Nhlavutelo 21

₁Kutani ndzi vona tilo lerintshwa ni misava leyintshwa, hikuva tilo lero sungula ni misava leyo sungula a swi hundzile, ni lwandle a ri nga ha ri kona. ₂Kutani ndzi vona muti lowo hlawuleka, Yerusalema lowuntshwa, wu xika hi le tilweni wu huma eka Xikwembu, wu tilulamisile tanihi mutekiwa loko a tibombisele nuna wa yena. ₃Ndzi twa ni rito lerikulu leri humaka exiluvelweni ri ku: “Vonani, vuako bya Xikwembu byi le vanhwini. Xi ta aka na vona, kutani va ta va vanhu va xona; Xikwembu hi xoxe xi ta va na vona, xi va Xikwembu xa vona. ₄Xi ta sula mihloti hinkwayo emahlweni ya vona, ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona, hikuva leswo sungula swi hundzile.”

₅Kutani loyi a tshameke exiluvelweni a ku: “Vonani, ndzi endla swilo hinkwaswo swi va leswintshwa.” A engeta a ku: “Tsala, hikuva marito lawa ma tshembekile, ma ni ntiyiso.” ₆Kutani a ku ka mina: “Swi endlekile! Hi mina Alfa na Omega, ku sungula ni ku hela. Loyi a nga ni torha, ndzi ta n'wi nyika mati ntsena a nga hakeli, ma huma exihlobyeni xa mati ya vutomi. ₇Loyi a hlulaka, ú ta kuma ndzhaka ya swilo leswi, kutani ndzi ta va Xikwembu xa yena, na yena a va n'wana wa mina.” ₈Kambe loko ma ri matoya, ni lava alaka ku pfumela, ni lava endlaka swa manyala, ni vadlayi, ni vaoswi, ni vangoma, ni lava gandzelaka swikwembu swa hava, ni vahembi hinkwavo, xa vona ku ta va ku hoxiwa etiveni leri pfurhaka hi ndzilo ni xivavula, ri nga rona rifu ra vumbirhi.

₉Kutani ku fika yin'wana ya tintsumi ta 7 leti nga ni minkambana ya 7, leyi teleke mintungu leyo hetelela; ntsumi yi vulavula na mina yi ku: “Tana, ndzi ta ku komba Mutekiwa, nsati wa Xinyimpfana.” ₁₀Moya wu ndzi tela, kutani ntsumi yi ndzi yisa entshaveni leyikulu leyo tlakuka; yi ndzi komba muti lowo hlawuleka wa Yerusalema, wu ri karhi wu xika hi le tilweni wu huma eka Xikwembu, ₁₁wu ri ni ku kwetsima ka Xikwembu. Hi ku vangama ka wona, a wu tlunya mahlo ku fana ni ribye ra nkoka lowukulu, wu phatima kukota ribye ra “yaspere” kumbe kukota “kristala”. ₁₂A wu ri ni rirhangu lerikulu ro tlakuka, ra tinyangwa ra 12, ku ri ni tintsumi ta 12 etinyangweni, kutani tinyangwa ta kona a ti kevetliwile mavito ya tinyimba ta 12 ta Vaisraele. ₁₃Hi tlhelo ra vuxa, a ku ri ni tinyangwa tinharhu; en'walungwini, tinyangwa tinharhu; edzongeni, tinyangwa tinharhu; ni le vupeladyambu, tinyangwa tinharhu. ₁₄Kutani rirhangu ra muti a ri ri ni maribye ya masungulo ya 12, eka wona ku ri ni mavito ya 12 ya vaapostola lava khume na vambirhi va Xinyimpfana.

₁₅Kutani loyi a vulavuleke na mina, a a ri ni rihlanga ra nsuku ro pima ha rona, leswaku a ta pima muti ni tinyangwa ta wona ni rirhangu ra wona. ₁₆Muti a wu ri ni matlhelo ya mune yo ringana; mupimi a pima hi rihlanga ra yena, a kuma mpimo wa “tistadiya” ta 12 000 matlhelo hinkwawo, hambi ku ri ku ya henhla. ₁₇A pima ni ku anama ka rirhangu ku ya endzeni, a kuma mpimo wa “swisungunhu” swa 144 hi pimele ra vanhu, ri nga ra ntsumi. ₁₈Rirhangu a ri akiwile hi “yaspere”, kasi loko wu ri muti wona a wu akiwile hi nsuku lowo tenga, wo fana ni nghilazi hi ku vonikela. ₁₉Masungulo ya rirhangu ra muti a ma sasekisiwile hi mihlovo hinkwayo ya maribye ya nkoka. Ro sungula a ri ri ra “yaspere”, ku ta landza “safiri”, ra vunharhu “agata”, ra vumune “emeralda”, ₂₀ra vuntlhanu “onikisi”, ra vu-6 “sardiyo”, ra vu-7 “krisolita”, ra vu-8 “berila”, ra vu-9 “topazi”, ra vukhume “krisopurasi”, ra vu-11 “yakinta”, ra vu-12 “ametisita”. ₂₁Kutani tinyangwa leti ta 12 a ti endliwe hi vuhlalu bya nkoka bya “tidayimani” ta 12, nyangwa yin'wana ni yin'wana yi endliwile hi “dayimani” yin'we. Xivava xa muti a xi ri xa nsuku lowo tenga, wo fana ni nghilazi leri vonikelaka.

₂₂Tempele a ndzi yi vonanga emutini, hikuva Tempele ya wona, i Hosi Xikwembu xa matimba hinkwawo, ni Xinyimpfana. ₂₃Muti a wu lavi dyambu kumbe n'weti ku wu voninga, hikuva wu voningiwa hi ku kwetsima ka Xikwembu, kutani Xinyimpfana i rivoni ra wona. ₂₄Vanhu va matiko hinkwawo va ta famba eku vonakaleni ka wona, kutani tihosi ta misava ti ta wu tisela rifuwo ra tona. ₂₅Ninhlekanhi, tinyangwa ta wona a ti nga pfariwi, naswona vusiku a byi nga vi kona eka wona. ₂₆Vukosi ni ku dzuneka ka matiko hinkwawo swi ta tisiwa eka wona. ₂₇Kambe a ku nga ngheni xilo ni xin'we xa thyaka kona, hambi a ri loyi a hanyaka hi swa manyala kumbe vunwa; ku ta nghena ntsena lava mavito ya vona ma tsariweke ebukwini ya vutomi ya Xinyimpfana.