Pisalema ya 98

₁Dzunisani HOSI Xikwembu hi ku yimbelela risimu lerintshwa,

hikuva mintirho ya xona ya hlamarisa.

Hi ntamu wa xona ni ku hlawuleka ka xona lokukulu,

xi hlurile valala va xona.

₂HOSI Xikwembu xi twarisile ku hlula ka xona,

xi kombile vamatiko hilaha xi lwelaka vanhu va xona hakona.

₃A xi tshikanga ku rhandza Vaisraele,

ni ku va la tshembekaka eka vona;

hambi va ri vanhu va le matikweni ya le kule,

va swi vonile leswaku Xikwembu xa hina i muhluri.

₄N'wina vaaki hinkwavo va misava huwelelani mi dzunisa HOSI,

sumani tinsimu mi yimbelela mi ri karhi mi ba minkulungwana;

₅yimbelelani mi twarisa HOSI,

mi ri karhi mi chaya tiharipa ta n'wina, swi nandziha.

₆Chayani tinanga, mi ba ni mhalamhala,

mi huwelela hi ku tsaka emahlweni ka HOSI Xikwembu mufumi wa hina.

₇Lwandle a ri pfume ni hinkwaswo leswi nga ka rona,

misava ni vaaki va yona a va tsake.

₈Milambu a yi phokotele mavoko,

tintshava hinkwato a ti be minkulungwana,

₉loko HOSI Xikwembu xi ta ku ta fuma misava.

Xi ta yi avanyisa hi ku lulama,

vamatiko xi ta va fambisa hi nawu.