Tito 3

₁Tsundzuxa lava u va dyondzisaka ku tiveka ehansi ka tihosi ni tindhuna, hi ku ti yingisa, va tshama va tilunghisela ku tirha mintirho hinkwayo leyinene; ₂va nga tshuki va onha van'wana emavito, kambe va va lavo rhula, va va ni vuxaka, masiku hinkwawo va va ni musa eka vanhu hinkwavo.

₃Na hina khale a hi ri swiphukuphuku, hi humile endleleni, hi ala ku yingisa; a hi ri mahlonga ya ku navela, ni ya ku titsakisa ka tinxaka-xaka; a hi ri lava hanyaka hi nsele ni mavondzo; a hi vengiwa, na hina hi vengana. ₄Kambe siku musa wa Xikwembu Muponisi wa hina, ni rirhandzu ra xona, swi humeleleke, ₅xi hi ponisile. A ku nga ri hi mhaka ya mintirho leyo lulama leyi hina hi hexe hi yi endleke, kambe xi hi ponisile hi tintswalo ta xona, hi ku hlantswiwa loku endlaka leswaku Moya lowo Kwetsima wu hi nyika ku tswariwa ra vumbirhi, ni vutomi lebyintshwa. ₆Xikwembu xi cherile Moya lowu hi ntalo ehenhla ka hina ha Yesu Kriste Muponisi wa hina, ₇leswaku, hi tintswalo ta xona, hi ta endliwa lava lulameke emahlweni ka xona, ni ku amukela ndzhaka ya vutomi lebyi nga heriki, lebyi hi byi langutelaka. ₈Mhaka leyi yi tiyile.

Kutani ndzi lava leswaku u tiyisa timhaka leti swinene, leswaku lava pfumeleke eka Xikwembu, va lava tindlela ta ku tinyiketa, va tirha mintirho leyinene. Hi swona leswi nga swinene, leswi pfunaka vanhu. ₉Fularhela ta ku phikisana hi leswi nga pfuniki nchumu kumbe hi swivongo, u tshika ni timholovo, ni ku kanetana hi ta Nawu; swilo leswi a swi pfuni nchumu, i swa hava.

₁₀Munhu loyi a vangaka ku hambana, n'wi tshinye kan'we, kumbe kambirhi, kutani u nga ha vi na mhaka na yena, ₁₁hikuva wa swi tiva leswaku munhu lowo tano ú onhakile, kutani swidyoho swa yena swi komba leswaku ú humile endleleni.

₁₂Loko ndzi rhumela Artema kumbe Tixiko ku ta kwaleyo, ringeta hi matimba ku ta ka mina le Nikopoli, hikuva ndzi tilunghisele ku ya tshama kona vuxika hinkwabyo. ₁₃Endla hi matimba ku longela Zena n'wamilawu, na Apolosi, leswaku va khoma riendzo ra vona, va nga pfumali nchumu. ₁₄Varikwerhu a va dyondze ku chivirikela mintirho leyinene, va ta pfuna lomu ku pfumariwaka ngopfu; va nga tshuki va hanya vutomi lebyi nga pfuniki nchumu.

₁₅Hinkwavo lava ndzi nga na vona la, va ku rungula. Rungula vanghana va hina eku pfumeleni.

Tintswalo ta Xikwembu a ti ve na n'wina hinkwenu!