I Vakorinto 12

₁Emhakeni ya tinyiko ta Moya, vamakwerhu, ndzi lava leswaku mi tiva leswi nga swona. ₂Ma swi tiva leswaku, loko ma ha ri vamatiko, a mi yisiwa hala ni hala, mi kokeriwa eka swikwembu swa hava leswi nga vulavuriki. ₃Hikokwalaho, ndza mi tsundzuxa ndzi ri, munhu la fambisiwaka hi Moya wa Xikwembu, a nga ka a nga vuli a ku: “Yesu a a rhukaniwe!” Naswona a ku na munhu la nga vulaka a ku: “Yesu i Hosi!” loko a nga ri la fambisiwaka hi Moya lowo Kwetsima.

₄Ku ni tinyiko ta tinxaka-xaka ta moya, kambe Moya wa kona i wun'we; ₅ku ni tindlela ta tinxaka-xaka to tirhela vanhu, kambe Hosi ya kona i yin'we; ₆matimba ya Xikwembu ma tirha hi tindlela ta tinxaka-xaka, kambe i Xikwembu xin'we lexi tirhaka hinkwaswo eka vanhu hinkwavo. ₇Munhu un'wana ni un'wana ú pfuleteriwa swin'wana hi Moya, leswaku swi ta pfuna hinkwavo. ₈Un'wana ú nyikiwa hi Moya ku vulavula swa vutlhari, un'wana ú nyikiwa ku vulavula swa vutivi, hi ku ya hi Moya wolowo; ₉un'wana ú nyikiwa ku pfumela hi Moya lowu, un'wana kambe ú kuma nyiko yo hanyisa vanhu hi Moya wolowo wun'we; ₁₀un'wana ú nyikiwa matimba yo endla mahlori, un'wana matimba yo vula Rito; un'wana ú kota ku vona ku hambana exikarhi ka mimoya; un'wana ú nyikiwa ku vulavula hi tindzimi leti nga tiviwiki ta tinxaka-xaka, un'wana matimba yo hlamusela tindzimi leti. ₁₁Kambe hinkwaswo leswi i ntirho wa Moya wolowo wun'we, lowu avelaka tinyiko to hambana eka munhu un'wana ni un'wana hilaha wu rhandzaka hakona.

₁₂Kutani ke, miri i wun'we, hambileswi wu nga ni swirho leswo tala; naswona swirho, eku taleni ka swona, swi endla miri wun'we ntsena. Kutani na wona miri wa Kriste, wu tano. ₁₃Hinkwerhu, hambi hi ri Vayuda kumbe Vagriki, mahlonga kumbe lava tifumaka, hi hundzukile miri wun'we, hi ku khuvuriwa ka hina eMoyeni wun'we; hinkwerhu hi nyikiwile ku nwa Moya wun'we ntsena.

₁₄Miri a wu na xirho xin'we ntsena, kambe wu ni leswo tala. ₁₅Loko nenge wu nga ku: “Leswi ndzi nga riki voko, a ndzi wa miri”, xana hakunene a wu nga vi wa miri, hambiloko wu vulavurisa leswi ke? E-e! ₁₆Ni loko ndleve yi nga ku: “Leswi ndzi nga riki tihlo, a ndzi wa miri”, xana hakunene a yi nga vi ya miri, hambiloko yi vulavurisa leswi ke? E-e!

₁₇Loko miri hinkwawo a wu ri tihlo, ku twa ka tindleve a ku ta va kwihi ke? Loko miri hinkwawo a wu ri ndleve, ku nun'hweta ka tinhompfu a ku ta va kwihi ke? ₁₈Kambe hilaha swi nga hakona, Xikwembu xi vekile swirho emirini, xin'wana ni xin'wana hilaha xi rhandzeke hakona. ₁₉Loko swirho hinkwaswo a swi endla xirho xin'we, miri a wu ta va kwihi ke? ₂₀Hilaha swi nga hakona, swirho swi tele, kambe miri i wun'we.

₂₁Tihlo ri nga ka ri nga byeli voko ri ku: “A ndzi na mhaka na wena.” Kumbe nhloko yi nga ka yi nga byeli milenge, yi ku: “A ndzi na mhaka na n'wina.” ₂₂E-e! Kambe swirho swa miri leswi vonekaka swi tsanile ku tlula swin'wana, hi swo leswi swi lavekaka. ₂₃Swirho swa miri leswi hi ehleketaka leswaku a swi kumbukiwi, hi swi komba xichavo lexikulu; leswa tingana, hi swona hi swi fihlaka ngopfu. ₂₄Kasi swirho swa hina leswi dzunekaka, swona a swi lavi ku fihliwa. Kambe Xikwembu xi vumbetele miri, xi ri karhi xi nyika ku dzuneka lokukulu eka swirho leswi a swi pfumala ku dzuneka. ₂₅Xi endlele leswaku ku nga vi na ku avana emirini, kambe swirho hinkwaswo swi tirhelana. ₂₆Loko xirho xin'wana xi twa ku vava, swirho hinkwaswo swi vaviseka na xona; ni loko xirho xin'wana xi dzunisiwa, swirho hinkwaswo swi tsaka na xona.

₂₇Sweswi ke, n'wina mi miri wa Kriste; kutani un'wana ni un'wana wa n'wina i xirho xa wona. ₂₈Kutani Xikwembu xi vekile ekerekeni eku sunguleni vaapostola, endzhaku ku ta vatwarisi va Rito, ku tlhandlama vadyondzisi; kutani ku ta lava endlaka mahlori, ni lava nga ni nyiko yo hanyisa vanhu, ni lava tirhaka swo pfuna van'wana, ni lava nyikiweke ku fambisa mintirho, ni ku vulavula hi tindzimi leti nga tiviwiki ta tinxaka-xaka. ₂₉Xana hinkwavo i vaapostola ke? Xana hinkwavo i vatwarisi va Rito ke? Xana hinkwavo i vadyondzisi ke? Xana hinkwavo hi lava endlaka mahlori ke, ₃₀kumbe lava nga ni nyiko yo hanyisa, kumbe lava vulavulaka hi tindzimi leti nga tiviwiki ke? Xana hinkwavo hi lava hlamuselaka tindzimi leti xana? ₃₁Chivirikelani tinyiko ta Moya leti tlulaka tin'wana hi ku saseka.

Kutani sweswi ndzi ta mi komba ndlela leyi sasekeke ku tlula hinkwato.