wa swa le ntsindza kwale Tirisa, ₁₀Zimri a nghena, a n'wi juma, a n'wi dlaya, kavaloko a sala a fuma. Lembe ra kona a ri ri ra 27 ra ku fuma ka hosi Asa le Yuda.

₁₁Zimri ú lo na teka vuhosi ni ku sungula ku fuma, o dlaya vanhu hinkwavo va ndyangu wa Baaxa, a nga siyi na munhu na un'we wa xinuna endyangwini wolowo, hambi xaka, kumbe nakulobye. ₁₂Hi mukhuva lowu, Zimri a herisa ndyangu hinkwawo wa Baaxa, hi ku ya hi rito ra HOSI Xikwembu loko xi tshinya Baaxa, hi nomo wa muprofeta Yehu, ₁₃hikwalaho ka swidyoho hinkwaswo leswi Baaxa ni n'wana wa yena Ela va swi endleke, leswi va dyohiseke ni Vaisraele ha swona. A va hlundzukisile ngopfu HOSI Xikwembu xa Vaisraele, hi ku ya gandzela swikwembu swa vona swa hava.

₁₄Kutani ke, mintirho leyin'wana ya Ela, ni ta hinkwaswo leswi a swi endleke, swi tsariwile eka “Buku ya Matimu” ya tihosi ta Israele.

₁₅Hi lembe ra 27 ra ku fuma ka hosi Asa etikweni ra Yuda, Zimri a fuma masiku ya 7 a ri eTirisa. Enkarhini wolowo, mavuthu ya Israele a ma govile kusuhi ni muti wa Gibitoni lowu a wu ri wa Vafilista. ₁₆Mavuthu lawa ma twa leswaku Zimri ú tekile vuhosi, ni leswaku ú dlayile hosi Ela. Hikokwalaho, hi siku rolero emixaxeni, mavuthu hinkwawo ya Israele ma veka Omri, ndhunankulu ya nyimpi, ku va hosi ya Israele. ₁₇Hiloko Omri swin'we ni mavuthu hinkwawo ya Israele va suka eGibitoni, va ya rhendzela muti wa Tirisa, va wu hlasela. ₁₈Loko Zimri a vona leswaku muti wu tekiwile, a ya tumbela endlwini yin'wana ya le ntsindza, a tisunga hi ku hisa yindlu leyi, a fela kona. ₁₉Zimri ú tivangele rifu leri hi ku dyoha ka yena, a ri karhi a endla leswo biha emahlweni ka HOSI Xikwembu, a hanya hi tindlela ta Yerobuwamu, a dyohisa ni Vaisraele hi maendlele lawa ya yena.

₂₀Kutani ke, mintirho leyin'wana ya Zimri, ni ta ku vanga ka yena vuhosi, swi tsariwile eka “Buku ya Matimu” ya tihosi ta Israele.

₂₁Enkarhini wolowo, tiko ra Israele ri avana hi le xikarhi; van'wana va yima na Tibini n'wana Ginati, va lava leswaku a va yena hosi, kasi van'wana va yima na Omri. ₂₂Kambe lava yimaka na Omri va hlula lava yimaka na Tibini n'wana Ginati. Kutani Tibini a dlawa, Omri a sala a fuma.

₂₃Hi lembe ra 31 ra ku fuma ka hosi Asa etikweni ra Yuda, Omri a vekiwa hosi ya tiko ra Israele, a fuma malembe ya 12. Exikarhi ka malembe lawa ya 12, a heta malembe ya 6 a ri eTirisa. ₂₄Kutani Omri a xava xintshabyana xa Samariya eka loyi a a vuriwa Xemere, hi mali ya tisilivhere to tlula 7 000. A biyela xintshabyana lexi, a aka muti eka xona, kutani a thya muti wa kona evito ra “Samariya”, a thyela Xemere loyi khale a a ri n'wini wa xintshabyana lexi.

₂₅Omri a endla leswo biha emahlweni ka HOSI Xikwembu, a biha ku tlula hinkwavo lava n'wi rhangeleke evuhosini. ₂₆A hanya hi tindlela hinkwato ta Yerobuwamu n'wana Nebati, a dyoha ku fana na yena, a dyohisa ni Vaisraele, kutani a hlundzukisa ngopfu HOSI Xikwembu xa Israele hi mhaka ya ku ya gandzela swikwembu swa hava. ₂₇Kutani ke, mintirho leyin'wana ya Omri, ni ta vunhenha lebyi a nga tikomba ha byona, swi tsariwile eka “Buku ya Matimu” ya tihosi ta Israele. ₂₈Omri a tietlelela, a lahliwa eSamariya. Kutani Akabu n'wana wa yena a sala a fuma.

₂₉Hi lembe ra 38 ra ku fuma ka hosi Asa etikweni ra Yuda, Akabu n'wana Omri a sungula ku fuma tiko ra Israele, a fuma malembe ya 22 a ri eSamariya. ₃₀Akabu n'wana Omri a endla leswo biha emahlweni ka HOSI Xikwembu, ku tlula hinkwavo lava n'wi rhangeleke evuhosini. ₃₁Eka Akabu, ku hanya hi ku landza swidyoho swa Yerobuwamu n'wana Nebati, a yi ri mhaka yitsongo! A engetela hi ku ya teka Yezabele n'wana Eti-Baali hosi ya Vasidoni, a ya tirhela Baali xikwembu xa vona, a xi nkhinsamela. ₃₂A akela Baali eyindlu le Samariya, a n'wi yimisela ni alitari endzeni ka yona; ₃₃naswona a dzima mhandze ya Axera xikwembukazi. Hi maendlele lawa ya yena, Akabu ú hlundzukisile ngopfu HOSI Xikwembu xa Israele, ku tlula tihosi hinkwato ta Israele leti ti n'wi rhangeleke evuhosini.

₃₄Enkarhini wa Akabu, Hiele wa le Betele a pfuxa muti wa Yeriko. Loko a ri karhi a aka masungulo ya wona, a humesa gandzelo hi ku dlaya Abirama n'wana wa yena wa mativula; kutani loko a ri eku beleleni ka timbanti, a tlhela a humesa gandzelo hi ku dlaya Segubu n'wana wa yena wa rikotse. Timhaka leti, HOSI Xikwembu a xi ti vurile khale hi nomo wa Yoxuwa n'wana Nuni.