Pisalema ya 99

₁HOSI Xikwembu xa fuma, xi tshamile ehenhla ka tikerubu;

vamatiko va rhurhumela hi ku chava, misava ya tsekatseka.

₂HOSI Xikwembu lexi nga Siyoni xi ni matimba,

vamatiko hinkwavo va le hansi ka xona.

₃We HOSI, vanhu a va ku dzunise,

hikuva vukulu bya wena bya chavisa,

hi wena ntsena la kwetsimeke.

₄Wena mufumi wa matimba, u rhandza nawu,

kutani leswo lulama swi tiyisiwa hi wena.

Hi wena u tiseke nawu ni ku lulama

exikarhi ka va ka Yakobo.

₅Twarisani HOSI Xikwembu xa hina,

xi nkhinsameleni laha xi tikombaka kona.

HOSI Xikwembu hi xona ntsena xi kwetsimeke!

₆Exikarhi ka vaprista va xona, a ku ri na Muxe na Aroni,

na yena Samiele a a ri un'wana wa lava va xi khongelaka.

Vanhu lava a va huwelela eka HOSI Xikwembu, kutani xi va hlamula.

₇A xi vulavula na vona xi ri epapeni leri nembelelaka,

kutani vona a va hlayisa swiletelo swa xona

ni milawu leyi xi va nyikeke yona.

₈We HOSI Xikwembu xa hina, a wu va hlamula, u va rivalela,

kambe a wu nga tshiki ku va ba loko va ku dyoherile.

₉Twarisani HOSI Xikwembu xa hina,

xi nkhinsameleni entshaveni ya xona leyo hlawuleka,

hikuva xona xi kwetsimile.